(តូក្យូ ថ្ងៃទី១ ខែកក្កដា ឆ្នាំ២០១៩)៖ លោក Nguyen Xuan Phuc នាយករដ្ឋមន្ត្រីវៀតណាម និងប្រតិភូជាន់ខ្ពស់វៀតណាមជាច្រើននាក់ បានចូលរួមជាអធិបតីក្នុងកម្មវិធីប្រកាសដំណើរការផ្លូវហោះហើរថ្មី ២ របស់យន្តហោះ Vietjet Air ទៅកាន់ប្រទេសជប៉ុន។ ផ្លូវហោះហើរថ្មីទាំង២នេះ គឺពីទីក្រុងហូជីមិញ ទៅកាន់ទីក្រុងតូក្យូ (អាកាសយានដ្ឋាន Narita) និងពីទីក្រុង Da Nang ទៅកាន់អាកាសយានដ្ឋាន Haneda ទីក្រុងតូក្យូ។
ព្រឹត្តិការណ៍នេះ បានប្រព្រឹត្តទៅអំឡុងពេលដំណើរទស្សនកិច្ចផ្លូវការ របស់នាយករដ្ឋមន្ត្រីវៀតណាម ទៅកាន់ប្រទេសជប៉ុន ដើម្បីចូលរួមកិច្ចប្រជុំកំពូល G20។ ក្នុងកម្មវិធីសម្ពោធផ្លូវហោះហើរថ្មីនេះ លោក Nguyen Xuan Phuc នាយករដ្ឋមន្ត្រីរបស់វៀតណាម មានប្រសាសន៍ថា៖ «Vietjet ទើបតែត្រូវបានបង្កើតឡើងក្នុងរយៈពេល៣ ទៅ៤ឆ្នាំប៉ុណ្ណោះ ប៉ុន្តែបានអភិវឌ្ឍឥតឈប់ឈរ ដោយមានកំណត់ត្រាយ៉ាងល្អ លើផ្នែកសុវត្ថិភាព និងសេវាប្រកបដោយគុណភាពខ្ពស់។ ជាមួយនឹងការពង្រីកបណ្តាញហោះហើរក្នុងស្រុក និងអន្តរជាតិ រួមជាមួយយន្តហោះទំនើប និងថ្មីៗនេះ Vietjet នឹងក្លាយជាក្រុមហ៊ុនអាកាសចរណ៍ដ៏រឹងមាំមួយ ក្នុងតំបន់នេះ»។
ចូលរួមក្នុងនាមជាអធិបតីក្នុងព្រឹត្តិការណ៍នេះ ក៏មានប្រតិភូជាន់ខ្ពស់ជាច្រើនរូបរបស់ជប៉ុនផងដែរ ក្នុងនោះក៏មានលោក Nikai Toshihiro អគ្គលេខាធិការគណបក្សសេរីនិយម និងជាប្រធានសម្ព័ន្ធមិត្តរដ្ឋសភាជប៉ុន-វៀតណាម និងលោកស្រី Satsuki Katayama រដ្ឋមន្ត្រីស្តារទំនាក់ទំនងក្នុងតំបន់ និងមន្ត្រីតំណាងឲ្យអាជ្ញាធរទេសចរណ៍ជាច្រើននាក់ផ្សេងទៀត។
លោក Nikai Toshihiro អគ្គលេខាធិការគណបក្សសេរីនិយម និងជាប្រធានសម្ព័ន្ធមិត្តរដ្ឋសភាជប៉ុន-វៀតណាម បានមានប្រសាសន៍ថា ការបើកឲ្យដំណើរការនូវផ្លូវហោះហើរថ្មី២នេះរបស់ Vietjet ជាផ្នែកមួយដែលបង្ហាញពីទំនាក់ទំនងយ៉ាងជិតស្និទ្ធរវាងប្រទេសទាំង២។ លោក Nikai Toshihiro បន្ថែមថា៖«យើងអាចនិយាយបានថា វិស័យទេសចរណ៍ ដើរតួនាទីយ៉ាងសំខាន់ក្នុងការអភិវឌ្ឍទំនាក់ទំនងរវាងប្រទេសទាំង២។ លោក សង្ឃឹមថា Vietjet នឹងបន្តចូលរួមជាចំណែកកាន់តែច្រើនបន្ថែមទៀត ហើយសង្ឃឹមថាភ្នាក់ងារអាកាសចរណ៍របស់ជប៉ុន នឹងគាំទ្រកាន់ខ្លាំង ចំពោះការអភិវឌ្ឍរបស់ក្រុមហ៊ុនអាកាសចរណ៍មួយនេះ»។
