លោកត្រាំ ថា អុីរ៉ង់ កំពុងលេងជាមួយភ្លើង ក្រោយចម្រាញ់អ៊ុយរ៉ាញ៉ូមលើសកម្រិតកំណត់

អន្តរជាតិ

លោកត្រាំ ថា អុីរ៉ង់ កំពុងលេងជាមួយភ្លើង ក្រោយចម្រាញ់អ៊ុយរ៉ាញ៉ូមលើសកម្រិតកំណត់

02, Jul 2019 , 2:06 pm

រូបភាព

លោកប្រធានាធិបតីអាមេរិក ដូណាល់ ត្រាំ (ប្រភពរូប៖ AFP) និងមេដឹកនាំកំពូលអ៊ីរ៉ង់ Hassan Rouhani

ដោយ:

ប្រធានាធិបតីអាមេរិក លោក ដូណាល់ ត្រាំ បានព្រមាននៅថ្ងៃទី១ កក្កដា ថា អ៊ីរ៉ង់កំពុលលេងជាមួយភ្លើង ក្រោយក្រុង តេហេរ៉ង់ ប្រកាសថា ខ្លួន បានចម្រាញ់សារធាតុអ៊ុយរ៉ាញ៉ូមលើសកម្រិតកំណត់ ដែលមានចែងក្នុងកិច្ចព្រមព្រៀងនុយក្លេអ៊ែរ។ ក្រុងវ៉ាស៊ីនតោន បានបោះបង់កិច្ចព្រមព្រៀងនេះ កាលពីឆ្នាំ២០១៨កន្លងទៅ។

សារព័ត៌មានរដ្ឋអ៊ីរ៉ង់ បានដកស្រង់សំដីរបស់រដ្ឋមន្ត្រីការបរទេស Mohammad Javad Zarif ដោយបញ្ជាក់នៅថ្ងៃចន្ទទី០១ ខែកក្កដា ថា បរិមាណកំណត់លើការផ្គត់ផ្គង់នៃសារធាតុអ៊ុយរ៉ាញ៉ូម ចម្រាញ់ត្រឹមចំនួន ៣,៦៧ភាគរយ ឬស្មើនឹង ៣០០គីឡូក្រាម ដែលជាកម្រិតតម្រូវសម្រាប់ថាមពលនុយក្លេអ៊ែរស៊ីវិល ត្រូវបានល្មើស។

«ជំហានបន្ទាប់របស់យើង នឹងចាប់ផ្តើមចម្រាញ់សារធាតុអ៊ុយរ៉ាញ៉ូមឲ្យលើសពី ៣,៦៧ភាគរយ ដែលអនុញ្ញាតក្រោមកិច្ចព្រមព្រៀង»។ លោក Zarif បកស្រាយបែបនេះ ដោយបន្ថែមថា សហភាពអឺរ៉ុបបានបរាជ័យក្នុងការបំពេញតាមការសន្យារបស់ពួកគេ ពាក់ព័ន្ធនឹងកិច្ចការពារផលប្រយោជន៍របស់អ៊ីរ៉ង់ក្រោមកិច្ចព្រមព្រៀងនុយក្លេអ៊ែរនេះ។

យ៉ាងណាមិញ លោករដ្ឋមន្ត្រីការបរទេសអ៊ីរ៉ង់ Zarif ក៏បានសង្កត់ធ្ងន់ថា វិធានការរបស់ក្រុង តេហេរ៉ង់ អាចត្រូវដកហូតវិញ ប្រសិនបើសហភាពអឺរ៉ុប ចាប់ផ្តើមគោរពតាមការតាំងចិត្តរបស់ពួកគេចំពេាះកិច្ចព្រមព្រៀងនុយក្លេអ៊ែរ ដែលស្គាល់ជាផ្លូវការថា JCPA ។

