ខួបទី២៤៣នៃថ្ងៃឯករាជ្យ លោក ត្រាំ ថា គ្មានអ្វីដែលអាមេរិកធ្វើមិនបានឡើយ

អន្តរជាតិ

ខួបទី២៤៣នៃថ្ងៃឯករាជ្យ លោក ត្រាំ ថា គ្មានអ្វីដែលអាមេរិកធ្វើមិនបានឡើយ

05, Jul 2019 , 2:38 pm

រូបភាព

ប្រធានាធិបតីអាមេរិក ដូណាល់ ត្រាំ ថ្លែងនាខួបទី២៤៣ ថ្ងៃឯករាជ្យ។ រូបភាព AFP

ដោយ: តន ចាន់រិទ្ធារ៉ា

ខុសពីសព្វដង បុណ្យឯករាជ្យអាមេរិកថ្ងៃទី៤ ខែកក្កដា ត្រូវធ្វើឡើងយ៉ាងអធិកអធម ហើយមានវត្តមានរថក្រោះតាមការចង់បានរបស់ប្រធានាធិបតី ដូណាល់ ត្រាំ ។ ពីខាងមុខវិមានអនុស្សាវរីយ៍ Lincoln ក្នុងរដ្ឋធានីវ៉ាស៊ីនតោន លោក ត្រាំ បានកោតសរសើរវីរភាពកងទ័ពអាមេរិក ដែលធ្វើសង្គ្រាមគ្រប់ទិសទី ហើយថា អាមេរិកជាប្រទេសពិសេសជាងគេលើពិភពលោកនេះ។ សម្រាប់លោក គ្មានអ្វីដែលអាមេរិកធ្វើមិនបានឡើយ។

លោក ដូណាល់ ត្រាំ ក្លាយជាប្រធានាធិបតីអាមរិកដំបូងគេក្នុងរយៈពេលច្រើនជាង៧០ឆ្នាំដែលថ្លែងសុន្ទរកថានៅថ្ងៃទី៤ ខែកក្កដា ដែលជាថ្ងៃបុណ្យឯករាជ្យជាតិរបស់អាមេរិក។ ជាទម្លាប់ ទិវាឯករាជ្យនេះ ជាថ្ងៃដែលមិនពាក់ព័ន្ធនយោបាយ ការបង្រួបបង្រួមរវាងអ្នកនយោបាយ និងជាថ្ងៃរំឭកដល់វីរភាពថ្នាក់ដឹកនាំជំនាន់។ ខុសប្លែកពីលើកមុនៗ បុណ្យឯករាជ្យលើកទី២៤៣ ឆ្នាំ២០១៩ នេះ ត្រូវលោក ត្រាំ ផ្ដោតសំខាន់លើភាពអង់អាចរបស់យោធា។

ចំពោះមុខអ្នកចូលរួមជាច្រើននៅខាងមុខវិមាន Lincoln លោក ត្រាំ បាននិយាយម្ដងហើយម្ដងទៀតពីភាពក្លាហានរបស់យោធាអាមេរិកក្នុងការការពារទឹកដី និងប្រជាជន។ លោកបន្តថា អាមេរិកបច្ចុប្បន្ន គឺខ្លាំងជាងអាមេរិកជំនាន់មុន ហើយស្ថិតក្នុងដំណាក់ដែលល្អផុតលេខក្នុងប្រវត្តិសាស្ត្រពិភពលោក។ បើតាមប្រធានាធិបតីរូបនេះ គ្មានអ្វីដែលអាមេរិកមិនអាចធ្វើបានឡើយ បើប្រជាជនអាមេរិកនៅតែមិនបញ្ឈប់ការប្រឹងប្រែងដើម្បីអនាគតភ្លឺស្វាងនោះ។

តាមពិតទៅ លោក ត្រាំ ចង់ឲ្យរៀបចំពិធីនេះឲ្យអធិកអធម ពិសេសមានការដង្ហែរក្បួនយោធាផង។ ប៉ុន្តែគំនិតនេះ រងការជំទាស់យ៉ាងខ្លាំងពីមន្ត្រីក្រោមបង្គាប់របស់លោក។ ម្យ៉ាងការដង្ហែរក្បួននេះ ត្រូវចំណាយប្រាក់ច្រើនផង ហើយម្យ៉ាងទៀត គឺការគិតគូរពីផលប៉ះពាល់លើហេដ្ឋារចនាសម្ព័ន្ធក្នុងរដ្ឋធានីវ៉ាស៊ីនតោនដែលមិនអាចទ្រាំទ្រសព្វាវុធធុនធ្ងន់ៗបានឡើយ។ ចុងក្រោយ អ្វីដែលលោកទទួលបាន ត្រឹមតែការរៀបចំខ្នាតតូចប៉ុណ្ណោះ។

មេបញ្ជាការទ័ពជើងគោក ជើងអាកាស និងជើងទឹក គ្មានឈ្មោះបញ្ជីអ្នកចូលរួមឡើយ ប៉ុន្តែគេឃើញនាយសេនាធិការចម្រុះ ចូសេហ្វ ដាន់ហ្វត ឈរក្បែរលោក ត្រាំ ។ មិនមានការដង្ហែរក្បួនសព្វាវុធធំៗឡើយ មានតែការតាំងបង្ហាញរថក្រោះប៉ុន្មានគ្រឿងប៉ុណ្ណោះ។ នៅលើផ្ទៃអាកាស យន្តហោះប្រធានាធិបតី Air Force One, យន្តហោះទម្លាក់គ្រាប់បែក B2, ឧទ្ធម្ភាគចក្រប្រយុទ្ធ និងក្រុមហោះហើរទ័ពជើងទឹក Blue Angel បានហោះសម្ញែងពីលើវេទិកា។ តមក ក៏មានការបាញ់កាំជ្រួចផងដែរ។

លោក ត្រាំ រងការរិះគន់យ៉ាងខ្លាំងចំពោះការយកទិវាបុណ្យជាតិដ៏សំខាន់នេះទៅធ្វើជារឿងនយោបាយ ខុសគោលការណ៍ដើម។ គំនិតចង់ឃើញក្បួនយោធានេះ លេចឡើងបន្ទាប់លោក ត្រាំ ទស្សនាផ្ទាល់ភ្នែកព្យុហយាត្រាយោធានៅបារាំងកាលពីឆ្នាំ២០១៧ ហើយក៏ចង់រៀបចំដូចគ្នានេះនៅអាមេរិក។ ប៉ុន្តែអ្នករិះគន់ និងអ្នកប្រឆាំងជាច្រើនទៀតអះអាងថា ប្រធានាធិបតីអាមេរិករូបនេះយកគម្រូតាមមេដឹកនាំផ្ដាច់ការកូរ៉េខាងជើង ឬចិនដែលចូលចិត្តសម្ញែងអនុភាពយោធា៕