បច្ចុប្បន្ន ក្រុមហ៊ុនអាកាសចរណ៍ Vietjet ប្រតិបត្តិការហោះហើរដោយផ្ទាលចំនួន៣ រវាងប្រទេសវៀតណាម និងជប៉ុន ជាមួយនឹងការហោះហើរ ពីទីក្រុងហូជីមិញ/ហាណូយ ទៅកាន់ទីក្រុង Osaka និងការហោះហើរដែលភ្ជាប់ទីក្រុងហាណូយ ជាមួយទីក្រុងតូក្យូ (អាកាសយានដ្ឋាន Narita)។ ផ្លូវហោះហើរថ្មី ពីទីក្រុងហូជីមិញ ទៅកាន់ទីក្រុងតូក្យូ (អាកាសយានដ្ឋាន Narita)នេះ នឹងប្រតិបត្តិការហោះហើរទៅ-មក ជាប្រចាំថ្ងៃ ចាប់ពីថ្ងៃទី១២ ខែកក្កដា ឆ្នាំ២០១៩ តទៅ។ ផ្លូវហោះហើរពីទីក្រុង Da Nang ទៅកាន់ទីក្រុងតូក្យូ (អាកាសយានដ្ឋាន Haneda) នឹងប្រតិបត្តិសេវាហោះហើរទៅ-មក ជាប្រចាំថ្ងៃ ចាប់ពីថ្ងៃទី២៦ ខែតុលា ឆ្នាំ២០១៩ តទៅ។
ថិរវេលានៃការហោះហើរលើផ្លូវថ្មីទាំងនេះ មានរយៈពេលប្រមាណ ៥ម៉ោង និង៣០នាទី ក្នុង១ជើង។ ការហោះហើរ នឹងចេញដំណើរពីអាកាសយានដ្ឋាន Da Nang នៅម៉ោង ៦:១០ ល្ងាច និងចុះចតនៅទីក្រុងតូក្យូ នៅម៉ោង១:០០ រំលងអធ្រាត្រ ខណៈដែលការហោះហើរពីទីក្រុងតូក្យូ នឹងចេញដំណើរនៅម៉ោង ២:៣០ ទៀបភ្លឺ ហើយទៅដល់ទីក្រុង Da Nang នៅម៉ោង ៦:៤០ ព្រឹក (ម៉ោងទាំងអស់ គឺជាម៉ោងក្នុងស្រុក)។
លោក Nguyen Thi Thuy Binh អនុប្រធានក្រុមហ៊ុនអាកាសចរណ៍ Vietjet មានប្រសាសន៍ថា៖ ការពង្រីកឥតឈប់ឈរទៅលើបណ្តាញហោះហើរ របស់ Vietjet ទៅកាន់ប្រទេសជប៉ុន នឹងជួយឲ្យប្រជាពលរដ្ឋរបស់ប្រទេសទាំង២ មានជម្រើសកាន់តែច្រើន សម្រាប់ការធ្វើដំណើរ ជាលក្ខខណ្ឌអាជីវកម្ម និងទស្សនកិច្ចផ្សេងៗ។ លោក Nguyen Thi Thuy Binh បន្ថែមថា ក្នុងពេលឆាប់ៗខាងមុខនេះ Vietjet នឹងបន្តផ្តល់ឱកាសនៃការហោះហើរកាន់តែច្រើនបន្ថែមទៀត ទៅកាន់រដ្ឋពលរដ្ឋក្នុងតំបន់ និងអ្នកដំណើរអន្តរជាតិទាំងអស់ ក៏ដូចជាបទពិសោធនៃការហោះហើរដ៏រំភើបជាច្រើន ដែលភ្ជាប់រវាងប្រទេសទាំង២។ លោក Nguyen Thi Thuy Binh បញ្ជាក់បន្ត៖«អ្នកដំណើរទាំងអស់ នឹងទទួលការធ្វើដំណើរដ៏រីករាយលើយន្តហោះថ្មី ក៏ដូចជាទទួលបានការបម្រើជូនអាហារដ៏ឈ្ងុយឆ្ងាញ់ និងក្តៅៗលើយន្តហោះ ពីបុគ្គលិកប្រកបដោយភាពអត់ធ្មត់ និងរួសរាយរាក់ទាក់ ក៏ដូចជាភាពរីករាយនឹងកម្មវិធីកម្សាន្តក្នុងពេលហោះហើរ ដ៏រំភើបជាច្រើន»។
