រដ្ឋមន្ត្រីពាណិជ្ជកម្ម ស្នើឲ្យអង្គការពាណិជ្ជកម្មអន្តរជាតិបន្តជួយដល់កម្ពុជា ដើម្បីកាត់បន្ថយភាពក្រក្រី

ជាតិ

សេដ្ឋកិច្ច

រដ្ឋមន្ត្រីពាណិជ្ជកម្ម ស្នើឲ្យអង្គការពាណិជ្ជកម្មអន្តរជាតិបន្តជួយដល់កម្ពុជា ដើម្បីកាត់បន្ថយភាពក្រក្រី

03, Jul 2019 , 9:59 pm

រូបភាព

លោក ប៉ាន សូរស័ក្កិ នាជំនួបជាមួយអគ្គនាយក WTO លោកRoberto Azevêdo

ដោយ: ភួង វ៉ាន់ថា

រដ្ឋមន្ត្រីក្រសួងពាណិជ្ជកម្ម បានស្នើសុំដល់អង្គការពាណិជ្ជកម្មអន្តរជាតិបន្តជួយដល់កម្ពុជា ដើម្បីជំរុញដល់ការអភិវឌ្ឍសេដ្ឋកិច្ច ។ ការស្នើសុំនេះធ្វើឡើងក្នុងកិច្ចប្រជុំ ក្រុមប្រឹក្សាចម្រុះលើកទី៥៣ (53rd Joint Advisory Group Meeting) នាទីស្នាក់ការអង្គការពាណិជ្ជកម្មពិភពលោក កាលពីថ្ងៃទី ២ កក្កដា ឆ្នាំ២០១៩ ក្នុងប្រទេសស្វីស។

លោក ប៉ាន សូរស័ក្តិ ដែលបានអំពាវនាវដល់អង្គការអន្តរជាតិ ឲ្យបន្តផ្តល់ជំនួយ និងគម្រោងនានាដល់កម្ពុជានោះ បាននិយាយថា ការផ្ដល់ជំនួយនេះ វាជាការជួយគាំទ្រដល់ការអភិវឌ្ឍវិស័យសេដ្ឋកិច្ចនៅកម្ពុជា ដែលអាចបង្កើនចំណូល និងជួយកាត់បន្ថយភាពក្រក្រីជាដើម។ ជាពិសេសបង្កើតការងារ សម្រាប់ប្រជាជនផងដែរ។

អមជាមួយការអំពាវនាវនេះ រដ្ឋមន្ត្រីពាណិជ្ជកម្មកម្ពុជា បាននិយាយថា កិច្ចសហប្រតិបត្តិការ និងជំនួយ ដែលបានផ្តល់ដោយមជ្ឈមណ្ឌលពាណិជ្ជកម្មអន្តរជាតិ មកកម្ពុជាកន្លងមក បានជួយគាំទ្រការអនុវត្តយុទ្ធសាស្ត្រសមាហរណកម្មពាណិជ្ជកម្ម, ការអភិវឌ្ឍន៍ធនធានមនុស្ស និងជំនាញ, ការពង្រឹងភាពប្រកួតប្រជែងរបស់សហគ្រាសធុនតូច និងមធ្យម និងការជួយដល់សហគ្រាសកម្ពុជាមួយចំនួន ក្នុងពិព័រណ៍នាំចេញ-ចូល ចិនលើកទី២ នៅទីក្រុងសៀងហៃ ក្នុងឆ្នាំ២០១៩។

ជាការឆ្លើយតបនឹងសំណើរបស់លោក ប៉ាន សូរស័ក្តិ នេះ ប្រធានមជ្ឈមណ្ឌលពាណិជ្ជកម្មអន្តរជាតិ, អង្គការពាណិជ្ជកម្មពិភពលោក និងអង្គការ UNCTAD បានបញ្ជាក់ពីជំហរបន្តសកម្មភាព និងគម្រោងនានា ក្នុងការជួយដល់ប្រទេសកំពុងអភិវឌ្ឍន៍ និងអភិវឌ្ឍន៍តិចតួច ដើម្បីជំរុញវិស័យពាណិជ្ជកម្ម តាមរយៈការផ្តល់អនុសាសន៍ និងការផ្តល់ជំនួយបច្ចេកទេស រួមទាំងហិរញ្ញវត្ថុទៀតផង។

អង្គការទាំងនេះ ប្រកាសជួយគាំទ្រដល់ប្រទេសដែលមានសេដ្ឋកិច្ចតូច និងទន់ខ្សោយ តាមរយៈការផ្តល់គម្រោងជាច្រើន ដើម្បីជំរុញការអភិវឌ្ឍ និងជួយឲ្យសម្រេចបាននូវគោលដៅអភិវឌ្ឍន៍ប្រកបដោយចីរភាពក្នុងឆ្នាំ២០៣០។ នេះបើតាមក្រសួងពាណិជ្ជកម្មកម្ពុជា ដែលស្រង់ព័ត៌មានជុំវិញកិច្ចប្រជុំខាងលើ៕