ជាតិ
វត្ថុបុរាណ៨៥មុខដែលបណ្ឌិតជប៉ុនប្រគល់ជូនកម្ពុជា នឹងត្រូវដាក់តាំងពិព័រណ៍
×![]()
ដោយ: ប៉ូ សាគុន
ភ្នំពេញ៖ វត្ថុបុរាណទាំង៨៥មុខ និងបំណែក ដែល បណ្ឌិតជនជាតិជប៉ុន លោកស្រី ហ្វូមីកូ តាកាកុវ៉ា បានប្រគល់ជូនកម្ពុជាវិញនោះ នឹងត្រូវដាក់តាំងបង្ហាញឱ្យសាធារណជនបានទស្សនា នៅក្រោយការសិក្សាស្រាវជ្រាវរកព័ត៌មានលម្អិតបន្ថែមជុំវិញវត្ថុបុរាណទាំងនោះ។ សារមន្ទីរជាតិកម្ពុជា រំពឹងថា ការសិក្សាស្រាវជ្រាវ និងវិភាគលើរូបសំណាក គេអាចដឹងពីការធ្វើពាណិជ្ជកម្មកាលពីសម័យនោះ។ នេះបើតាមលោក គង់ វីរៈ ប្រធាននាយកដ្ឋានសារមន្ទីរជាតិភ្នំពេញ ដែលបានបញ្ជាក់នៅក្រោយពិធីប្រគល់-ទទួលវត្ថុបុរាណទាំង៨៥ប្រភេទនៅសារមន្ទីរជាតិកម្ពុជា កាលពីព្រឹកថ្ងៃទី៥ខែកក្កដាឆ្នាំ២០១៩។
ពិធីប្រគល់-ទទួលវត្ថុបុរាណពីលោកស្រី បណ្ឌិត ហ្វូមីកូ តាកាកុរ៉ា ជនជាតិជប៉ុនដែលបានស្ម័គ្រចិត្តប្រគល់វត្ថុបុរាណចំនួន៨៥មុខនិងបំណែក ជូនមកប្រទេសកម្ពុជាវិញ ក្រោមអធិបតីភាពលោក ប្រាក់ សុវណ្ណារ៉ា រដ្ឋលេខាធិការតំណាងអ្នកស្រី ភឿង សកុណា រដ្ឋមន្ដ្រីក្រសួងវប្បធម៌និងវិចិត្រសិល្បៈ។
ប្រធាននាយកដ្ឋានសារមន្ទីរជាតិកម្ពុជា លោក គង់ វីរៈ ថាសារមន្ទីរជាតិនឹងសិក្សាស្រាវជ្រាវបន្ថែមលើវត្ថុបុរាណទាំង៨៥មុខនិងប្រភេទនោះ ដើម្បីកំណត់អត្តសញ្ញាណ កំណត់អាយុកាល កំណត់ទីតាំងផលិត និងកំណត់ប្រភពដើមនៃរ៉ែដែលយកមកធ្វើវត្ថុបុរាណទាំងនោះ។ ជាងនេះទៅទៀតការវិភាគបន្ថែមនេះ គេអាចដឹងពីបច្ចេកទេសផលិតនៅក្នុងរោងជាង និងដឹងពីការធ្វើពាណិជ្ជកម្មនៅក្នុងសម័យនោះថែមទៀតផង។ ក្រោយពីបញ្ចប់ការវិភាគលើវត្ថុបុរាណទាំងនោះ សារមន្ទីរជាតិនឹងដាក់តាំងពិព័រណ៍ជាសាធារណៈជូនសាធារណជន តែនៅមិនទាន់អាចកំណត់ថ្ងៃច្បាស់លាស់នៅឡើយ។
លោក គង់ វីរៈ បញ្ជាក់បន្ថែមថា ៖«តាមពិតទៅវត្ថុបុរាណទាំងនេះ យើងបានកំណត់ពីអាយុកាលខ្លះហើយ យើងអាចតាំងពិព័រណ៍ពេលនេះក៏បាន ប៉ុន្តែយើងចង់ឱ្យអ្នកទស្សនាទទួលបានព័ត៌មានកាន់តែច្រើន។ ការធ្វើវិភាគនេះដើម្បីពង្រីកបន្ថែមក្នុងវិស័យស្រាវជ្រាវ និងវិស័យអភិរក្ស។ រូបខ្លះនៅសល់ស្រទាប់ទឹកមាស ដូច្នេះយើងនឹងសិក្សាពីបច្ចេកទេសលាបលនទឹកមាស។ យើងចង់ដឹងថាវត្ថុបុរាណទាំងនេះ គឺខ្មែរជាអ្នកបង្កើតផ្ទាល់ ឬជាការឆ្លងឥទ្ធិពលពីគ្នាទៅវិញទៅមក។ យើងក៏អាចដឹងពីការធ្វើពាណិជ្ជកម្មនៅសម័យនោះបានផងដែរ»។
ក្រោយពិធីប្រគល់-ទទួលវត្ថុបុរាណពីលោកស្រីបណ្ឌិត ហ្វូមីកូ តាកាកុរ៉ា ជនជាតិជប៉ុនដែលបានស្ម័គ្រចិត្តប្រគល់វត្ថុបុរាណចំនួន៨៥មុខនិងបំណែកមកប្រទេសកម្ពុជាវិញ លោក គង់ វីរៈ ប្រធាននាយកដ្ឋានសារមន្ទីរជាតិភ្នំពេញ ថាការវិលត្រឡប់របស់វត្ថុបុរាណទាំងនោះ ប្រៀបបាននឹងការវិលត្រឡប់មកវិញនូវដួងព្រលឹងរបស់ជាតិ ដែលបានបាត់បង់ទៅអស់កាលដ៏យូរមកហើយនោះ។ ប្រធានសារមន្ទីរជាតិកម្ពុជារូបនេះ កោតសរសើរចំពោះទឹកចិត្តលោកស្រីបណ្ឌិត ហ្វូមីកូ តាកាកុរ៉ា ដែលមានឆន្ទៈខ្ពស់ ប្រកបដោយការយល់ច្បាស់ពីតម្លៃសម្បត្តិវប្បធម៌របស់ជាតិនីមួយៗ។
សូមបញ្ជាក់ថា លោកស្រីបណ្ឌិត ហ្វូមីកូ តាកាកុវ៉ា ប្រគល់វត្ថុបុរាណទាំង៨៥មុខនិងបំណែកមកកម្ពុជាវិញនេះ គឺដើម្បីឧទ្ទិសដល់វិញ្ញាណក្ខន្ធស្វាមីរបស់លោកស្រី គឺលោកបណ្ឌិតសាស្ត្រាចារ្យ ម៉ូរីហ្វូមី តាកាកុវ៉ា។ អំណោយវត្ថុបុរាណទាំងនេះត្រូវបាននាំមកតាមរយៈលោក ម៉ាសាតូម៉ូ ហូស៊ីណូនិងភរិយា កាលពីថ្ងៃទី២៨ខែឧសភាឆ្នាំ២០១៩ កន្លងទៅ។ លោកស្រីបណ្ឌិត ហ្វូមីកូ តាកាកុវ៉ា ក៏បានផ្ដល់អំណោយជាទឹកប្រាក់ចំនួន ៥,០០០ ដុល្លារអាមេរិក អមមកជាមួយវត្ថុបុរាណទាំង៨៥មុខនិងប្រភេទ ដើម្បីជួយដល់កិច្ចការរបស់សារមន្ទីរផងដែរ៕
Tag:
វត្ថុបុរាណ
© រក្សាសិទ្ធិដោយ thmeythmey.com
