បាត់ដំបង៖ ស្ត្រី និងយុវជន ពិសេសអ្នករស់នៅតាមបណ្តាខេត្ត ត្រូវហ៊ានគិត និងសម្រេចចិត្តប្រកបដោយការទទួលខុសត្រូវនោះ វានឹងអាចផ្ដល់ផលជោគជ័យតិច ឬច្រើននៅក្នុងជីវិត។ ហើយការអនុវត្តគិតបែបនេះ គឺជាលក្ខណៈមូលដ្ឋាននៃភាពជាអ្នកដឹកនាំផងដែរ។ នេះជាការជំរុញរបស់វាគ្មិនក្នុងវេទិកាសហគមន៍ ស្តីពី«ស្ត្រី និងភាពជាអ្នកដឹកនាំ»កាលពីថ្ងៃទី២៦ មិថុនា។
ក្នុងបរិវេណវត្តតាលាស់ថ្មី ភូមិចុងប្រឡាយ ឃុំតាលាស់ ស្រុងមោងឫស្សី ខេត្តបាត់ដំបង អ្នកស្រី ប៊ិន បូឡែន អភិបាលស្រុករងស្រុកមោងឫស្សី បាននិយាយថា ថ្វីដ្បិតវាសនា បានកំណត់ឱ្យមនុស្សម្នាក់ៗមានលក្ខណៈរស់នៅសង្គមខុសគ្នាក៏ពិតមែន ប៉ុន្តែភាពជោគជ័យរបស់មនុស្សម្នាក់ៗ មិនបានពឹងផ្អែកលើព្រហ្មលិខិត ជាអ្នកកំណត់តាមវាសនានោះទេ។
អ្នកស្រី បូឡែន បានជំរុញ និងលើកចិត្តទឹកដល់ស្ត្រី និងយុវជន ពិសេសដែលមានជីវភាពរស់នៅក្រីក្រ ត្រូវបណ្តុះគំនិតគិតពិចារណា និងហ៊ានសម្រេចចិត្តក្នុងការធ្វើ ដើម្បីភាពជោគជ័យរៀងៗខ្លួន នាពេលអនាគត់ តាមរយៈការខិតខំប្រឹងប្រែងរៀនសូត្រ និងចូលអនុវត្តផ្ទាល់។ ជាពិសេសបោះបង់ចោលគំនិតបែបបុរាណ ដែលពឹងផ្អែកលើព្រហ្មលិខិត។
អ្នកស្រី ប៊ិន បូឡែន អភិបាលស្រុករងស្រុកមោងឫស្សី
អភិបាលស្រុករង រូបនេះ បានចែកបទពិសោធន៍ និងភាពជោគជ័យរបស់ខ្លួន ទៅកាន់ស្ត្រី និងយុវជនជាង១០០នាក់ ក្នុងវេទិកាដូច្នេះថា៖«ខ្ញុំផ្ទាល់ អាចនិយាយបានថាកើតមកក្នុងគ្រួសារដែលមានជីវភាពរស់នៅសមរម្យ ហើយបានរៀនចប់អ្នកថ្នាក់ទី១២ នឹងប្រឡងជាប់គ្រូមត្តេយ្យ។ ការប្រឡងជាប់់ជាភាពជោគជ័យរបស់ខ្ញុំ ។ប៉ុន្តែខ្ញុំជឿជាក់លើខ្លួនឯងថាអាចធ្វើអ្វីច្រើនលើសនេះ ដើម្បីជួយដល់សេដ្ឋកិច្ចគ្រួសារ និងសង្គម។ ខ្ញុំសម្រេចចិត្តបោះបង់អាជីពជាគ្រូ ហើយការបន្តសិក្សាក្នុងកម្រិតបរិញ្ញាបត្រ តាមរយៈការទទួលអាហារូបករណ៍ ហើយខិតខំរៀនសូត្រ និងធ្វើការងារណាដែលជួយដល់សង្គម ក្នុងខេត្តបាត់ដំបង រហូតបានតួរនាទីសព្វថ្ងៃ ក្នុងជួររដ្ឋាភិបាលនេះ»។
ជាការពិតភាពជោគជ័យរបស់មនុស្សម្នាក់ៗ គឺមានលក្ខណៈខុសៗគ្នា ដែលកើតចេញពីការសម្រេចចិត្ត និងចំណង់ចំណូលចិត្តនៃការធ្វើអ្វីមួយ។ នេះជាលើកឡើងរបស់ កញ្ញា យ៉ាង លាភា មន្ត្រីកម្មវិធីជាន់ខ្ពស់នៃអង្គការតម្លាភាពកម្ពុជា។ កញ្ញា បាននិយាយថា ជំហានដំបូងយុវជនត្រូវសម្រេចចិត្ត និងធ្វើឱ្យបាននោះ គឺការខិតខំរៀនសូត្រ ឱ្យក្លាយជាសិស្សពូកែ ក្នុងសាលារៀន និងក្លាយជាធនធានល្អក្នុងសង្គម។
