អត្ថបទពាណិជ្ជកម្ម
សាលាអន្តរជាតិ វេសវីយូ កម្ពុជា ប្រកាសបើកដំណើរការផ្លូវការ និងពិធីប្រគល់សញ្ញាបត្របញ្ចប់ថ្នាក់មត្តេយ្យនៃសាលាអន្តរជាតិ លើននីង ចាំងហ្គល
×![]()
ដោយ: ថ្មីៗ
សាលាអន្តរជាតិ វេសវីយូ កម្ពុជា ដែលជាសាលាកម្រិតមធ្យមសិក្សាបន្តពីសាលាអន្តរជាតិ លើននីង ចាំងហ្គល បានប្រារព្ធពិធីប្រកាសដាក់ឲ្យដំណើរការជាផ្លូវការ,ពិធីប្រគល់សញ្ញាបត្រ និងការសម្តែងសិល្បៈរបស់សិស្សានុសិស្ស ដើម្បីប្រមូលថវិកាបរិច្ចាគជូនមន្ទីរពេទ្យគន្ធបុប្ផា នៅក្នុងពេលជាមួយគ្នាតែមួយតែម្តង។ ពិធីដ៏ឱឡារិកនោះបានប្រព្រឹត្តទៅ នាថ្ងៃសៅរ៍ ទី២៩ ខែមិថុនា នៅសណ្ឋាគារ សូហ្វីតែល ភ្នំពេញ ភូគីត្រា ក្រោមអធិបតីលោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។
សាលាអន្តរជាតិ វេសវីយូ កម្ពុជា ឈរលើស្តង់ដារការអប់រំប្រកបដោយគុណភាពពិត និងសម្រួចសិស្សានុសិស្ស ឲ្យមានសមត្ថភាពប្រកួតប្រជែងទាំងក្នុងស្រុក និងលើឆាកអន្តរជាតិ។ កម្មវិធីសិក្សារបស់សាលាអន្តរជាតិ វេសវីយូ កម្ពុជាមានលក្ខណៈល្អពិសេស ដោយការបូកបញ្ចូលរួមគ្នារវាងកម្មវិធី សិក្សាអន្តរជាតិពីសហរដ្ឋអាមេរិក (The American Common Core Standards) និងការដាក់បញ្ចូលការសិក្សាភាសាខ្មែរ ប្រវត្តិសាស្ត្រ និងវប្បធម៌ ក្នុងម៉ោងសិក្សារៀងរាល់សប្តាហ៍ ដើម្បីឲ្យសិស្សទទួលបាននូវស្តង់ដារ ការអប់រំតាមបែបអន្តរជាតិ និងរក្សាបាននូវអត្តសញ្ញាណជាតិខ្មែរ។ យើងមាននាយិកាកម្មវិធីសិក្សា និងក្រុមគ្រូបង្រៀន សុទ្ធតែមានអាជ្ញាបណ្ណបង្រៀន និងបទពិសោធន៍បង្រៀនមធ្យមសិក្សា លើសពី១០ឆ្នាំ មកពីសហរដ្ឋអាមេរិក និងក្រៅប្រទេស។
សូមបញ្ជាក់ផងដែរថា កាលពីដើមខែមិថុនានេះ សាលាបានទទួលអាជ្ញាបណ្ណ ទទួលស្គាល់ពីក្រសួងអប់រំ យុវជន និងកីឡា លើកម្មវិធីសិក្សាអន្តរជាតិ។ បច្ចុប្បន្ននេះ សាលាអន្តរជាតិ វេសវីយូ កម្ពុជា គឺជាបេក្ខភាពទទួលស្គាល់គុណភាពស្តង់ដារការអប់រំ ពីស្ថាប័នវាយតម្លៃគុណភាពអប់រំរបស់សាលាអន្តរជាតិ ដើម្បីបើកឱកាសឲ្យសិស្សានុសិស្សសាលាវេសវីយូ ចូលរៀននៅសកលវិទ្យាល័យល្បីៗ នៅលើពិភពលោក។
បច្ចុប្បន្ន សាលាអន្តរជាតិ វេសវីយូ កម្ពុជា មានទីតាំងនៅជាប់សាលាអន្តរជាតិ លើននីង ចាំងហ្គល សាខាបឋមសិក្សា ដែលមានអាស័យដ្ឋាននៅផ្ទះលេខ ២៥៤AK ផ្លួវ៥៩៨ សង្កាត់ទួលសង្កែ ខណ្ឌឫស្សីកែវ។ សូមបញ្ជាក់ថា សិស្សានុសិស្សសាលាអន្តរជាតិ វេសវីយូ កម្ពុជា នឹងចាប់ផ្តើមចូលរៀននៅដើមខែសីហា ឆ្នាំ២០១៩នេះហើយ។
ទន្ទឹមគ្នានេះដែរ សាលាអន្តរជាតិ វេសវីយូ កម្ពុជាក៏កំពុងសាងសង់ទីតាំងថ្មីទី២ របស់ខ្លួននៅលើផ្ទៃដីធំជាង ១ម៉ឺនម៉ែត្រការេ និងចម្ងាយត្រឹមតែ ៥ នាទី ពីផ្សារទំនើបអ៊ីអន ម៉ល សែនសុខ។ ទីតាំងថ្មីនេះនឹងមានបំពាក់នូវបរិក្ខារសិក្សាទំនើប តាមស្តង់ដារការសិក្សាអន្តរជាតិ និងអាចទទួលសិស្សបានលើសពី ១,០០០នាក់ ព្រមទាំងមានអាងហែលទឹក សាលហាត់កីឡា សាលប្រជុំ ដែលអាចទទួលមនុស្សលើសពី ៣០០នាក់ កន្លែង ស្នាក់នៅរបស់បុគ្គលិក និងសិស្សានុសិស្សផងដែរ។ ទីតាំងថ្មីនេះ នឹងជួយលើកកិត្តិយសសាលាអន្តរជាតិ វេសវីយូ កម្ពុជា ឲ្យមានភាពប្រកួតប្រជែង ជាមួយសាលាអន្តរជាតិល្បីៗផ្សេងទៀតនៅក្នុងតំបន់។
