ការដោះដូរកីឡាករក្នុងក្របខណ្ឌមិត្តហ្វូនខេមបូឌានលីគ មានភាពមមាញឹកគួរឲ្យកត់សម្គាល់ក្នុងរដូវកាលដោះដូរកីឡាករជើងទី២ ដែលទើបបញ្ចប់កាលពីពេលថ្មីៗ។ ក្នុងនោះក្លិបចំនួន៨ បានផ្លាស់ប្តូរ និងបន្ថែមសមាជិកដើម្បីពង្រឹងសមត្ថភាពក្រុមត្រៀមការប្រកួតជើងទី២ ដែលចាប់ផ្តើមប្រកួតនៅចុងសប្តាហ៍នេះ។ ហើយ ក៏មានក្លិបមួយចំនួនមិនមានការដោះដូរកីឡាករផងដែរ។
ក្លិបបាល់ទាត់ចំនួន៨រួមមានក្រសួងការពារជាតិ បឹងកេត ណាហ្គាវើល អង្គរថាយហ្គឺរ ភ្នំពេញក្រោន អគ្គស្នងការដ្ឋាននគរបាលជាតិ និងគីរីវង់សុខសែនជ័យបានផ្លាស់ប្តូរ និងបន្ថែមសមាជិក ដើម្បីត្រៀមប្រកួតជើងទី២នៃក្របខណ្ឌមិត្តហ្វូនខេមបូឌានលីគ។ ក្រៅពីដោះដូរកីឡាករ ក៏មានក្លិបមួយចំនួនបញ្ចប់កិច្ចសន្យាជាមួយគ្រូបង្វឹក និងតែងតាំងគ្រូថ្មីផងដែរ។
ទោះបីមានដោះដូរកីឡាករយ៉ាងមមាញឹកក៏ដោយ តែយើងកត់សម្គាល់ឃើញថា ក្នុងចំណោមកីឡាករបរទេស ដែលក្លិបបាននាំចូលទាំងនោះភាគច្រើនជាកីឡាករលេងឲ្យក្លិបនៅកម្ពុជាស្រាប់ ពោលគឺក្រាន់តែផ្លាស់ប្តូរពីក្លិបមួយទៅក្លិបមួយតែប៉ុណ្ណោះ។ ក្នុងចំណោមក្លិបទាំង៨ មានតែភ្នំពេញក្រោន និងអាស៊ីអឺរ៉ុបនោះទេ ដែលនាំចូលកីឡាករច្រើនជាងគេ។
ក្រោយតែងតាំងលោក ស៊ុំ វណ្ណា ឲ្យដឹកនាំក្រុមបណ្តោះអាសន្នជំនួសគ្រូបង្វឹកប្រេស៊ីល Leonardo Vitorino ដែលក្លិបបញ្ចប់កិច្ចសន្យាពាក់កណ្តាលផ្លូវ ភ្នំពេញក្រោនបាននាំចូលកីឡាករថ្មីចំនួន៤រូបរួមមានខ្សែប្រយុទ្ធ Booysen Shane ដែលទើបចែកផ្លូវគ្នាជាមួយប៉ូលិស, Dzarma Bata ចែកផ្លូវជាមួយទ័ព, Mustafa Zazai, សេង សារ៉ាវុធ និងកីឡាករ សុខ សុវណ្ណ។
ការនាំចូលកីឡាករថ្មីនេះ ក្រោយភ្នំពេញក្រោនចែកផ្លូវគ្នាជាមួយកីឡាករជប៉ុន Shuhei Mitsuhashi និងកីឡាករខ្មែរបារាំង ពេជ អូវែន និង Thomas Sam Sochenn។ ក្លិបជើងឯក៦សម័យកាលមួយនេះ ក៏បានបន្តកិច្ចសន្យាជាមួយខ្សែប្រយុទ្ធប្រេស៊ីល Paulo Victor និងកីឡាករកម្ពុជា៧រូប ដែលម្នាក់ៗមានសុពលភាពដល់ឆ្នាំ២០២២។
ក្រោយការចាកចេញរបស់ខ្សែប្រយុទ្ធនីហ្សេរីយ៉ា Dzarma Bata និងកីឡាករជប៉ុន Taku Yanagidate ក្លិបក្រសួងការពារជាតិបាននាំចូលកីឡាករបរទេសពីររូប ដើម្បីជំនួសកៅអីពួកគេ គឺកីឡាករ Na Hyosung និង Khan Mohammed Faeez។ កីឡាករជប៉ុន Taku Yanagidate ចូលរួមជាមួយគិរីវង់សុខសែនជ័យ ដែលទើបនាំចូលកីឡាករកូតឌីវ័រ Coulibaly Major Bangaly ក្រោយការចាកចេញរបស់កីឡាករ Ota Takahito។
ក្រុមបញ្ចប់ចំណាត់ថ្នាក់លេខ២បណ្តោះអាសន្នណាហ្គាវើល បាននាំចូលកីឡាករជប៉ុន Kawabata Yugo តែម្នាក់គត់ ដើម្បីត្រៀមការប្រកួតជុំទី២។ វត្តមានរបស់ខ្សែបម្រើវ័យ២៥ឆ្នាំដែលធ្លាប់លេងឲ្យក្លិបអង្គរថាយហ្គឺរកាលពីឆ្នាំ២០១៧រូបនេះ គឺបំពេញកូតាកីឡាករបរទេសរបស់ណាហ្គាវើល ដែលមាន Paul Omogba, Anderson Zogbe, Atuheire Kipson និង Amir Gurbani។
