អន្តរជាតិ
ប្រធានប្រតិបត្តិតំបន់រដ្ឋបាលពិសេសហុងកុង Carrie Lam ។ រូបភាព AFP
×![]()
ដោយ: តន ចាន់រិទ្ធារ៉ា
មេដឹកនាំហុងកុង Carrie Lam បានអញ្ជើញក្រុមយុវជនវ័យក្មេងឲ្យចូលរួមក្នុងជំនួបបិទទ្វារមួយដើម្បីដោះស្រាយបញ្ហាដែលធ្វើឲ្យញាប់ញ័រទីក្រុងហិរញ្ញវត្ថុអន្តរជាតិមួយនេះ។ នេះ ជាលើកដំបូងដែលរដ្ឋាភិបាលហុងកុងបោះដៃទៅរកក្រុមយុវជនដែលជាកម្លាំងស្នូលនៃការធ្វើបាតុកម្មប្រឆាំងសំណើច្បាប់ធ្វើបត្យាប័នជាមួយដីគោក។ ប៉ុន្តែសមាគមយុវជនសំខាន់ៗចំនួនពីរ បានបដិសេធដោយអះអាងថា សំណើនេះជាការស្ដារមុខមាត់រដ្ឋាភិបាលប៉ុណ្ណោះ។
អ្នកនាំពាក្យការិយាល័យប្រធានប្រតិបត្តិតំបន់រដ្ឋបាលពិសេសហុងកុង នៅថ្ងៃទី៤ ខែកក្កដា និយាយថា លោកស្រី Carrie Lam បានអញ្ជើញក្រុមយុវជនវ័យក្មេងមកពីស្រទាប់វណ្ណៈផ្សេងនៅហុងកុង ឲ្យចូលរួមក្នុងការពិភាក្សាមួយ។ និស្សិតសាកលវិទ្យាល័យ និងក្រុមយុវជនដែលចូលរួមក្នុងបាតុកម្មដ៏កក្រើកនាពេលថ្មីៗនេះ ក៏ត្រូវបានអញ្ជើញឲ្យចូលរួមផងដែរ។
បើតាមអ្នកនាំពាក្យដដែល គោលដៅនៃជំនួបខាងលើនេះ គឺដើម្បីស្ដាប់មតិយោបល់ និងផ្លាស់ប្ដូរគំនិតដោយស្មោះត្រង់។ ដូចនេះហើយគម្រោងជំនួបនេះ ត្រូវរៀបចំឡើងក្នុងទំហំតូច បិទទ្វារ ហើយការជជែកទាំងអម្បាលម៉ាន នឹងមិនត្រូវបានផ្សព្វផ្សាយឡើយ។ ខណៈសំណើនេះ ត្រូវបានតំណាងនិស្សិតខ្លះបដិសេធទៅហើយនោះ រដ្ឋាភិបាលហុងកុងជឿថា ពួកគេនឹងពិចារណាសំណើម្ដងទៀត។ នេះបើតាមការផ្សាយរបស់កាសែតហុងកុង South China Morning Post ។
មេដឹកនាំនិស្សិតមកពីសាកលវិទ្យាល័យចំនួនពីរដែលទទួលបានការអញ្ជើញ បានទាត់ចោលសំណើភ្លាមៗ។ លោក So Tsun-fung ប្រធានសហភាពនិស្សិតនៃសាកលវិទ្យាល័យនៅហុងកុង និយាយថា យើងមិនចង់ចូលរួមក្នុងការជំនួបបែបសម្ដែងបែបនេះឡើយ ហើយនឹងពិចារណាសំណើនេះឡើងវិញ បើរដ្ឋាភិបាលគិតគូរសំណើនិស្សិតដែរ។ លោក So ចាត់ទុកសកម្មភាពរបស់រដ្ឋាភិបាលជារឿងសម្បទានតិចពេក ហើយក៏យឺតពេលទៅហើយ។
អ្វីដែលមេដឹកនាំនិស្សិតហុងកុងចង់ឲ្យរដ្ឋាភិបាលោកស្រី Lam ពិចារណាដែរនោះ គឺបើកចំហកិច្ចប្រជុំជាមួយតំណាងយុវជន និងប្រមូលភាគីផ្សេងទៀតឲ្យចូលរួមផងដែរ។ លោក Jordan Pang មេដឹកនាំនិស្សិតនៅសាកលវិទ្យាល័យហុងកុង ហាក់សង្ស័យនឹងបំណងរបស់មេដឹកនាំហុងកុង ព្រោះចង់ជួបនិស្សិតដោះស្រាយបញ្ហា តែធ្វើឡើងដោយបិទទ្វារពីភ្នែកមហាជនទៅវិញ ហើយមិនព្រមដោះស្រាយការទាមទាររបស់បាតុករផង។
ការបង្ហាញជំហរជួបក្រុមយុវជននេះ កើតឡើងស្របពេលដែលលោកស្រី Lam កំពុងរងសម្ពាធពីបាតុករឲ្យចុះចេញពីតំណែង។ ពីដំបូង ក្រុមបាតុករមិនពេញចិត្តរដ្ឋាភិបាលហុងកុងរបស់លោកស្រី Lam ដែលស្នើសេចក្ដីព្រាងច្បាប់ធ្វើបត្យាប័នជាមួយចិនទៅសភា តែចុងក្រោយក៏រាលដាលដល់លោកស្រីប្រធានប្រតិបត្តិតែម្ដង ព្រោះលោកស្រីមិនចុះញ៉មតាមការទាមទារ។ សព្វថ្ងៃ ទោះសេចក្ដីស្នើនេះត្រូវបានដកចេញក្ដី ក៏មិនអាចរំងាប់កំហឹងបាតុករឡើយ៕
Tag:
ចិន
ហុងកុង
Carrie Lam
© រក្សាសិទ្ធិដោយ thmeythmey.com
