ភ្នំពេញ៖ អាស៊ាន កំពុងព្រួយបារម្ភពីផលប៉ះពាល់សេដ្ឋកិច្ច ដែលកើតចេញពីការចរាចរឱសថក្លែងក្លាយ និងអន់គុណភាព ។ ក្តីព្រួយបារម្ភនេះ ត្រូវបានលើកឡើងនៅក្នុងកិច្ចប្រជុំពិគ្រោះយោបល់ស្តីពី «ការពង្រឹងកិច្ចសហការក្នុងតំបន់សម្រាប់ការងារប្រយុទ្ធប្រឆាំងឱសថក្លែងក្លាយ និងអន់គុណភាព» កាលពីថ្ងៃទី១ និង២កក្កដា នៅលើទឹកដីសៀមរាប។ នេះបើតាមសេចក្តីជូនព័ត៌មានរបស់ក្រសួងសុខាភិបាល។
សមាជិកអាស៊ានទាំង១០ប្រទេស និងដៃគូពាក់ព័ន្ធ បានចាត់ទុកការចរាចរឱសថក្លែងក្លាយ និងអន់គុណភាព តាមរយៈការលក់ និងចែកចាយឱសថគ្មានប្រភពច្បាស់លាស់ ព្រមទាំងការលក់ឱសថ តាមរយៈអនឡាញនោះ វាបង្កផលប៉ះពាល់ដល់សុខភាពប្រជាពលរដ្ឋក្នុងតំបន់អាស៊ាន ប៉ះពាល់ដល់សេដ្ឋកិច្ចជាតិ និងសេដ្ឋកិច្ចក្នុងតំបន់។ របាយការណ៍របស់អង្គប្រជុំនោះ បានចាត់ទុកបញ្ហានេះ ជាបន្ទុកមួយដ៏ធ្ងន់ធ្ងរសម្រាប់បណ្ដាប្រទេសសមាជិកអាស៊ាន ដែលត្រូវរិះរកវិធានការរួមគ្នា ក្នុងការដោះស្រាយបញ្ហាដ៏ស្មុគស្មាញនេះ។
សេចក្តីជូនព័ត៌មានរបស់ក្រសួងសុខាភិបាល ដែលបានស្រង់លទ្ធផលនៃកិច្ចប្រជុំនោះ បានបញ្ជាក់ថា៖« (អង្គប្រជុំ) បានកំណត់ និងបង្ហាញពីបញ្ហាប្រឈមនានា ពាក់ព័ន្ធនឹងកម្រិតនៃការអនុវត្តច្បាប់ និងការអនុវត្តយុទ្ធសាស្ត្ររបស់អង្គការសុខភាពពិភពលោក ដើម្បីទប់ស្កាត់ការចរាចរ ការស្រាវជ្រាវ និងការឆ្លើយតបក្នុងការប្រយុទ្ធប្រឆាំងឱសថក្លែងក្លាយ និងអន់គុណភាពនៅក្នុងបណ្ដាប្រទេសសមាជិកអាស៊ាន»។
បន្ថែមពីនេះសមាជិកក្នុងអង្គប្រជុំទាំងអស់ បានចែករំលែកបទពិសោធន៍ និងកំណត់នូវសកម្មភាពសម្រាប់កិច្ចប្រឹងប្រែងរួមគ្នា ដើម្បីប្រយុទ្ធប្រឆាំងឱសថក្លែងក្លាយ និងអន់គុណភាពនេះ។ ជាពិសេសការរៀបចំផែនការសកម្មភាពរួមគ្នា សម្រាប់ការងារប្រយុទ្ធប្រឆាំងឱសថក្លែងក្លាយ នុងអន់គុណភាព ដែលត្រូវស្នើឲ្យមានការគាំទ្រពីរដ្ឋមន្ត្រីសុខាភិបាលនៃបណ្ដាប្រទេសសមាជិកអាស៊ាន នៅក្នុងកិច្ចប្រជុំលើកទី១៤ នៅខែសីហាខាងមុខ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល ចាត់ទុកការព្រួយបារម្ភរបស់សមាជិកអាស៊ានទាំងអស់នេះ គឺជាចំណុចស្នូលមួយ ដែលជំរុញឲ្យបង្កើនកិច្ចសហប្រតិបត្តិការបន្ថែមទៀត ដើម្បីប្រយុទ្ធប្រឆាំងឱសថក្លែងក្លាយ និងអន់គុណភាពក្នុងតំបន់។ បើតាមលោក វណ្ណឌីន សេចក្តីព្រាងចំណុចគន្លឹះពាក់ព័ន្ធការប្រយុទ្ធប្រឆាំងឱសថក្លែងក្លាយ និងអន់គុណភាពនេះ វាជាការប្ដេជ្ញាចិត្តរួមគ្នា ក្នុងការបង្កើនសកម្មភាពប្រយុទ្ធប្រឆាំងនឹងការគំរាមកំហែងសុខភាពសាធារណៈ ដែលមានលក្ខណៈជាសាកល។
«យើងទាំងអស់គ្នាកំពុងប្រកាន់យកនូវភាពជាដៃគូប្រទាក់ក្រឡាគ្នា តាមរយៈការបើកទ្វារសម្រាប់កិច្ចសហការ និងកិច្ចសហប្រតិបត្តិការបន្ថែមទៀត ក្នុងការប្រយុទ្ធប្រឆាំងឱសថក្លែងក្លាយ និងអន់គុណភាព ហើយបន្តពង្រឹងក្របខណ្ឌច្បាប់តាមបណ្ដាប្រទេសសមាជិកអាស៊ាន លើកកម្ពស់សមត្ថភាពមន្ត្រីជំនាញ និងមន្ត្រីអនុវត្តច្បាប់ ព្រមទាំងបន្តពង្រឹងយន្តការអភិបាលកិច្ច ពាក់ព័ន្ធការងារគ្រប់គ្រងឱសថឲ្យបានកាន់តែប្រសើរឡើងបន្ថែមទៀត»។ នេះជាការបញ្ជាក់របស់រដ្ឋលេខាធិការក្រសួងសុខាភិបាល។
ទាក់ទងនឹងបញ្ហាឱសថក្លែងក្លាយ និងអន់គុណភាពនេះ លោក Jean-Gaetan GUILLEMAUD ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប និងជានាយកក្រុមហ៊ុនZuelling Pharma ប្រចាំកម្ពុជា ធ្លាប់បាននិយាយថា ពលរដ្ឋមួយនាក់ក្នុងចំណោមប្រជាពលរដ្ឋខ្មែរ ជាង១៦លាននាក់ ត្រូវបានស្លាប់ រៀងរាល់ពេល៤ម៉ោងម្តង ដោយសារការប្រើប្រាស់ឱសថក្លែងក្លាយ។
ត្រង់ចំណុចនេះលោក Jean-Gaetan បានសង្កត់ធ្ងន់ថា ឱសថក្លែងក្លាយបានសម្លាប់មនុស្សក្នុងមួយថ្ងៃ ច្រើនជាងភេរវករសម្លាប់មនុស្សក្នុងមួយឆ្នាំ។ លោកថា អ្នកស្លាប់មានចំនួន៥ដង ដោយសារប្រើប្រាស់ឱសថក្លែងក្លាយ បើធៀបនឹងចំនួនអ្នកស្លាប់ ដោយសារតែញៀនថ្នាំ ឬការប្រើប្រាស់គ្រឿងញៀនហួសកម្រិត។ បើតាមលោក Jean-Gaetan មានឱសថ៧ក្នុងចំណោម១០មុខ លក់នៅលើទីផ្សារកម្ពុជា គឺជាឱសថក្លែងក្លាយ។ ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុបរូបនេះ បានបន្ថែមថា មានប្រជាជនជាង១លាននាក់ នៅទូទាំងពិភពលោក ត្រូវបានស្លាប់ជារៀងរាល់ឆ្នាំ ដោយសារប្រើប្រាស់ឱសថក្លែងក្លាយ៕