លំនៅដ្ឋានជាច្រើនត្រូវបានដាក់លក់ ដើម្បីបំពេញតាមតម្រូវការរបស់អ្នកទិញក្នុងស្រុក ខណៈដែលគេមើលឃើញថារយៈជិត១០ឆ្នាំចុងក្រោយនេះ ប្រជាជនជាច្រើន ចាប់ផ្តើមមានលទ្ធភាពទិញផ្ទះនៅក្នុងទីក្រុង និងតាមបណ្តាទីប្រជុំជនធំៗ នៅតាមរាជធានីខេត្ត ។
ការទិញលំនៅដ្ឋាន បានក្លាយទំនោរដ៏ពេញនិយមសម្រាប់មនុស្សទូទៅ ហើយសម្រាប់ជនជាតិខ្មែរ គេនៅតែមើលឃើញថាទំនោរ នៃការទិញផ្ទះជាប់ដី បែបបុរី ឬផ្ទះល្វែង (សម្រាប់រស់នៅ ឬប្រកបអាជីវកម្ម) នៅមានភាពពេញនិយមខ្លាំង។ នៅក្នុងបទសម្ភាសន៍ជាមួយ Realestate.com.kh លោក ម៉ម រតនា និង អ្នកស្រី ម៉ី មិនា ជាអ្នកដែលបានទិញផ្ទះរួចរាល់ពីគម្រោងបុរី និង កញ្ញា ចេង ហ៊ុយហុង បានរៀបរាប់ពីរបៀបដែលពួកគាត់ជ្រើសរើសផ្ទះ និងគោលដៅនៃការទិញផ្ទះ។
១. ប្រភេទផ្ទះ
លោក ម៉ម រតនា បាននិយាយថា៖«ខ្ញុំបានទិញផ្ទះក្នុងគម្រោងបុរី ដោយសារខ្ញុំចូលចិត្ត ហើយខ្ញុំមើលឃើញថាមនុស្សភាគច្រើន ចង់បានផ្ទះល្វែង ឬបុរី ដែលអាចប្រកបមុខរបរដើម្បីទាញយកចំណូលបាន»។ លោកថា សម្រាប់អ្នកដែលមានដែលមានលទ្ធភាពគ្រប់គ្រាន់ ដែលអាចទិញផ្ទះជាលក្ខណៈខុនដូ ឬផ្ទះតម្លៃខ្ពស់ នៅតំបន់ទីប្រជុំជន ក៏ជាជម្រើសល្អសម្រាប់ការស្នាក់នៅ ដោយសារតែយើងអាចទទួលបានកន្លែងរស់នៅ ដែលអាចផ្តល់សេរីភាព និងទំនើប។ ទោះបីជាយ៉ាងនេះក្តី លោក រតនា ជឿថាមនុស្សជាច្រើនចង់បានផ្ទះ ដែលគេអាចទាញយកប្រយោជន៍បាន។ ដូចគ្នានេះដែរ កញ្ញា ហ៊ុយហុង ដែលជាអ្នកមានបំណងទិញផ្ទះ នៅពេលឆាប់ៗខាមុខ បានបង្ហើបថា គាត់ចង់ទិញផ្ទះដែលអាចបង្កើតចំណូល សម្រាប់ទ្រទ្រង់ដល់ការរស់នៅរបស់ខ្លួន និងគ្រួសារ។
២. ទីតាំង
អ្នកទាំងបីមានគំនិតដូចគ្នា ចំពោះការជ្រើសរើសទីតាំងផ្ទះ។ ទីតាំងដែលទទួលបានការចាប់អារម្មណ៍ជាងគេ គឺនៅតំបន់ទីប្រជុំជនដែលមានមនុស្សរស់នៅច្រើន។ ចំណុចនេះ មានលក្ខណៈស្របគ្នា ទៅនឹងការចង់ប្រកបមុខរបររកស៊ី នៅតាមគេហដ្ឋានរបស់ខ្លួន ដោយសារតែវាជាកន្លែងដែលងាយស្រួល