ក្រុមហ៊ុនសំណង់ចំនួនពីរ ទទួលរងពិន័យសម្រាប់ការបំផ្លិចបំផ្លាញបំពង់បង្ហូរទឹកស្អាតក្រោមដីរបស់សិង្ហបុរី (PUB) ដែលបង្កឲ្យបាត់បង់ទឹកស្អាតសម្រាប់ផឹកច្រើនជាង ១,៦លានលីត្រ។ បរិមាណទឹកដែលបាង់បង់នេះ ស្មើនឹង ២ភាគ៣ នៃអាងហែលទឹករបស់អូឡាំពិក។
ក្នុងសេចក្តីប្រកាសព័ត៌មាននៅថ្ងៃអង្គារ ទី២ កក្កដា ភ្នាក់ងារទឹកស្អាតសិង្ហបុរី បញ្ជាក់ឲ្យដឹងថា ក្រុមហ៊ុនសំណង់ចំនួនពីរ រួមមាន Ground Instrumentation & Engineering
និង Sato Kogyo (S) ទទួលរងការផាកពិន័យជាទឹកប្រាក់ កាលពីខែមិថុនាកន្លងទៅ។ ហើយចំនួនទឹកប្រាក់ដែលត្រូវពិនិ័យគឺចាប់ពី ៣៥៣៩៥ដុល្លារ ដល់ ៣៩៨២០ដុល្លារ សម្រាប់ការធ្វើឲ្យខូចខាតដល់បំពង់បង្ហូរទឹកស្អាតក្រោមដីចំនួនពីរ ដាច់ដោយឡែកពីគ្នា ខណៈកំពុងអនុវត្តការងារសំណង់។
តាមការចុះផ្សាយរបស់ទូរទស្សន៍សិង្ហបុរី Channel News Asia ភ្នាក់ងារដដែលនេះ លើកឡើងទៀតថា នេះ ពុំមែនជាលើកទីមួយឡើយ ដែលក្រុមហ៊ុនទាំងពីរនេះ បានបង្កហេតុការណ៍នេះ ។ ក្រុមហ៊ុនទាំងពីរនេះ ត្រូវបានអាជ្ញាធរសិង្ហបុរីកាត់ទោសពីរដងមកហើយ។
ក្រុមហ៊ុនសំណង់ Sato Kogyo ទទួលរងការផាកពិន័យសម្រាប់ការបំផ្លាញបំពង់បង្ហូរទឹកស្អាតមួយកន្លែង នៅលើផ្លូវ Upper Thomson Road កាលពីថ្ងៃទី ៤ មករា ឆ្នាំ២០១៧ ។ នៅទីនោះ បំពង់បង្ហូរទឹកអង្កត់ផ្ចិត ៣០០មីលីម៉ែត្រ ត្រូវបានបំផ្លិចបំផ្លាញ ខណៈការងារសាងសង់កំពុងប្រព្រឹត្តទៅសម្រាប់ស្ថានីយ Upper Thomson និងផ្លូវរូងក្រោមដីសម្រាប់បណ្តាញរថភ្លើងអគ្គិសនី Thomson-East Coast Line ។
ការខូចខាតនេះ បង្កឲ្យរអាក់រអួលដល់ការផ្គត់ផ្គង់ទឹកស្អាតដល់ប្រជាជនសិង្ហបុរីចំនួន១៣គ្រួសារ ដែលរស់នៅក្បែរទីតាំងនោះ ព្រមទាំងបង្កឲ្យបាត់បង់ទឺកស្អាតសម្រាប់ផឹកយ៉ាងច្រើនសន្ធឹកសន្ធាប់ ដែលស្មើនឹង ៧២ម៉ឺនលីត្រ។
តាម Channel News Asia អាជ្ញាធរសិង្ហបុរី PUB បញ្ជាក់ឲ្យដឹងថា ការស៊ើបអង្កេត បង្ហាញថា ក្រុមហ៊ុន Sato Kogyo បានបរាជ័យក្នុងការផ្តល់ការគាំទ្រត្រឹមត្រូវសម្រាប់បំពង់បង្ហូរទឹក ក្រោយពីដកគំរបការពារលើផ្ទៃដីចេញ។ ក្រុមហ៊ុននេះ ពុំបានដំឡើងរចនាសម្ព័ន្ធគាំទ្រចាំបាច់នានា ដែលបង្កឲ្យបំពង់បង្ហូរទឹកនៅទីនោះរបូតចេញពីបំពង់រួម។
ម្យ៉ាងវិញទៀត ក្រុមហ៊ុនសំណង់ Sato Kogyo ក៏ធ្លាប់ត្រូវបានរងពិន័យពីមុនមកដែរ ពោលគឺកាលពីខែកក្កដា ឆ្នាំ២០១៣ ជាមួយនឹងប្រាក់ពិន័យ ២៩៤៩០ដុល្លារ សម្រាប់បំផ្លិចបំផ្លាញបំពង់បង្ហូរទឹកស្អាត នៅតាមដងផ្លូវ Bedok Reservoir ។ ចំណែក ការចោទប្រកាន់បំពង់បង្ហូរទឹកស្អាតនៅតាមដងផ្លូវ Nicoll Highway
កំពុងស្ថិតក្រោមការពិចារណា។
ដោយឡែក ក្រុមហ៊ុនសំណង់ Ground Instrumentation & Engineering ត្រូវបានកាត់ទោសចំនួនពីរករណី និងពិន័យជាប្រាក់ ក្រោយពីបង្កការខូចខាតដល់បំពង់បង្ហូរទឹកស្អាតមួយកន្លែង ខណៈកំពុងអនុវត្តការងារនៅតំបន់ Raffles Country Club ។ អំឡុងពេលប្រតិបត្តិ ម៉ាស៊ីនខួងដីរបស់ក្រុមហ៊ុននេះ បានបុកទម្លាយចំបំពង់បង្ហូរទឹកស្អាតដែលមានអង្កត់ផ្ចិត ២២០០មីលីម៉ែត្រ ដែលបង្កឲ្យបាត់បង់ទឹកសម្រាប់ផឹកចំនួន ៨៩ម៉ឺនលីត្រ ។
ក្រុមហ៊ុននេះ ទទួលរងការផាកពិន័យជាទឹកប្រាក់ចំនួន ៣៨ ៣៣៤ដុល្លារសម្រាប់ការបំផ្លាញបំពង់បង្ហូរទឹកស្អាតនេះ និង១៤៧៤ដុល្លារទៀតសម្រាប់ការអនុវត្តការងារខួងដី ដោយគ្មានលិខិតអនុញ្ញាតត្រឹមត្រូវ កាលពីថ្ងៃទី ២៧ ខែសីហា ឆ្នាំ ២០១៨។ កន្លងទៅ ក្រុមហ៊ុនសំណងនេះ ក៏ធ្លាប់ទទួលរងពិន័យពីអាជ្ញាធរសិង្ហបុរីផងដែរ កាលពីខែមិថុនា ឆ្នាំ២០១៦ ជាមួយនឹងទឹកប្រាក់ពិន័យ ២៩ ៤៩០ដុល្លារ សម្រាប់ការធ្វើឲ្យខូចខាតបំពង់បង្ហូរទឹកស្អាត ដែលមានអង្កត់ផ្ចិត ៣០០មីលីម៉ែត្រ នៅក្បែរដងផ្លូវ Bukit Timah Road និង Newton Circus ។