ក្លិមមានមូលដ្ឋាននៅខេត្តសៀមរាបអង្គរថាយហ្គឺរ បាននាំចូលកីឡាករអេស្ប៉ាញ Fernando Cozar Torres ដើម្បីជំនួសកៅអីរបស់កីឡាករ Yudai Ogawa ដែលបានចែកផ្លូវគ្នា ដើម្បីទៅធ្វើតេស្តជាមួយក្លិបនៅតំបន់អឺរ៉ុប។ កីឡាករវ័យ២៨ឆ្នាំរូបនេះ ធ្លាប់លេងឲ្យក្លិបលំដាប់ទី៣ និងទី៤ជាច្រើននៅប្រទេសអេស្ប៉ាញ និងធ្លាប់លេងឲ្យក្លិប FC Legirus Inter របស់ហ្វាំងឡង់។ អ្វីដែលពិសេស គឺកីឡាករកម្ពស់១,៨៨ម៉ែត្ររូបនេះ បានរួមចំណែកជួយឲ្យក្លិបលំដាប់ទី២ហ្វាំងឡង់ HIFK Football ឈ្នះកៅអីឡើងទៅលេងនៅក្របខណ្ឌកំពូល។
ចំណែកក្លិបជើងឯកពីរសម័យកាលបឹងកេត ដែលឈរត្រឹមលេខរៀងទី៤បណ្តោអាសន្នក្នុងជើងទី១ បានទិញចូលកីឡាករជប៉ុន Kenta Yamazaki ដែលធ្លាប់លេងឲ្យក្លិបលំដាប់ទី២នៅថៃ ដើម្បីជំនួសកៅអីខ្សែប្រយុទ្ធ Angel Carrascosa។ Kenta ជាកីឡាករទី២ បន្ទាប់ពីកីឡាករ ចាន់ វឌ្ឍនាកា ដែលបានចុះកិច្ចសន្យារយៈពេល២ឆ្នាំលេងក្លិបនេះ។ វឌ្ឍនាកា ទោះបីមិនទាន់បានបង្ហាញខ្លួនក្នុងការប្រកួតក្របខណ្ឌលីគ តែរូបគេសម្រេចបាន Hat Trick ឲ្យបឹងកេតនាជំនួបវគ្គ១៦ក្រុមចុងក្រោយពានរង្វាន់សម្តេច ហ៊ុន សែន ថ្នាក់ជាតិជាមួយខេត្តសៀមរាប។
Kenta បានចាប់ផ្តើមលេងបាល់ទាត់អាជីពនៅឆ្នាំ២០១២ ជាមួយក្លិបនៅជប៉ុន Tokyo 23 FC មុនផ្ទេរមកលេងឲ្យក្លិបលំដាប់ទី២ថៃ TTM Customs នៅឆ្នាំ២០១៣។ បន្ទាប់មករូបគេផ្លាស់ទៅលេងឲ្យក្លិបលំដាប់ទី២ម៉ុងតេណេហ្គ្រោ Fudbalski klub Berane ចន្លោះពីឆ្នាំ២០១៣-២០១៤ មុនផ្លាស់ទៅក្លិប OFK Grbalj នៅឆ្នាំ២០១៤-២០១៥។ ក្រោយមករូបគេក៏បានមកកាន់ទឹកដីថៃជាលើកទី២ ដោយលេងឲ្យក្លិបលំដាប់ទី២ Ubon UMT United ពីឆ្នាំ២០១៥-២០១៨។
ចំណែកក្រុមឈរលេខរៀងទី៩បណ្តោះអាសន្នអាស៊ីអឺរ៉ុបបានដោះដូរកីឡាករបរទេសពីររូប និងបន្ថែមសមាជិកថ្មីពីររូប រួមមានកីឡាករ Julien William, Ndoumene Yannick Francois, Tjutomu Hasegawa និងកីឡាករ សុក ចាន់រស្មី។ ការនាំចូលកីឡាករទាំងនេះ បន្ទាប់ពីក្លិបចែកផ្លូវជាមួយកីឡាករ Ajayi Opeyene Korede និង Tomohiro Masaki។
ក្រោយចាកចេញពីអាស៊ីអឺរ៉ុបកីឡាករជប៉ុន Tomohiro Masaki បានចុះកិច្ចសន្យាលេងក្លិបអគ្គស្នងការដ្ឋាននគរបាលជាតិនៅជើងទី២នេះ។ វត្តមានរបស់ខ្សែបម្រើរូបនេះ គឺដើម្បីជំនួសកៅអីកីឡាករ Booysen Shane ដែលបានចាកចេញទៅចូលរួមជាមួយភ្នំពេញក្រោន។
ទន្ទឹមនឹងក្លិបមួយចំនួនមមាញឹកជាមួយការដោះដូរកីឡាករនៅជើងទី២ ក្លិបព្រះខ័នរាជស្វាយរៀង វិសាខា កំពង់ចាម សូលទីឡូអង្គរ អគ្គិសនីកម្ពុជា និងយុវជនអាយុក្រោម១៨ឆ្នាំបាទី ហាក់មិនអើពើជាមួយការដោះដូរកីឡាករឡើយ។ ទោះបីគ្មានការដោះដូរកីឡាករ តែក្លិបបាល់ទាត់វិសាខាបានផ្តាស់ប្តូរគ្រូបង្វឹក ដោយបញ្ចប់កិច្ចសន្យាជាមួយលោក ហុក សុជីវ័ន ហើយតែងតាំងលោក Akeep Tunji Ayoyinka ដែលជាគ្រូជំនួយឲ្យដឹកនាំជំនួសបណ្តោះអាសន្ន។ ជាមួយគ្នានេះ លោក ទេព ឡុងរចនា ត្រូវបានតែងតាំងឲ្យធ្វើជាគ្រូបង្វឹកក្រុមក្រសួងការពារជាតិ ជំនួសលោក ភា សុភ័ក្ត្រា៕