អន្តរជាតិ
នយោបាយអន្តរជាតិ
អតីតរដ្ឋមន្ត្រីការបរទេស៖ លោក ឌូទើតេ គួរតែត្រូវបានដកដំណែង ដោយសារមិនការពារអធិបតេយ្យជាតិ
× អតីតរដ្ឋមន្ត្រីការបរទេសហ្វីលីពីន លោក Albert del Rosario សម្តែងការមិនពេញចិត្តទៅនឹងការដឹកនាំរបស់លោកប្រធានាធិបតី រ៉ូឌ្រីហ្គោ ឌូទើតេ ដោយលោក អះអាងថា មិនបានបំពេញតួនាទីពេញលេញដូចបានបញ្ញត្តិក្នុងរដ្ឋធម្មនុរញ្ញ។ អតីតរដ្ឋមន្ត្រីរូបនេះ អះអាងថា លោក ឌូទើតេ គួរតែត្រូវបានដកចេញពីតំណែង ដោយសារខ្វះសមត្ថភាពក្នុងការការពារទឹកដី។
តាមរយៈកិច្ចសម្ភាសន៍ជាមួយនឹងសារព័ត៌មាន ABS-CBN ថ្ងៃ២៧ មិថុនា លោក Albert del Rosario បានថ្លែងថា រដ្ឋធម្មនុញ្ញបានបញ្ញត្តិយ៉ាងច្បាស់ថា តំបន់សេដ្ឋកិច្ចផ្តាច់មុខ ក៏ជាផ្នែកមួយនៃអធិបតេយ្យរបស់ប្រទេស ដែលលោក ឌូទើតេ ត្រូវការពារ ពោលគឺប្រធានាធិបតី និងកងទ័ព មានកាតព្វកិច្ចក្នុងការអនុវត្តការពារឲ្យបានត្រឹមត្រូវ។
អតីតប្រមុខការទូតរូបនេះ បន្តទៀតថា អ្នកដែលបំពាននឹងបទបញ្ញត្តិនេះ គឺជាមូលដ្ឋានដ៏រឹងមាំមួយក្នុងការបញ្ឈប់ពីតួនាទី និងតំណែង។ ក្នុងករណីនេះ លោក សង្កត់ធ្ងន់ លោកប្រធានាធិបតី ឌូទើតេ អាចត្រូវបានដកចេញពីតំណែងបាន។
ការណ៍ដែលអតីតប្រមុខការទូតហ្វីលីពីន ដែលធ្លាប់មានជំហររឹងទទឹងជាមួយនឹងចិនរូបនេះ បង្ហើបពីផ្លូវច្បាប់ប្រឆាំងនឹងលោកប្រធានាធិបតី ឌូទើតេ បែបនេះ ដោយសារតែថ្មីៗនេះ លោកប្រធានាធិបតី ឌូទើតេ បានប្រព្រឹត្តឥរិយាបថការទូតមួយ ដែលបង្កឲ្យមានការហួសចិត្ត ពាក់ព័ន្ធនឹងបញ្ហានៅក្នុងតំបន់សេដ្ឋកិច្ចផ្តាច់មុខរបស់ខ្លួននៅក្នុងសមុទ្រចិនខាងត្បូងជាមួយចិន។
គួររម្លឹកបន្តិចថា ក្នុងរដ្ឋបាលដឹកនាំរបស់អតីតប្រធានាធិបតី Benigno Aquino ហ្វីលីពីន បានមានជំហរប្រឆាំងខ្លាំងទៅនឹងចិនលើបញ្ហាសមុទ្រចិនខាងត្បូង។ ពេលនោះហ្វីលីពីន ដែលមានលោក Albert del Rosario ជារដ្ឋមន្ត្រីការបរទេស តែងតែប្រឆាំងចិនទាំងក្របខណ្ឌជាតិ អន្តរជាតិ និងក្របខណ្ឌការទូត និងយោធាទៀតផង។
ទើបតែដល់រដ្ឋបាលដឹកនាំរបស់ប្រធានាធិបតី រ៉ូឌ្រីហ្គោ ឌូទើតេ នោះទេ ដែលហ្វីលីពីន បានផ្លាស់ប្តូរជំហរស្ទើរតែទាំងស្រុងទៅកាន់ចិន។ រដ្ឋបាលលោក ឌូទើតេ ចង់ឱបក្រសោបចិន ដើម្បីការអភិវឌ្ឍសេដ្ឋកិច្ច និងពាណិជ្ជកម្ម ខណៈយករឿងជម្លោះអធិបតេយ្យសមុទ្រចិនខាងត្បូង ទុកដោះស្រាយដោយឡែកតាមមធ្យោបាយការទូត និងចរចាដោយសន្តិវិធី៕
Tag:
ហ្វីលីពីន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com