កីឡាជាតិ
ជាតិ
បឹងកេតចែកផ្លូវជាមួយកីឡាករអេស្ប៉ាញ Munoz Angel និង ស្រាំង ទិត្យឈី កីឡាករ ស្រាំង ទិត្យឈី (ឆ្វេង) និងកីឡាករ Angel ពេលចូលរួមជាមួយបឹងកេត, រូបភាពពីក្លិបបាល់ទាត់បឹងកេត
× ក្លិបបាល់ទាត់បឹងកេតបានចែកផ្លូវគ្នាជាមួយកីឡាករអេស្ប៉ាញ Carrascosa Munoz Angel និងកីឡាករ ស្រាំង ទិត្យឈី ក្រោយរួមរស់ជាមួយគ្នាបានពាក់កណ្តាលរដូវកាល។ ក្លិបជើងឯកសម័យកាលមួយនេះ មិនបានបញ្ជាក់លម្អិតពីមូលហេតុ ដែលនាំឲ្យចែកផ្លូវគ្នានេះឡើយ។
ខ្សែប្រយុទ្ធអេស្ប៉ាញ Carrascosa Munoz Angel បានចូលរួមជាមួយបឹងកាលពីមុនបើករដូវកាលឆ្នាំ២០១៩។ សម្រាប់ការបង្ហាញខ្លួនពាក់កណ្តាលរដូវកាលកន្លងមក ខ្សែប្រយុទ្ធវ័យ២៩ឆ្នាំរូបនេះ សម្រេចបាន២គ្រាប់ និងបញ្ចូលបាល់ឲ្យមិត្តរួមក្រុមទាត់បញ្ចូលទីបាន៣គ្រាប់។ លទ្ធផលមិនគាប់ប្រសើរនេះ ទំនងអាចជាមូលហេតុ ដែលនាំឲ្យរូបគេដើរដល់ផ្លូវបំបែកជាមួយបឹងកេត។ តែយ៉ាងណា យើងមិនទាន់ដឹងមូលហេតុពិតពាក់ព័ន្ធការចែកផ្លូវនេះទេ។
ចំណែកខ្សែការពារ ស្រាំង ទិត្យឈី ដែលចូលរួមជាមួយបឹងកេតកាលពីដើមរដូវកាលឆ្នាំ២០១៩ ក៏ចែកផ្លូវជាមួយបឹងកេតដែរ។ សម្រាប់រួមរស់ជាមួយបឹងកេតមួយរយៈកន្លងមកនេះ ទិត្យឈី មិនសូវទទួលបានឱកាសពីគ្រូបង្វឹក ហៅ សុជាតិ ដើម្បីបង្ហាញខ្លួនលើទីលានប្រកួតនោះទេ។ ពោលគឺក្នុងចំណោម១៣ប្រកួត រូបគេបានបង្ហាញខ្លួនតែមួយប្រកួតប៉ុណ្ណោះ ពេលបឹងកេតយកឈ្នះកំពង់ចាមក្នុងលទ្ធផល ៧-០។ ការមិនសូវបានបង្ហាញខ្លួននេះហើយ អាចជាមូលហេតុ នាំឲ្យរូបគេចែកផ្លូវជាមួយបឹងកេត។
មុនផ្ទេរមកបឹងកេត ខ្សែការពារ ស្រាំង ទិត្យឈី លេងឲ្យក្លិបជើងឯក៦សម័យកាលភ្នំពេញក្រោននៅរដូវកាលឆ្នាំ២០១៨។ រូបគេជាអតីតយុវជនថ្នាល ដែលភ្នំពេញក្រោនដំឡើងឲ្យមកលេងនៅក្រុមឈុតធំ។ ក្រោយចែកផ្លូវជាមួយបឹងកេត យើងមិនឃើញ ទិត្យឈី ទៅប្រកបអាជីពជាមួយក្លិបនៅក្នុងស្រុក ឬក្រៅស្រុកណាមួយនៅឡើយទេ៕
Tag:
បាល់ទាត់
បឹងកេត
ស្រាំង ទិត្យឈី
Munoz Angel
© រក្សាសិទ្ធិដោយ thmeythmey.com