អន្តរជាតិ
លោក ប្រាយុទ្ធ សុំទោស ស្របពេលបញ្ហាផ្ទៃក្នុងបក្សកាន់អំណាចពុះកញ្ជ្រោលខ្លាំង រូបភាព AFP
× ការបែកបាក់ផ្ទៃក្នុងបក្សកម្លាំងប្រជារាស្ត្រ កំពុងពុះកញ្ជ្រោលខ្លាំងរហូតដល់ថ្នាក់នាយករដ្ឋមន្ត្រី ប្រាយុទ្ធ ចន្ទអូចា ចេញមុខសុំទោសជាសាធារណៈ។ បញ្ហាផ្ទៃក្នុងនៅក្នុងបក្សមានសំឡេងភាគច្រើននៃសម្ព័ន្ធភាពកាន់អំណាចមួយនេះ កើតឡើងដោយសារការបែងចែកតំណែងរដ្ឋមន្ត្រីក្នុងគណៈរដ្ឋមន្ត្រីថ្មីដោយមិនស្មើភាព។ លោក ប្រាយុទ្ធ ដែលនឹងដឹកនាំរដ្ឋាភិបាលចម្រុះគាំទ្រដោយបក្សជិត២០នោះ បានចែកតំណែងរដ្ឋមន្ត្រីខ្លះទៅបក្សផ្សេង ជាថ្នូរនឹងការគាំទ្ររូបលោកឲ្យបន្តដឹកនាំប្រទេស។
នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី១ ខែកក្កដានេះ បានចេញសេចក្ដីថ្លែងការណ៍មួយដើម្បីសុំទោសជុំវិញការទាស់ទែងក្នុងចំណោមអ្នកនយោបាយរបស់បក្សកម្លាំងប្រជារាស្ត្រ ដែលជាបក្សមានសំឡេងច្រើនជាងគេនៃសម្ព័ន្ធភាពកាន់អំណាច។ ដើមហេតុនៃការខ្វែងគំនិតក្នុងបក្សមួយនេះ គឺការបែងចែកតំណែងរដ្ឋមន្ត្រីសម្រាប់រដ្ឋាភិបាលថ្មី ហើយបញ្ហានេះបានក្លាយជាប្រធានបទដែលគេចាប់អារម្មណ៍ខ្លាំង ខណៈរដ្ឋាភិបាលថ្មី មានតែក្បាលអត់ខ្លួនដៃជើងនៅឡើយនោះ។
បើតាមការផ្សាយរបស់សារព័ត៌មាន The Nation ដោយចង់សំដៅការបែងចែកកៅអីរដ្ឋមន្ត្រី លោក ប្រាយុទ្ធ ទទួលស្គាល់ថា វាជារឿងដែលធ្វើឲ្យមនុស្សទាំងអស់សប្បាយចិត្ត ប៉ុន្តែអ្វីដែលសំខាន់បំផុត គឺបង្កើតរដ្ឋាភិបាលមួយដែលសាធារណជនទុកចិត្ត។ ទោះជាយ៉ាងណា អតីតមេដឹកនាំរបបយោធា ដែលទើបទទួលការផ្ដល់ទំនុកចិត្តពីសភាកើតចេញពីការបោះឆ្នោតរូបនេះ បានសន្យាបំពេញការងារឲ្យអស់ពីសមត្ថភាព។
ទំនាស់ផ្ទៃក្នុងបក្សកម្លាំងប្រជារាស្ត្រ បានលេចចេញកាន់តែច្បាស់អំឡុងពេលចុងសប្ដាហ៍មុន។ សម្ព័ន្ធភាព Sam Mitr ដែលជាក្រុមអ្នកនយោបាយធំមួយក្នុងបក្សកម្លាំងប្រជារាស្ត្រ បានបង្ហាញការមិនពេញចិត្តចំពោះការចែកតំណែងរដ្ឋមន្ត្រី ដ្បិតមេដឹកនាំក្រុមរបស់ខ្លួនបែរជាមិនទទួលបានតំណែងដែលចង់បានទៅវិញ។ លោក Suriya Juangroongruangkit មេដឹកនាំក្រុម Sam Mitr ត្រូវបានរំពឹងថា នឹងទទួលតំណែងរដ្ឋមន្ត្រីថាមពល ប៉ុន្តែត្រូវលោក ប្រាយុទ្ធ ឲ្យធ្វើរដ្ឋមន្ត្រីឧស្សាហកម្មទៅវិញ។
ករណីលោក Suriya គ្រាន់តែជាបញ្ហាមួយក្នុងចំណោមបញ្ហាប្រឈមជាច្រើនសម្រាប់លោក ប្រាយុទ្ធ ។ កន្លងមក ដើម្បីទទួលបានការគាំទ្រពីបក្សផ្សេងឲ្យលោក ប្រាយុទ្ធ ក្លាយជានាយករដ្ឋមន្ត្រី បក្សកម្លាំងប្រជារាស្ត្របានសន្យាផ្ដល់តំណែងរដ្ឋមន្ត្រីទៅឲ្យបក្សផ្សេង។ ដូចនេះហើយ ការមិនពេញចិត្តក៏កើតឡើង ដ្បិតអ្នកនយោបាយបក្សនេះមួយចំនួន ដែលប្រឹងប្រែងខ្លាំងក្នុងការបោះឆ្នោត បែរជាមិនទទួលបានតំណែងអ្វីនោះ។
បក្សប្រជាធិបតេយ្យ និងបក្សភូមិចៃថៃ ដែលជាបក្សធំលំដាប់ទីពីរ និងទីបីក្នុងសម្ព័ន្ធភាពកាន់អំណាច បានទាមទារតំណែងរដ្ឋមន្ត្រីទ្រើសៗជាលក្ខខណ្ឌចូលរួមក្នុងសម្ព័ន្ធភាព ហើយតំណែងរដ្ឋមន្ត្រីនោះ ក៏ជាន់គ្នានឹងការចង់បានរបស់ថ្នាក់ដឹកនាំមួយចំនួនទៀតក្នុងបក្សកម្លាំងប្រជារាស្ត្រដែរ។ កាលពីសប្ដាហ៍មុន លោក Suriya ក៏ព្រមានដើរចេញពីបក្សកម្លាំងប្រជារាស្ត្រ ដោយនាំទាំងសមាជិកសភា៣០ផ្សេងទៀតទៅជាមួយផង បើលោកមិនទទួលតំណែងរដ្ឋមន្ត្រីថាមពលទេនោះ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com