លោក ត្រាំ ត្រឡប់ ១៨០ ដឺក្រេដោយអនុញ្ញាតឲ្យមានការរកស៊ីជាមួយ Huawei វិញ

អន្តរជាតិ

នយោបាយអន្តរជាតិ

លោក ត្រាំ ត្រឡប់ ១៨០ ដឺក្រេដោយអនុញ្ញាតឲ្យមានការរកស៊ីជាមួយ Huawei វិញ

30, Jun 2019 , 7:39 pm

រូបភាព

រូបភាព AFP

ដោយ:

៦សប្តាហ៍ ក្រោយពីក្រុមហ៊ុនចិន Huawei ត្រូវបានក្រុងវ៉ាស៊ីនតោនដាក់បញ្ចូនក្នុងបញ្ជីខ្មៅ លោកប្រធានាធិបតីអាមេរិក ដូណាល់ បានកាច់ចង្កូត១៨០ដឺក្រេចំពោះទណ្ឌកម្មនេះ ដោយប្រកាសដកហូតវិញ។ បន្ថែមពីនេះសំណុំរឿង Huawei នេះ ភាគីចិន និងអាមេរិក ក៏បានឯកភាពបន្តកិច្ចចរចាពាណិជ្ជកម្ម និងផ្អាកការដំឡើងពន្ធទៅមកថ្មីៗផ្សេងទៀតផងដែរ ដើម្បីទុកពេលរកច្រកដោះស្រាយជម្លោះ។

ពីប្រទេសជប៉ុន នៅជំនួបកំពូល G២០ នៅថ្ងៃសៅរ៍ទី ២៩ មិថុនា លោក ដូណាល់ ត្រាំ បានលើកឡើងថា ក្រុមហ៊ុនអាមេរិកនានា អាចលក់សម្ភាររបស់ពួកគេទៅឲ្យក្រុមហ៊ុន Huawei បាន ។ ត្រង់ចំណុចនេះ មេដឹកនាំវ័យ ៧៣ឆ្នាំរូបនេះ ការអនុញ្ញាតឲ្យមានការដោះដូរអាជីវកម្មគ្នានេះ នឹងមិនប៉ះពាល់ដល់បញ្ហាអាសន្នជាតិ និងបញ្ហាធំធេងណាមួយឡើយ។

តាមការចុះផ្សាយរបស់ទូរទស្សន៍អាមេរិក CNN លោក ដូណាល់ ត្រាំ បញ្ជាក់ទៀតថា បញ្ហា Huawei នៅតែជាផ្នែកមួយនៃកិច្ចពិភាក្សាពាណិជ្ជកម្មដែលកំពុងបន្តរវាងក្រុងវ៉ាស៊ីនតោន និងក្រុងប៉េកាំង ប៉ុន្តែខណៈពេលនេះ លោក នឹងចេញបញ្ជាឲ្យបន្តការធ្វើអាជីវកម្មឡើងវិញរវាងក្រុមហ៊ុនបច្ចេកវិទ្យាអាមេរិកនិងក្រុមហ៊ុនចិន។

ទោះជាបែបនេះក្តី ភ្លាមៗនេះ គេពុំទាន់ដឹងនៅឡើយទេថា តើរដ្ឋបាលអាមេរិកនឹងចាត់វិធានការបែបណានៅឡើយទេ ក្នុងការដកហូតទណ្ឌកម្មប្រឆាំងនឹងក្រុមហ៊ុនចិននេះ ។ យោងតាមកាសែត The Washington Post លោក ត្រាំ បានលើកឡើងថា លោកនឹងទៅជជែកពិភាក្សាជាមួយមន្ត្រីអាមេរិក ដើម្បីកាត់បន្ថយសម្ពាធលើក្រុមហ៊ុន Huawei ប៉ុន្តែសង្កត់ធ្ងន់ថា ពួកគេពុំទាន់បង្កើតការសម្រេចចិត្តជាផ្លូវការក្នុងដកហូតការរឹតត្បិតនេះនៅឡើយទេ។

ទន្ទឹមនឹងគ្នានេះ បើតាមកាសែត The Wall Street Journal លោក ត្រាំ បង្ហើបឲ្យដឹងថា ប្រទេសទាំងពីរ នឹងទុករឿង Huawei នេះ រហូតដល់បញ្ចប់នៃកិច្ចចរចាក្នុងសង្គ្រាមពាណិជ្ជកម្ម។

