អន្តរជាតិ
មេបក្សប្រឆាំងដ៏ធំនៅឥណ្ឌាលាលែងពីតំណែង ក្រោយបក្សចាញ់ពីរអាណត្តិជាប់គ្នា លោក រ៉ាហ៊ុល គន្ធី លាលែងពីតំណែងប្រធានបក្សសមាជ។ រូបភាព AFP
× មេបក្សប្រឆាំងដ៏ធំនៅឥណ្ឌា លោក រ៉ាហ៊ុល គន្ធី (Rahul Gandhi) បានប្រកាសលាលែងពីតំណែងប្រធានបក្សហើយ ដើម្បីទទួលខុសត្រូវលើបរាជ័យផ្ទួនៗក្នុងការបោះឆ្នោតទូទៅក្នុងប្រទេសប្រជាធិបតេយ្យធំជាងគេលើពិភពលោកមួយនេះ។ តាមរយៈបណ្ដាញសង្គម Twitter របស់ខ្លួន អ្នកនយោបាយជាប់សាច់ឈាមវីរបុរសជាតិរបស់ឥណ្ឌារូបនេះអះអាងថា ការលាលែងពីតំណែងនេះ គឺដើម្បីអនាគតភ្លឺស្វាងរបស់បក្សសមាជ។
«ក្នុងនាមជាប្រធានបក្សសមាជ ខ្ញុំទទួលខុសត្រូវចំពោះបរាជ័យការបោះឆ្នោត២០១៩ ។» នេះជាការប្រកាសរបស់លោក រ៉ាហ៊ុល គន្ធី នៅលើបណ្ដាញសង្គម Twitter នៅថ្ងៃទី៣ ខែកក្កដា ដោយបន្តថា ការទទួលខុសត្រូវ ជារឿងសំខាន់សម្រាប់អនាគតបក្ស ហើយនេះជាមូលហេតុដែលនាំលាលែងពីតំណែងបក្សប្រឆាំងដ៏ធំរបស់ឥណ្ឌា។
បក្សសមាជដែលធ្លាប់ដឹកនាំប្រទេសជាច្រើនឆ្នាំ បានបរាជ័យផ្ទួនៗក្នុងការបោះឆ្នោតសភានៅឆ្នាំ២០១៤ និងឆ្នាំ២០១៩ នេះទល់នឹងបក្ស Bharatiya Janata របស់នាយករដ្ឋមន្ត្រី នារិន្ទ្រា ម៉ូឌី ។ សម្រាប់ការបោះឆ្នោតទូទៅឆ្នាំ២០១៩ លោក រ៉ាហ៊ុល ដែលចូលកាន់តំណែងប្រធានបក្សនៅឆ្នាំ២០១៧ មានបំណងក្លាយជាអ្នកនយោបាយត្រកូលនេរុហ៍-គន្ធីទីបួនដែលដឹកនាំឥណ្ឌា ប៉ុន្តែបែរជាចាញ់លោក ម៉ូឌី ទៅវិញ។
តាមពិតទៅ លោក រ៉ាហ៊ុល បានបង្ហាញបំណងលាលែងក្រោយដឹងលទ្ធផលបោះឆ្នោតភ្លាមៗ ប៉ុន្តែអ្នកនយោបាយផ្សេងទៀតក្នុងបក្សចង់ឲ្យបន្តកាន់តំណែងទៀត ដ្បិតការលាលែងនេះ នឹងធ្វើឲ្យបក្សវ័យចំណាស់មួយនេះ ជួបបញ្ហាមិនខាន។ ទោះជាទទួលយកកំហុសដែលដឹកនាំបក្សមិនល្អក្ដី អ្នកនយោបាយវ័យ៤៩ឆ្នាំរូបនេះ ក៏ឆ្លៀតរិះគន់បក្សកាន់អំណាចដែលប្រើប្រាស់អំណាចរដ្ឋធ្វើជាឧបករណ៍នយោបាយរបស់ខ្លួន។
លោក រ៉ាហ៊ុល ចោទថា ការបោះឆ្នោត មិនធ្វើឡើងដោយសេរី និងយុត្តិធម៌ឡើយ ដោយប្រព័ន្ធផ្សព្វផ្សាយឥណ្ឌា តុលាការ និងគណៈកម្មការរៀបចំការបោះឆ្នោតផងនោះ សុទ្ធតែបែរខ្នងដាក់បក្សប្រឆាំងទាំងអស់។ អ្នកនយោបាយត្រកូលអភិជនដដែលនេះបន្តថា ក្នុងការបោះឆ្នោតឆ្នាំ២០១៩ បក្សប្រឆាំងមិនមែនប្រយុទ្ធជាមួយបក្សនយោបាយឡើយ តែជាការប្រយុទ្ធជាមួយឧបករណ៍រដ្ឋទាំងអស់។
ជាចៅទួត ចៅ និងកូនរបស់នាយករដ្ឋមន្ត្រីបីរូបរបស់ឥណ្ឌា លោក រ៉ាហ៊ុល ត្រូវបានចាត់ទុកជាបុគ្គល ដែលអាចស្ដារមុខមាត់បក្សសមាជ ក្រោយបរាជ័យការបោះឆ្នោតឆ្នាំ២០១៤ ។ ប៉ុន្តែអ្វីៗមិនដូចការគ្រោងទុកឡើយ។ ទោះបក្សនេះកើនសំឡេងបន្តិច បើធៀបនឹងការបោះឆ្នោតលើកមុនក្ដី បក្សសមាជ នៅតែមានគម្លាតឆ្ងាយពីបក្សកាន់អំណាច ខណៈដែលលោក រ៉ាហ៊ុល ផ្ទាល់ ក៏ចាញ់ឆ្នោត ក្នុងមណ្ឌលដែលខ្លួនឈរទៅទៀត៕
© រក្សាសិទ្ធិដោយ thmeythmey.com