សម្ដេច ហ៊ុន សែន ទៅប្រជុំនៅអង្គការពាណិជ្ជកម្មពិភពលោក នៅប្រទេសស្វីស

ជាតិ

នយោបាយជាតិ

សម្ដេច ហ៊ុន សែន ទៅប្រជុំនៅអង្គការពាណិជ្ជកម្មពិភពលោក នៅប្រទេសស្វីស

02, Jul 2019 , 9:22 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានចេញទៅចូលរួមកិច្ចប្រជុំ «ត្រួតពិនិត្យឡើងវិញជាសកល លើជំនួយសម្រាប់ពាណិជ្ជកម្ម ឆ្នាំ២០១៩» នៅអង្គការពាណិជ្ជកម្មពិភពលោក (WTO) នាទីក្រុងហ្សឺណែវ ប្រទេសស្វីស ដែលនឹងប្រព្រឹត្តទៅពីថ្ងៃទី៣ ដល់ថ្ងៃទី៥ ខែកក្កដា ឆ្នាំ២០១៩។

ក្នុងកិច្ចប្រជុំនេះ ប្រមុខរដ្ឋាភិបាល នឹងថ្លែងសុន្ទរកថា នៅក្នុងកម្មវធីសង្គម ដែលរៀបចំដោយ WTO រួមទាំងការប្រកាសជាផ្លូវការនូវយុទ្ធសាស្ត្រសមាហរណកម្មពាណិជ្ជកម្មរបស់កម្ពុជា ឆ្នាំ២០១៩-២០២៣ទៀតផង។ កិច្ចប្រជុំឆ្នាំនេះ ក្រោមមូលបទ «គាំទ្រពិពិធកម្ម និងការលើកកម្ពស់សេដ្ឋកិច្ច សម្រាប់ការអភិវឌ្ឍប្រកបដោយចីរភាព និងបរិយាប័ន្ន តាមរយៈជំនួយសម្រាប់ពាណិជ្ជកម្ម» ក្នុងគោលបំណងពិនិត្យមើលពីរបៀប ដែលជំនួយពាណិជ្ជកម្ម អាចទ្រទ្រង់ប្រកបដោយប្រសិទ្ធភាពដល់ការធ្វើពិពិធកម្មសេដ្ឋកិច្ច។

ក្រៅពីកិច្ចប្រជុំខាងលើ សម្តេច ហ៊ុន សែន ក៏ថ្លែងសុន្ទរកថាដោយឡែកមួយទៀត នៅក្នុងកិច្ចប្រជុំជាទៀងទាត់លើកទី៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ ដែលផ្ដោតលើការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។

ទាក់ទងនឹងបញ្ហាសិទ្ធិមនុស្សនេះ នាយករដ្ឋមន្ត្រីកម្ពុជា បានថ្លែងនៅក្នុងពិធីផ្ទេរសាលាគ្រួសារថ្មី ឲ្យក្រសួងអប់រំ យុវជន និងកីឡា កាលពីថ្ងៃទី១ កក្កដាថា សិទ្ធិមនុស្សនៅកម្ពុជា មិនបានស្ថិតនៅក្រោមគ្រាប់ផ្លោង និងសង្គ្រាមទេ ខណៈដែលប្រទេសខ្លះ កំពុងមានការបាញ់សម្លាប់នៅឡើយ។ ត្រង់ចំណុចនេះប្រមុខរដ្ឋាភិបាល បានឲ្យនិយមន័យថា សិទ្ធិមនុស្សផ្ដើមចេញពីសិទ្ធិរស់រៀនមានជីវិត មិនមែនកើតចេញពីការសរសេររបស់អ្នកកាសែតឡើយ៕