ការប្រកាសរបស់លោកដូណាល់ ត្រាំ ធ្វើឡើងក្រោយពីបានជួបពិភាក្សាស៊ីជម្រៅជាមួយលោកប្រធានាធិបតីចិន ស៊ី ជិនភីង។ មហាអំណាចពិភពលោកទាំងពីរ ដែលកំពុងប្រឈមមុខគ្នានៅក្នុងបញ្ហជម្លោះពាណិជ្ជកម្មនេះ បានជជែកពីបញ្ហាជាប់គាំងក្នុងសង្គ្រាមពាណិជ្ជកម្ម និងក្រុមហ៊ុនចិន Huawei ដែលជាចំណុចក្តៅក្នុងសមភូមិដ៏ក្តៅគគុកនេះ។

សូមបញ្ជាក់ថា ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី១៦ ខែឧសភា បានប្រកាសអាសន្នជាតិលើវិស័យគមនាគមន៍ ដោយហាមឃាត់ក្រុមហ៊ុនអាមេរិកទាំងអស់ពីការប្រើប្រាស់សម្ភារគមនាគមន៍បរទេសនានា ដែលរដ្ឋបាលលោកចាត់ទុកថា បង្កជាការគំរាមកំហែងដល់សន្តិសុខជាតិ។ ចំណាត់ការថ្មីនេះ ទំនងជាសំដៅលើក្រុមហ៊ុនយក្សចិន Huawei ដែលក្រុងវ៉ាស៊ីនតោនបានរិះគន់ជាញឹកញាប់ពាក់ព័ន្ធនឹងហានិភ័យនៃការធ្វើចារកម្ម។

អត្ថបទទាក់ទង

ស្ថាបនិក Huawei មិនបារម្ភពីទណ្ឌកម្មអាមេរិក ខណៈប៉េកាំងប្រកាសធ្វើខ្នងបង្អែក

ក្រុមហ៊ុន Huawei បង្កើតឡើងដោយលោក Ren Zhengfei អតីតមន្ត្រីយោធាចិន

អាមេរិកពន្យារពេលដាក់ទណ្ឌកម្មលើ Huawei ៩០ថ្ងៃ ព្រោះអាចត្រូវជើងខ្លួនឯង

Google ដកហូតអាជ្ញាបណ្ណប្រព័ន្ធប្រតិបត្តិការ Android ពីក្រុមហ៊ុនទូរសព្ទ Huawei

៤ថ្ងៃប៉ុណ្ណោះក្រោយបទបញ្ជានេះ ក្រុមហ៊ុនបច្ចេកវិទ្យាយក្សអាមេរិក Google បានកាត់ផ្តាច់អាជីវកម្មមួយចំនួន ជាមួយក្រុមហ៊ុនទូរសព្ទចិន Huawei ជាពិសេស ផ្នែកនៃការដំឡើងកម្មវិធីសំខាន់មួយចំនួនក្នុងប្រព័ន្ធប្រតិបត្តិការ Android ។ គេព្យាករថា អនាគតនៃទូរសព្ទឆ្លាតវៃរបស់ក្រុមហ៊ុនចិន Huawei ជំនាន់ថ្មី ដែលដំណើរការលើប្រព័ន្ធប្រតិបត្តិការ Android នឹងបាត់បង់សេវាកម្មពេញនិយមមួយចំនួន រួមមាន Google Play Store, Gmail, Chrome browserនិង YouTube ជាដើម។

យ៉ាងណាមិញ រឿងហេតុនៅពុំទាន់ចប់។ ក្រសួងពាណិជ្ជកម្មអាមេរិក កាលពីថ្ងៃទី២០ ខែឧសភា បានសម្រេចពន្យារពេលការដាក់ទណ្ឌកម្មលើក្រុមហ៊ុន Huawei សម្រាប់រយៈពេល ៩០ថ្ងៃ ដោយលើកហេតុផលថា ការអនុគ្រោះនេះ មានគោលដៅកាត់បន្ថយផលប៉ះពាល់ភ្លាមៗពេក លើក្រុមហ៊ុនផ្គត់ផ្គង់របស់អាមេរិក។ តួយ៉ាង ក្រុមហ៊ុនបច្ចេកវិទ្យាអាមេរិក បានលក់ផ្នែក Hardware ដូចជា Chip ជាដើម ទៅឲ្យក្រុមហ៊ុនទូរសព្ទ Huawei ដែលប៉ាន់ស្មានជាទឹកប្រាក់ចំនួន ១១ពាន់លានដុល្លារ ក្នុងឆ្នាំ២០១៨៕