ជាតិ
នយោបាយជាតិ
រដ្ឋមន្ត្រីយុត្តិធម៌ កំពុងស៊ើបអង្កេតលើករណីស្ត្រីម្នាក់ ដែលជាប់ទោស១៦៥ឆ្នាំ
រូបពីគណៈកម្មាធិការសិទ្ធិមនុស្ស
×![]()
ភ្នំពេញ៖ នៅចំពោះមុខសភាពេញអង្គថ្ងៃទី ៤ ខែកក្កដា រដ្ឋមន្ត្រីក្រសួងយុត្តិធម៌ បានលើកឡើងថា ក្រសួងរបស់លោកកំពុងស៊ើបអង្កេតលើករណីស្ត្រីម្នាក់ ដែលជាប់ទោសដល់ទៅ១៦៥ឆ្នាំ។ ការស៊ើបអង្កេតនេះ ធ្វើឡើងក្រោយពីមានការងឿងឆ្ងល់ និងរិះគន់ពីសំណាក់ប្រជាពលរដ្ឋ។
មិនមែនតែពលរដ្ឋទេ ដែលងឿងឆ្ងល់លើករណីស្ត្រីជាប់ទោស១៦៥ឆ្នាំនេះ សូម្បីតែលោក អង្គ វង្ស វឌ្ឍនា ក៏ឆ្ងល់ដែរ។ លោក វឌ្ឍនា ដែលទើបទទួលបានព័ត៌មាននេះ បានបញ្ជាឲ្យមន្ត្រីជំនាញយុត្តិធម៌ ស៊ើបអង្កេតលើករណីនេះ ដើម្បីរកមូលហេតុឲ្យច្បាស់។
បើតាមរបាយការណ៍នៃសាលក្រម ដែលតុលាការបានបញ្ជូនទៅលោក អង្គ វង្ស វឌ្ឍនា នោះ គឺការផ្ដន្ទាទោសស្ត្រីខាងលើនោះ ដោយយោងតាមបទល្មើសព្រហ្មទណ្ឌ ដែលស្ត្រីរូបនោះ បានជាប់ពាក់ព័ន្ធនឹងករណីប្លន់ជាមួយស្វាមីកន្លងមក។ ត្រង់ចំណុចនេះលោក វឌ្ឍនា បានបញ្ជាក់ថា សាលក្រមនីមួយៗបានកាត់ទោសឲ្យស្ត្រីរូបនោះ ជាប់ទោសពី៨ឆ្នាំឡើងទៅ។ បើតាមលោក វឌ្ឍនា ស្វាមីរបស់ស្ត្រីរូបនេះ ជាក្រុមចោរប្លន់យ៉ាងសាហាវ ដោយក្នុងមួយឆ្នាំចេញប្លន់យ៉ាងតិច៩ករណី។
តែយ៉ាងណារដ្ឋមន្ត្រីយុត្តិធម៌ បានសង្កត់ធ្ងន់ថា យោងតាមក្រមព្រហ្មទណ្ឌកម្ពុជា និងនីតិវិធីច្បាប់កម្ពុជា គឺតម្រូវឲ្យជនល្មើសជាប់ទោសណាមួយ ដែលតុលាការកាត់ឲ្យជាប់ពន្ធនាគារច្រើនជាងគេ ក្នុងចំណោមទោសដែលបានប្រព្រឹត្តប៉ុណ្ណោះ ។ ក្នុងន័យនេះលោក អង្គ វង្ស វឌ្ឍនា ក៏យល់ថា ស្ត្រីជាប់ពន្ធនាគារខាងលើ មិនត្រូវអនុវត្តទោសរហូតដល់១៦៥ឆ្នាំនោះទេ។ «ខ្ញុំកំពុងតាមដានរឿងនេះ»។ នេះជាការបញ្ជាក់របស់រដ្ឋមន្ត្រីក្រសួងយុត្តិធម៌ នៅក្នុងកិច្ចប្រជុំសភាពេញអង្គ ដែលសួរនាំជុំវិញការអនុវត្តការងាររបស់ក្រសួងកន្លងមក នៅព្រឹកថ្ងៃទី៤ កក្កដានេះ។
កាលពីថ្ងៃទី២ ខែកក្កដា ឆ្នាំ២០១៩នេះ គណៈកម្មាធិការសិទ្ធិមនុស្ស បានពិភាក្សាជាមួយអង្គការការអភិវឌ្ឍកុមារកម្ពុជា ហើយបានចុះទៅមណ្ឌលអប់រំកែប្រែទី២ ដើម្បីធ្វើបែបបទរដ្ឋបាល និងនីតិវិធីច្បាប់ ក្នុងការទទួលយកក្មេងចេញពីពន្ធនាគារ ប្រគល់ទៅឲ្យអង្គការការអភិវឌ្ឍកុមារកម្ពុជា ដែលស្ថិតនៅភូមិព្រែកត្រែង ឃុំសិត្បូ ស្រុកស្អាង ខេត្តកណ្តាល។ នៅគ្រាដែលក្រុមការងារគណៈកម្មាធិការសិទ្ធិមនុស្ស ចុះទៅជួបស្ត្រីនិងកូនក្នុងពន្ធនាគារនោះ ក៏បានរកឃើញស្ត្រីម្នាក់ មានទោសជាច្រើនបូកផ្សំបញ្ចូលគ្នា រហូតដល់ទៅមានទោសសរុប១៦៥ឆ្នាំ ដោយមានទាំងកូនប្រុសតូចម្នាក់អាយុទើបឆ្នាំ៣ឆ្នាំនៅជាមួយផង។ ស្ត្រីរូបនេះ បានអនុវត្តទោស៣ឆ្នាំមកហើយ។
អត្ថបទទាក់ទង
លោក កែវ រ៉េមី ប្រធានគណៈកម្មាធិការសិទ្ធិមនុស្ស អះអាងថា ចៅក្រម បានប្រកាសសាលក្រមដល់ទៅ៩ករណី ទាក់ទងនឹងបទល្មើសរបស់ស្ត្រីរូបនោះ ដែលសរុបទោលដល់ទៅ១៦៥ឆ្នាំ។ ប៉ុន្តែ លោក លើកឡើងថា ទោសទាំងនេះ មិនទាន់ចូលជាស្ថាពរនោះទេ។ លោក បញ្ជាក់ថា «មិនទាន់ស្រូបទោសនៅឡើយទេ។ កាលណាមានទោសច្រើន ស្រូបទោស គឺយកទោសដែលមានចំនួនច្រើនជាងគេ។ នេះគ្រាន់តែជាទោសសរុប៩សាលក្រម»៕
Tag:
អង្គ វង្ស វឌ្ឍនា
យុត្តិធម៌
© រក្សាសិទ្ធិដោយ thmeythmey.com
