កីឡាជាតិ
ជាតិ
ប៉ូលិសនាំកីឡាករជប៉ុន Tomohiro Masaki មកពង្រឹងតំបន់ការពារ ខណៈ Booysen Shane ចាកចេញ កីឡាករ Booysen Shane (ឆ្វេង) និងកីឡាករ Masaki
× ក្លិបបាល់ទាត់អគ្គស្នងការដ្ឋាននគរបាលជាតិ(ប៉ូលិស)បាននាំចូលកីឡាករជប៉ុន Tomohiro Masaki អតីតកីឡាកររបស់អាស៊ីអឺរ៉ុប ដើម្បីពង្រឹងតំបន់ការពារ សម្រាប់ជើងទី២ពានរង្វាន់ក្របខណ្ឌមិត្តហ្វូនខេមបូឌានលីគ ដែលចាប់ផ្តើមប្រកួតនៅចុងសប្តាហ៍នេះ។ ខ្សែប្រយុទ្ធអាហ្វ្រិកខាងត្បូង Booysen Shane នឹងចាកចេញពីក្រុមនេះ ក្រោយរួមរស់បានពាក់កណ្តាលរដូវកាល។
ខ្សែការពារជប៉ុន Tomohiro Masaki ដែលទ័ពទើបនាំចូល ជាអតីតកីឡាករអាស៊ីអឺរ៉ុប ដែលបានចែកគ្នាក្រោយចប់ការប្រកួតជើងទី១រដូវកាលឆ្នាំ២០១៩កាលពីពេលថ្មីៗ។ កីឡាកររូបនេះ បានចំណាយពេលជិត៣ឆ្នាំរួមរស់ជាមួយអាស៊ីអឺរ៉ុប ក្រោយផ្ទេរពីក្លិបអង្គរថាយហ្គឺរនៅឆ្នាំ២០១៧។
Masaki បានមកកាន់ទឹកដីកម្ពុជានៅឆ្នាំ២០១៤ ដោយចូលរួមជាមួយក្លិបត្រាយអាស៊ី (អង្គរថាយហ្គឺរបច្ចុប្បន្ន) តែក្រោយរួមរស់បាន៣រដូវកាលជាមួយក្លិបមានថ្នាក់ដឹកនាំជាជនជាតិជប៉ុនមួយនេះ រូបគេ បានសម្រេចចិត្តចាកចេញទៅចូលរួមជាអាស៊ីអឺរ៉ុប។ ប៉ុន្តែក្រោយរួមរស់បានជាង២រដូវកាល ខ្សែការពាររូបនេះ ក៏បានចាកចេញទៅចូលរួមជាមួយប៉ូលិសនៅពាក់កណ្តាលរដូវកាលនេះតែម្តង។
ទន្ទឹមនឹងវត្តមានរបស់ខ្សែការពារជនជាតិជប៉ុនខាងលើ ខ្សែប្រយុទ្ធអាហ្វ្រិកខាងត្បូង Booysen Shane បានសរសេរសារលើទំព័រហ្វេសប៊ុកផ្លូវការរបស់ខ្លួនថា រូបគេនឹងចាកចេញពីក្រុមអគ្គស្នងការដ្ឋាននគរបាលជាតិក្នុងពេលឆាប់ៗនេះ។ ប៉ុន្តែខ្សែប្រយុទ្ធវ័យ៣០ឆ្នាំរូបនេះ មិនបានបញ្ជាក់ពីមូលហេតុនៃការចាកចេញ និងក្លិបថ្មីដែលត្រូវចូលរួមក្នុងជើងទី២ឡើយ។
ពាក់ព័ន្ធព័ត៌មានការចាកចេញរបស់កីឡាកររូបនេះ យើងមិនទាន់ឃើញក្លិបឈរលេខរៀងទី១០បណ្តោះអាសន្នមួយនេះ បញ្ជាក់ជាផ្លូវការនៅឡើយទេ។ សម្រាប់១៣ប្រកួតកន្លងមក ប៉ូលិសទទួលបានជ័យជម្នះ៤លើក ស្មើ១ និងចាញ់៨ ដោយពួកគេបានរបូតគ្រាប់បាល់៣៤គ្រាប់ ហើយទាត់ចូលគេបាន៣៣គ្រាប់៕
Tag:
ប៉ូលិស
Cambodian League 2019
Booysen Shane
Tomohiro Masaki
© រក្សាសិទ្ធិដោយ thmeythmey.com