ក្នុងកម្មវិធីសម្ពោធនេះផងដែរ ថ្នាក់ដឹកនាំរបស់ក្រុមហ៊ុនអាកាសចរណ៍ Vietjet ក៏បានទទួលវិញ្ញាបនបត្រ ដើម្បីក្លាយជាសមាជិកជាផ្លូវការ របស់សហព័ន្ធអាជីវកម្មជប៉ុន ហៅកាត់ថា Keidanren ផងដែរ។ Vietjet គឺជាសហគ្រាសបរទេស និងជាក្រុមហ៊ុនអាកាសចរណ៍ មានតម្លៃទាបដំបូងគេក្នុងពិភពលោក ដែលចូលរួមក្នុងសហព័ន្ធសេដ្ឋកិច្ចធំជាងគេបំផុតក្នុងប្រទេសជប៉ុន ដែលមានសមាជិកប្រមាណ ១,៥០០ ក្នុងនោះរាប់បញ្ចូលទាំងក្រុមហ៊ុនឈានមុខគេជាច្រើន នៅប្រទេសជប៉ុន សមាគមឧស្សាហកម្មជាតិ អង្គភាពសេដ្ឋកិច្ចក្នុងតំបន់ និងសមាជិកពិសសៗជាច្រើនផ្សេងទៀត។
លោក Nguyen Xuan Phuc នាយករដ្ឋមន្ត្រីវៀតណាម បានមានប្រសាសន៍បញ្ចប់ថា៖ «ខ្ញុំសូមអបអរសាទរដល់ Vietjet ចំពោះការក្លាយជាសមាជិកផ្លូវការរបស់ Keidanren ដែលជាសហព័ន្ធអាជីវកម្មរបស់ជប៉ុន ខណៈដែលនេះ ជាសមិទ្ធផលដ៏សំខាន់មួយសម្រាប់មិនត្រឹមតែក្រុមហ៊ុន Vietjet ប៉ុណ្ណោះទេ ប៉ុន្តែក៏សម្រាប់វិស័យអាជីវកម្មជាទូទៅរបស់វៀតណាមផងដែរ»។
ផ្លូវហោះហើរថ្មីទាំង២នេះ នឹងផ្តល់នូវភាពងាយស្រួលបន្ថែមទៀត សម្រាប់ការធ្វើដំណើរមកកាន់អាស៊ីអាគ្នេយ៍ សម្រាប់អ្នកដំណើរជាភ្ញៀវទេសចរណ៍ និងជាអ្នកធ្វើជំនួញផ្សេងៗ។ ប្រជាពលរដ្ឋកម្ពុជា នឹងទទួលបានអត្ថប្រយោជន៍ពីការបើកផ្លូវហោះហើររបស់ Vietjet ពីទីក្រុងសៀមរាប ទៅកាន់ទីក្រុងហាណូយ ដើម្បីអាចធ្វើដំណើរយ៉ាងឆាប់រហ័ស និងមានតម្លៃទាប ទៅកាន់ប្រទេសជប៉ុន និងគោលដៅសំខាន់ៗជាច្រើនផ្សេងទៀតនៅអាស៊ី។ ផ្លូវហោះហើរថ្មីនេះ នឹងផ្តល់នូវភាពងាយស្រួល ក្នុងការធ្វើដំណើរទៅទស្សនកិច្ចកាន់តែច្រើនកន្លែង ថ្ងៃសម្រាកវិស្សមកាល កាន់តែមានអត្ថន័យ ឬឱកាសទៅកាន់ជប៉ុន ដែលជាប្រទេសសេដ្ឋកិច្ចធំជាងគេបំផុតរបស់ពិភពលោក កាន់តែមានភាពងាយស្រួលជាមួយនឹង Vietjet សម្រាប់អ្នកដំណើរជាពាណិជ្ជករ។ បច្ចុប្បន្ន ក្រុមហ៊ុនអាកាសចរណ៍ Vietjet ប្រតិបត្តិការហោះហើរជាប្រចាំថ្ងៃ ប្រមាណជា៤០០ជើង និងបានដឹកអ្នកដំណើរច្រើនជាង៨០លាននាក់ មកទល់ពេលនេះ។
(អត្ថបទពាណិជ្ជកម្ម)