តាមប្រភពព័ត៌មានដដែល អ្នកនាំពាក្យក្រសួងការបរទេសអ៊ីរ៉ង់ បញ្ជាក់ឲ្យដឹងថា ការចម្រាញ់សារធាតុអ៊ុយរ៉ាញ៉ូមលើសបរិមាណកំណត់ ៣,៦៧ភាគរយ នឹងចាប់ផ្តើមក្នុងរយៈ១០ថ្ងៃ ប្រសិបើមហាអំណាចអឺរ៉ុប ពុំចាត់ចំណាត់ការចាំបាច់ណាមួយ ដើម្បីអនុវត្តយន្តការថ្មីរបស់ពួកគេសម្រាប់សម្របសម្រួលពាណិជ្ជកម្ម និងការពារសេដ្ឋកិច្ចអ៊ីរ៉ង់ពីឥទ្ធិពលនៃទណ្ឌកម្មអាមេរិកទេនោះ។

ទាក់ទិននឹងបញ្ហានេះ លោកប្រធានាធិបតីអាមេរិក ដូណាល់ បានប្រាប់ក្រុមអ្នកសារព័ត៌មាននៅសេតវិមានអាមេរិកថា៖«ពួកគេ ដឹងអ្វីដែលពួកគេកំពុងធ្វើ។ ពួកគេដឹងអ្វីដែលពួកគេកំពុងលេងជាមួយ ហើយខ្ញុំគិតថា ពួកគេកំពុងលេងជាមួយភ្លើង»។

ក្រៅពីសហរដ្ឋអាមេរិក អ៊ីស្រាអែល បានទទូចឲ្យរដ្ឋជាសមាជិកនៃសហភាពអឺរ៉ុបដាក់ទណ្ឌកម្មលើអ៊ីរ៉ង់ ខណៈរុស្ស៊ី បានបង្ហាញការសោកស្តោយ ប៉ុន្តែនិយាយថា ទង្វើនេះ កើតឡើងដោយសារតែសម្ពាធរបស់សហរដ្ឋអាមេរិកដែលបានជំរុញឲ្យកិច្ចព្រមព្រៀងនុយក្លេអ៊ែរនេះ ឆ្ពោះទៅរកការបាត់បង់។

ដោយឡែក ចក្រភពអង់គ្លេស បានស្នើឲ្យអ៊ីរ៉ង់បញ្ចៀសការដើរចេញឆ្ងាយពីកិច្ចព្រមព្រៀងដ៏មានសារៈសំខាន់មួយនេះ ហើយអង្គការសហប្រជាជាតិ បានទាមទារឲ្យក្រុងតេហេរ៉ង់ប្រកាន់ខ្ជាប់ទៅនឹងការតាំងចិត្តដ៏មុតមាំរបស់ខ្លួនក្រោមកិច្ចព្រមព្រៀងនេះ។

សូមបញ្ជាក់ថា សហរដ្ឋអាមេរិក បានដកខ្លួនចេញពីកិច្ចព្រមព្រៀងអ៊ីរ៉ង់ កាលពីឆ្នាំមុន ព្រមទាំងដាក់ទណ្ឌកម្មធ្ងន់ៗលើការនាំចេញប្រេងដ៏សំខាន់ និងការជួញដូររូបិយវត្ថុរបស់អ៊ីរ៉ង់ ក៏ដូចជាវិស័យចម្បងផ្សេងៗទៀត ។

រដ្ឋាភិបាលក្រុង តេហេរ៉ង់ ដែលព្យាយាមដាក់សម្ពាធលើភាគីសេសសល់ក្នុងកិច្ចព្រមព្រៀងនុយក្លេអ៊ែរ បានប្រកាសកាលពីថ្ងៃទី ៨ ខែឧសភា ថា ខ្លួន នឹងលែងគោរពតាមបរិមាណកំណត់លើការចម្រាញ់សារធាតុអ៊ុយរ៉ាញ៉ូមខ្លួន ដែលមានចែងក្នុងកិច្ចព្រមព្រៀង។ លើសពីនេះ អ៊ីរ៉ង់ ក៏បានគំរាមបោះបង់ការតាំងចិត្តក្នុងកិច្ចព្រមព្រៀងនុយក្លេអ៊ែរ ប្រសិនបើភាគីហត្ថលេខីផ្សេងទៀត រួមមាន ចក្រភពអង់គ្លេស ចិន បារាំង អាល្លឺម៉ង់ និងរុស្ស៊ី ជួយខ្លួនលើបញ្ហាទណ្ឌកម្មអាមេរិក ជាពិសេស ការលក់ប្រេង៕