សម្រាប់អតិថិជនប្រើប្រាស់សេវាកម្ម ឬទំនិញ។ បើទោះបីការទិញ មិនសម្រាប់ការធ្វើអាជីវកម្មក៏ដោយ ពោលគឺទិញជាកន្លែងស្នាក់នៅសុទ្ធសាធ ដើម្បីភាពឯកជនក៏ដោយ ក៏ពួកគេនៅតែចង់បានតំបន់ទីប្រជុំជន ដោយសារតែគេប្រើប្រាស់សេវាកម្ម ឬទំនិញ ដែលផ្តល់ឲ្យដោយអ្នកនៅជុំវិញបានយ៉ាងងាយស្រួល។ លោក បញ្ជាក់ថា លោកបានទិញផ្ទះនៅតំបន់ជ្រោយចង្វារ ដោយសារទីនេះ ជាទីប្រជុំល្អបំផុត នៅជិតទីក្រុង និងងាយស្រួលធ្វើដំណើរ។
៣. រចនាបថ
ដោយសារតែប្រទេសកម្ពុជា មានអ្នកដែលមានកម្រិតជីវភាពមធ្យមមានចំនួនច្រើន ជាងអ្នកដែលមានជីវភាពខ្ពស់ ដូចនេះមនុស្សភាគច្រើន ហាក់មិនសូវផ្តោតសំខាន់ដល់រចនាបថ របស់ផ្ទះដែលពួកគេមានបំណងទិញនោះទេ ធ្វើយ៉ាងឲ្យតែផ្ទះនោះ មានលក្ខណៈសមរម្យ និងអាចរស់នៅបាន។ អ្នកស្រី មិនា បានឲ្យដឹងថា ផ្ទះរបស់គាត់មានលក្ខណៈសាមញ្ញ ប៉ុន្តែមានភាពសមរម្យគ្រប់គ្រាន់សម្រាប់ការរស់នៅ។ ចំណែកកញ្ញា ហ៊ុយហុង និយាយថា នាងនឹងទិញទៅតាមលទ្ធភាពសិន ហើយនៅពេលមានលុយ ចាំតុបតែងកែលម្អឡើងថែមទៀត ឬប្រហែលត្រូវទិញផ្ទះថ្មីមួយទៀត។
៤. តម្លៃ និងការលក់ ឬជួលត្រឡប់វិញ
ជាធម្មតា មនុស្សជាច្រើនចង់ទិញផ្ទះ ក្នុងតម្លៃថោក។ ចំពោះមនុស្សមួយចំនួន គេមិនសូវចាប់អារម្មណ៍លើតម្លៃប៉ុន្មានទេ ប៉ុន្តែគេគិតខ្លាំងដល់ឱកាស ដែលគេអាចប្រកបមុខរបររកស៊ីបាន។ ហ៊ុយហុង និយាយថា៖«ខ្ញុំនឹងទិញផ្ទះតម្លៃពី ៥ ម៉ឺន ទៅ ៦ ម៉ឺន ដើម្បីទុករស់នៅផង និងរកស៊ីផង»។
ចំណែកលោក រតនា បានមើលឃើញថា អ្នកខ្លះមានបំណងទិញផ្ទះសម្រាប់ទុកលក់យកចំណេញ ឬជួលបន្ត។ ពាក់ព័ន្ធនឹងតម្លៃនេះដែរ ក្នុងស្ថានភាពបច្ចុប្បន្ន តម្លៃផ្ទះមានការកើនឡើងខ្ពស់ ដែលតម្រូវឲ្យអ្នកទិញ ត្រូវមានចំណូលខ្ពស់គួរសមដែរ។ តែទោះជាយ៉ាងណា ឥឡូវនេះ អ្នកទិញអាចទទួលបានផ្ទះ តាមរយៈការបង់រំលស់ ជាដំណាក់កាល ដែលត្រូវបានគេមើលឃើញថា វាជាវិធីដ៏ល្អមួយ ដែលជួយសម្រួលដល់អ្នកដែលមិនមានលទ្ធភាពទាំងស្រុង៕
អត្ថបទពាណិជ្ជកម្ម