លើសពីនេះទៅទៀត ក្នុងទិវាដ៏វិសេសនេះ យើងទាំងអស់គ្នា ប្រារព្ធពិធីអបអរសាទរចំពោះសមិទ្ធផលដ៏ធំធេងរបស់សិស្សានុសិស្ស ដែលបានបញ្ចប់ការសិក្សាកម្រិតថ្នាក់មត្តេយ្យ នៅសាលាអន្តរជាតិ លើននីង ចាំងហ្គល ដោយជោគជ័យ។ លទ្ធផលជោគជ័យដ៏ធំធេងដូចថ្ងៃនេះសម្រេចបាន គឺដោយសារតែមានការគាំទ្រ និងការសហការដ៏ល្អ ពីអាណាព្យាបាលគ្រប់រូប និងការប្តេជ្ញាចិត្តធ្វើការដ៏មោះមុត របស់បុគ្គលិកនៅសាលាអន្តរជាតិ លើននីង ចាំងហ្គលទាំងអស់ ដែលតែងតែព្យាយាមអស់ពីសមត្ថភាព ទាំងកម្លាំងកាយ និងចិត្ត ដើម្បីផ្តល់ការអប់រំដ៏ល្អមួយ ដែលស្របតាមបទដ្ឋានគុណភាពខ្ពស់ និងមើលថែទាំសិស្សានុសិស្សគ្រប់រូប ឲ្យមានសុវត្ថិភាព សុខុមាលភាព និងភាពសប្បាយរីករាយគ្រប់ពេលវេលា។
ដើម្បីចូលរួមចំណែកដល់សុខុមាលភាពសង្គម និងដើម្បីបណ្តុះទឹកចិត្តសប្បុរសធម៌ និងវប្បធម៌នៃការចែករំលែក ដល់សិស្សានុសិស្សតាំងពីវ័យក្មេងនោះ សាលាអន្តរជាតិ លើននីង ចាំងហ្គល ក៏បានផ្តួចផ្តើមកម្មវិធីប្រមូលថវិកាដោយក្នុងថ្ងៃនេះ។ ថវិកាសរុបទទួលបានពីការលក់សំបុត្រ ទស្សនាការសម្តែងសិស្សានុសិស្សបានចំនួន $5,000 និងថវិកាពីថ្នាក់ដឹកនាំសាលាអន្តរជាតិ វេសវីយូ កម្ពុជា និងសាលាអន្តរជាតិ លើននីង ចាំងហ្គលចំនួន $4,000 សរុបទាំងអស់ចំនួន $9,000 នៅក្នុងឆ្នាំនេះ ដើម្បីយកទៅផ្តល់ជូនដល់មន្ទីរពេទ្យគន្ធបុប្ផា។ មកទល់ពេលនេះ សហគមន៍លើននីង ចាំងហ្គល បានចូលរួមបរិច្ចាគថវិកា សរុបជាង $30,000 ជូនដល់មន្ទីរពេទ្យគន្ធបុប្ផា ដើម្បីជួយសង្គ្រោះជីវិតកុមារត្រូវការជំនួយជាច្រើននាក់។
លោក លី វីរៈ ប្រធានក្រុមប្រឹក្សាភិបាល នៃសាលាអន្តរជាតិ វេសវីយូ កម្ពុជា និងសាលាអន្តរជាតិ លើននីង ចាំងហ្គល និងតំណាងឲ្យបុគ្គលិកទាំងអស់ សូមថ្លែងអំណរអរគុណដ៏ជ្រាលជ្រៅ ចំពោះមាតាបិតា និងអាណាព្យាបាលគ្រប់រូប ដែលពួកគាត់បានផ្តល់នូវសេចក្តីទុកចិត្តដ៏ខ្លាំងបំផុត មកលើសាលាយើងខ្ញុំ និងបានផ្តល់ឱកាសឲ្យសាលាបានមើលថែរក្សា និងបង្រៀនបុត្រធីតារបស់លោកអ្នក តាំងពីដើមរហូតមកដល់ថ្ងៃនេះ និងបន្តទៅថ្ងៃអនាគតទៀត។ សាលាសូមប្តេជ្ញាចិត្តយ៉ាងមោះមុតថា នឹងបន្តព្យាយាមបន្ថែមទៀត និងឲ្យអស់ពីសមត្ថភាព ទាំងកម្លាំងកាយចិត្ត ក្នុងការបណ្តុះបណ្តាលការអប់រំប្រកបដោយគុណភាព ជូនដល់បុត្រធីតាលោកអ្នក ដើម្បីឲ្យពួកគេមានជំនឿចិត្តលើខ្លួនឯង មានវិន័យ សីលធម៌ ស្គាល់ពីវប្បធម៌ខ្មែរ និងស្រលាញ់ប្រទេសកំណើត ព្រមជាមួយការទទួលបានការអប់រំទូលំទូលាយ តាមកម្មវិធីសិក្សាដែលទទួលស្គាល់លើពិភពលោក និងមានសមត្ថភាពពិតប្រាកដ ក្នុងការប្រកួតប្រជែងលើឆាកជាតិ និងអន្តរជាតិ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