បើតាមកញ្ញា លាភា ការរៀនសូត្រឱ្យក្លាយជាសិស្សពូកែ ជាអាទិភាពទីមួយនៃភាពជោគជ័យ ព្រោះកាលណា សិស្សម្នាក់ៗមានសមត្ថភាពក្នុងថ្នាក់មូលដ្ឋានហើយ វានឹងក្លាយជាស្ពានចម្លងមួយយ៉ាងធំ ពីស្ថានភាពក្រីក្រក្នុងគ្រួសារមួយ ទៅកាន់ជីវភាពសមរម្យតាមរយៈចំណេះដឹងនេះ។
កញ្ញា យ៉ាង លាភា មន្ត្រីកម្មវិធីជាន់ខ្ពស់នៃអង្គការតម្លាភាពកម្ពុជា
«ឆ្លងកាត់បទពិសោធន៍ផ្ទាល់ខ្លួន ខ្ញុំជាកូនស្រីពៅនៅក្នុងគ្រួសារ ដោយបងប្រុសរបស់ខ្ញុំក្រោយបញ្ចប់ការសិក្សាថ្នាក់ទី១២ ត្រូវបានឪពុក-ម្តាយខ្ញុំបញ្ជូនឱ្យទៅសិក្សាបន្តនៅភ្នំពេញ។ ដោយឡែកសម្រាប់ខ្ញុំទំរាំ បានសិក្សាបន្តនៅភ្នំពេញ គឺត្រូវខិតខំស្វែងរកកន្លែងស្នាក់នៅ កន្លែងហូបចុក និងកន្លែងសិក្សា ដែលមិនអស់ប្រាក់ដោយខ្លួន ព្រោះឪពុក-មា្តយខ្ញុំ បាននិយាយថា គាត់គ្មានលទ្ធភាពឱ្យខ្ញុំសិក្សាបន្តនៅភ្នំពេញទេ។ ហើយការទទួលបានកន្លែងស្នាក់នៅ កន្លែងហូបចុក និងកន្លែងសិក្សា ដោយឥតគិតថ្លៃនេះ គឺបានពីលទ្ធផល នៃការខិតខំសិក្សារបស់ខ្ញុំកន្លងមក»។ នេះជាការលើកឡើងរបស់ កញ្ញា លាភា។
ក្រៅពីមានការសម្រេចចិត្តធ្វើអ្វីមួយ ក៏ត្រូវទាមទាររកហេតុផល និងលទ្ធផលជាក់ស្តែងសមរម្យណាមួយ ដើម្បីឲ្យមជ្ឈដ្ឋានរស់នៅជុំវិញខ្លួនបានឃើញនិងទទួលយកដោយការពេញចិត្តផងដែរ។ នេះជាការលើកឡើងរបស់ DJ NANA។
DJ NANA
DJ NANA បានសរសេរដូច្នេះថា៖«ក្នុងនាមយើងស្ថិតនៅក្នុងបន្ទុកគ្រួសារ បើយើងសុំឪពុក-ម្តាយធ្វើការងារអ្វីមួយ ឬទិញសម្ភារមានតម្លៃណាមួយ យើងគួរណាស់ ព្យាយាមហេតុផលពីគុណសម្បត្តិ និងអត្ថប្រយោជន៍ជុំវិញការសម្រេចចិត្តរបស់យើង ដែលពួកគាត់មិនយល់ ឬុមើលមិនឃើញ។ក្រៅពីនិយាយពីគុណសម្បត្តិទាំងនោះ យើងត្រូវអនុវត្តឱ្យឪពុក-ម្តាយរបស់យើង មើលឃើញនិងទទួលបានលទ្ធផលជាក់ស្តែង នៃសម្រេចរបស់យើងដែរ»។
អ្នកជំនាញខាងដោះស្រាយបញ្ហាស្រី្ត និងយុវជនរូបនេះ បានបញ្ជាក់ថា កាលណាមនុស្សម្នាក់ៗ មុននឹងសម្រេចចិត្តធ្វើមួយអ្វី ដែលមានការសិក្សានិងស្វែងរកហេតុផលត្រឹមត្រូវដែលជាប្រយោជន៍ខ្លួនឯង ប្រយោជន៍គ្រួសារ និងប្រយោជន៍សង្គមជាតិឱ្យបានកាន់តែច្រើន នោះជោគជ័យក្នុងជីវិតនឹងទទួលកាន់តែប្រសើរ៕