អន្តរជាតិ
បាតុករហុងកុង ចូលលុកលុយពេញអាគារសភាដើម្បីប្រឆាំងសំណើធ្វើបត្យាប័នជាមួយចិន
បាតុករហុងកុងអុកឡុកសាលប្រជុំសភា។ រូបភាព AFP
×![]()
ដោយ: តន ចាន់រិទ្ធារ៉ា
នៅយប់ថ្ងៃទី១ ខែកក្កដា អាគារសភាហុងកុង ត្រូវបានបំផ្លិចបំផ្លាញយ៉ាងដំណំដោយសារស្នាដៃបាតុករវ័យក្មេងដែលទាមទារឲ្យគ្រវែងចោលសំណើច្បាប់ធ្វើបត្យាប័នជាមួយចិន។ បាតុកម្មដែលផ្ដើមចេញពីការប្រមូលផ្ដុំដោយសន្តិភាព ប្រែទៅជាហិង្សាបន្តិចម្ដងៗនៅចំខួបទី២២ នៃការផ្ទេរការគ្រប់គ្រងហុងកុងទៅឲ្យចិន។ ប្រមុខទីក្រុងហុងកុង Carrie Lam បានថ្កោលទោសទង្វើរបស់បាតុករ តែរំពឹងថា ស្ថានការណ៍នឹងវិលទៅរកប្រក្រតីឡើងវិញ។
ខួបទី២២ នៃការប្រគល់ទឹកដីហុងកុងទៅឲ្យចិនពីសំណាក់អង់គ្លេស ធ្វើឡើងពោរពេញដោយហិង្សាមិនធ្លាប់មាន។ នៅថ្ងៃទី១ ខែកក្កដា បាតុករជាច្រើនពាន់នាក់ដែលភាគច្រើនជាយុវជនក្មេងបានឡោមព័ទ្ធអាគារសភាទីក្រុងនេះក្នុងគោលដៅទាមទារឲ្យបោះចោលសំណើច្បាប់ធ្វើបត្យាប័នជាមួយចិនទាំងស្រុង ខណៈបច្ចុប្បន្ន សំណើច្បាប់នេះ ត្រូវបានព្យួរទុកដោយគ្មានការកំណត់អ្វីទាំងអស់។ ការណ៍នេះមិនធ្វើឲ្យបាតុករសប្បាយចិត្តឡើយ។
បន្ទាប់ពីឡោមព័ទ្ធពេញមួយថ្ងៃ បាតុករក៏បានសម្រុកចូលអាគារសភាទីក្រុងនេះ។ ស្របពេលដែលប៉ូលិសបានដកថយដើម្បីបញ្ចៀសការប៉ះទង្គិចធ្ងន់ធ្ងរ បាតុករវ័យក្មេងមានពាក់ម៉ាស់ និងមួកពណ៌លឿងផងនោះ បានចូលអុកឡុកអាគារដ៏សំខាន់នេះ និងបានបំផ្លាញទ្រព្យសម្បត្តិជាច្រើន។ ក្នុងអាគារ បាតុករនាំគ្នាហែករូបថតមេដឹកនាំហុងកុង លើកទង់ហុងកុងសម័យអាណានិគមក្នុងសាលប្រជុំធំ និងបាញ់ថ្នាំជាអក្សរផ្សេងដូចជា ហុងកុងមិនមែនជាចិនជាដើម។
នេះជារឿងមិនធ្លាប់មានឡើយនៅហុងកុង តែវាបង្ហាញពីការជំទាស់ដាច់ខាតរបស់ប្រជាជនទីក្រុងនេះ ពិសេសយុវជនក្មេងដែលមានការមិនពេញចិត្តការលូកលាន់កាន់តែខ្លាំងពីសំណាក់ទីក្រុងប៉េកាំង។ បាតុករម្នាក់វ័យ២៦ឆ្នាំបានប្រាប់ទីភ្នាក់ងារព័ត៌មាន AFP ថា៖ «យើងបានដើរក្បួន ហើយអង្គុយតវ៉ា ប៉ុន្តែរដ្ឋាភិបាលមិនស្ដាប់សោះ។ ដូចនេះ យើងត្រូវតែបង្ហាញរដ្ឋាភិបាលថា យើងឈប់អង្គុយ ហើយមិនធ្វើអ្វីសោះទៀតឡើយ។»
ប្រធានប្រតិបត្តិហុងកុង Carrie Lam បានធ្វើសន្និសីទសារព័ត៌មានបន្ទាន់មួយនៅព្រឹកថ្ងៃទី២ ខែកក្កដានេះ ដោយបានបង្ហាញការខកចិត្តចំពោះសមកម្មភាពហិង្សារបស់បាតុករ។ ទោះទទួលស្គាល់ថា បាតុកម្មចាប់ផ្ដើមដោយអហិង្សាក្ដី លោកស្រី Lam ដែលត្រូវបាតុករទាមទារឲ្យចុះចេញនោះ និយាយថា ព្រឹត្តិការណ៍ថ្ងៃទី១ ខែកក្កដា ជារឿងគួរឲ្យភ្ញាក់ផ្អើល តែសង្ឃឹមថា សង្គមហុងកុង នឹងវិលទៅរកប្រក្រតីភាពឡើងវិញនៅពេលឆាប់ៗ។
ឯរឿងថា រដ្ឋាភិបាលមិនស្ដាប់តាមការទាមទាររបស់បាតុករនោះ លោកស្រី Lam បញ្ជាក់ថា វាមិនមែនជាការពិតដែលនិយាយថា រដ្ឋាភិបាលបានឆ្លើយតបតាមការទាមទារនោះ ប៉ុន្តែអាជ្ញាធរគ្រាន់តែមិនធ្វើតាមការទាមទារទាំងអស់ដោយមានមូលហេតុត្រឹមត្រូវ។ ជុំវិញសំណើច្បាប់ធ្វើបត្យាប័នវិញ លោកស្រីប្រធានប្រតិបត្តិពន្យល់ថា នឹងស្លាប់ទៅវិញដោយឯកឯង ពេលអាណត្តិរបស់សភាចប់នៅឆ្នាំ២០២០ ដោយមិនចាំបាច់ដកចេញឡើយ៕
Tag:
ហុងកុង
ចិន
© រក្សាសិទ្ធិដោយ thmeythmey.com
