កីឡាអន្តរជាតិ
អន្តរជាតិ
World Cup នារី៖ ម្ចាស់ការពារជើងឯកអាមេរិកឡើងវគ្គផ្តាច់ព្រ័ត្រ ក្រោយឈ្នះអង់គ្លេស ២-១ រូបភាព៖ FIFA
× ក្រុមកីឡាបាល់ទាត់ជម្រើសជាតិនារីអាមេរិកបានយកឈ្នះអង់គ្លេស ២-១ នៅវគ្គពាក់កណ្តាលផ្តាច់ព្រ័ត្រនៃពានរង្វាន់ FIFA Women's World Cup ឆ្នាំ២០១៩ នៅរាត្រីថ្ងៃទី២ ខែកក្កដា។ អាមេរិកត្រូវឡើងទៅកាន់វគ្គផ្តាច់ព្រ័ត្រដើម្បីការពារតំណែងជើងឯករបស់ខ្លួន បន្ទាប់ពីលើកពាននេះកាលពី៤ឆ្នាំមុន។
គ្រាប់បាល់ស៊ុតបញ្ចូលទីគ្នារវាងអេមេរិក និងអង់គ្លេសសរុប៣គ្រាប់ គឺកើតឡើងនៅតង់ទី១ទាំងអស់។ ខ្សែប្រយុទ្ធ Christen Press ជាអ្នករកគ្រាប់បាល់នាំមុខឲ្យអាមេរិកនៅ១០នាទីដំបូងនៃវគ្គទី១ មុនពេល Ellen White វាយបកតាមស្មើសម្រាប់អង់គ្លេសវិញនៅ៩នាទីបន្ទាប់។ ១១នាទីបន្ទាប់មកទៀត ពោលគឺនៅនាទី៣១ ខ្សែប្រយុទ្ធឆ្នើម Alex Morgan បានសម្រេចគ្រាប់ជ័យជម្នះឲ្យអាមេរិកដើម្បីយកឈ្នះអង់គ្លេសក្នុងលទ្ធផល ២-១។
អាមេរិកដែលជាម្ចាស់ជើងឯកព្រឹត្តិការណ៍កីឡាបាល់ទាត់ពិភពលោកផ្នែកនារីច្រើនជាងគេចំនួន៣ដង នឹងត្រូវបន្តទៅស្វែងរកកំណត់ត្រាថ្មីជាលើកទី៤របស់ខ្លួននៅលើទឹកដីបារាំងសម្រាប់ឆ្នាំ២០១៩នេះ។ ម្ចាស់ការពារតំណែងជើងឯកចាស់នេះ ត្រូវរង់ចាំមើលជំនួបរវាងហូឡង់ និងស៊ុយអែត នៅថ្ងៃទី៤ ខែកក្កដា នាវេលាម៉ោង២:០០នាទីអាធ្រាត្រ [ម៉ោងនៅកម្ពុជា] ដើម្បីទៅជួបគ្នានៅវគ្គផ្តាច់ព្រ័ត្រ។
សម្រាប់អង់គ្លេស នេះជាការខកចិត្តសារជាថ្មីក្នុងការនាំក្រុមឈានទៅកាន់វគ្គផ្តាច់ព្រ័ត្រ World Cup ជាលើកដំបូង។ កំណត់ត្រាល្អបំផុតរបស់ក្រុមរហស្សនាមតោកំណាចគឺពួកគេទទួលបានចំណាត់ថ្នាក់ទី៣ម្តងប៉ុណ្ណោះកាលពីឆ្នាំ ២០១៥៕
Tag:
បាល់ទាត់
World Cup Women
© រក្សាសិទ្ធិដោយ thmeythmey.com