សម័យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ ២០១៩ នឹងប្រព្រឹត្តទៅនៅថ្ងៃទី ១៩ ខែសីហាខាងមុខនេះ។ រហូតមកដល់ពេលនេះ សិស្សានុសិស្សមួយចំនួន បានត្រៀមខ្លួនរួចរាល់ហើយ ចំណែកសិស្សខ្លះទៀត នៅមិនទាន់ត្រៀមខ្លួនរួចរាល់សម្រាប់ការប្រឡងនេះនៅឡើយទេ។ លោក គាំ សត្យា សាស្រ្តាចារ្យជីវវិទ្យា នៃវិទ្យាល័យ សម្ដេច ហ៊ុន សែន ភ្នំពេញថ្មី  បាន​លើកឡើងថា៖ «ដើម្បីត្រៀមខ្លួនប្រឡងបាក់ឌុបនាពេលខាងមុខ សិស្សត្រូវបែងចែកពេលវេលាទន្ទេញមេរៀន និងអនុវត្តលំហាត់ឲ្យបានត្រឹមត្រូវ។ ជាពិសេសត្រូវចាំរូបមន្ត, ចេះគោលការណ៍ និងវាចាតាមលំហាត់នីមួយៗ»។ សាស្រ្តាចារ្យជីវវិទ្យារូបនេះ បន្ថែមថា សិស្សានុសិស្ស គួរត្រៀមលក្ខណៈតាំងពីដើមឆ្នាំដំបូង និងចេះដោះស្រាយលំហាត់។ 

 

 

បើតាមលោកសាស្រ្តាចារ្យ គាំ សត្យា ពីមួយឆ្នាំទៅមួយឆ្នាំ ក្រោយការកំណែទម្រង់របស់ក្រសួងអប់រំ សិស្សានុសិស្ស បានខិតខំប្រឹងប្រែងរៀនសូត្រខ្លាំង ជាពិសេសពួកគេ អាចដោះស្រាយលំហាត់បានយ៉ាងល្អ។ ជាមួយគ្នានេះ ក្នុងពេលប្រឡងសិស្សានុសិស្ស គួរតែធ្វើលំហាត់ណា ដែលងាយស្រួលមុន ជាជាងធ្វើលំហាត់ពិបាក ដែលធ្វើឲ្យខាតពេលវេលា។ 

សូមបញ្ជាក់ថា សម័យប្រឡង ១៩ សីហា ខាងមុខនេះ មានបេក្ខជនដាក់ពាក្យសរុប ១១៩, ២១៧នាក់  ដោយក្នុងនោះ ថ្នាក់ វិទ្យាសាស្ត្រមានចំនួន  ៤៥,៤១៤នាក់ និងថ្នាក់វិទ្យាសាស្ត្រសង្គម ៧៣,៨០៣នាក់។ សម្រាប់ឆ្នាំនេះ មណ្ឌលប្រឡងនៅទូទាំងប្រទេស មានចំនួន ២០២មណ្ឌល ក្នុងនោះថ្នាក់វិទ្យាសាស្ត្រ ៧៥ មណ្ឌល និងថ្នាក់វិទ្យាសាស្ត្រសង្គម ១២៧មណ្ឌល ស្មើនឹង៤  ៨០៩ បន្ទប់៕