អតីតចៅហ្វាយក្រុងរីយ៉ូសារភាពថា បានសូកលុយ២លានដុល្លារដើម្បីធ្វើម្ចាស់ផ្ទះអូឡាំពិក២០១៦

កីឡាអន្តរជាតិ

អន្តរជាតិ

អតីតចៅហ្វាយក្រុងរីយ៉ូសារភាពថា បានសូកលុយ២លានដុល្លារដើម្បីធ្វើម្ចាស់ផ្ទះអូឡាំពិក២០១៦

05, Jul 2019 , 9:39 pm

រូបភាព

(ពីឆ្វេង) លោក Arthur Nuzman លោក Luiz Inacio LuLa da Silva និង លោក Sergio Cabral អតីតអភិបាលក្រុងរីយ៉ូ។ រូបភាព Reuters

ដោយ: ទេព ពិទូរ្យ

អតីតអភិបាលក្រុងរីយ៉ូ (Rio de Janeiro) លោក Sergio Cabral នៅថ្ងៃទី៤ ខែកក្កដា បានសារភាពចំពោះមុខចៅក្រមថាលោកបានចំណាយប្រាក់ចំនួន ២ លានដុល្លារទិញសន្លឹកឆ្នោតដើម្បីធានាថាទីក្រុងមាត់សមុទ្ររបស់ប្រេស៊ីលមួយនេះធ្វើម្ចាស់ផ្ទះកីឡាអូឡាំពិកឆ្នាំ ២០១៦។

លោក Sergio Cabral ប្រាប់ចៅក្រមថាប្រាក់នោះលោកបានឲ្យទៅលោក Lamine Diack អតីតប្រធានសហព័ន្ធកីឡាអត្តពលកម្មអន្តរជាតិ (IAAF) ដើម្បីដោះដូរនឹងសន្លឹកឆ្នោតចំនួន ៩ សន្លឹក។ អ្វីដែលចាប់អារម្មណ៍ វាមិនមែនជារឿងសាមញ្ញនោះទេដែលលោក Cabral អាចមានការទាក់ទងផ្ទាល់ទៅលោក Diack នោះ គឺប្រាកដជាមានពាក់ព័ន្ធជាមួយអ្នកផ្សេងទៀតមិនខាន។

ប្រធានគណៈកម្មាធិការអូឡាំពិកប្រេស៊ីល (BOC) និងជាអ្នករៀបចំការដេញថ្លៃលោក Arthur Nuzman ជាអ្នកណែនាំលោក Cabral ឲ្យទៅជួប Diack ដើម្បីចរចាគ្នានៅមុនការបោះឆ្នោតឆ្នាំ ២០០៩ ហើយគេពិតបានឃើញថាក្រុងរីយ៉ូបានឈ្នះការដេញថ្លៃលើក្រុងម៉ាឌ្រីត (អេស្ប៉ាញ) Chicago (អាមេរិក) និងតូក្យូ (ជប៉ុន)។ អតីតចៅហ្វាយក្រុងរីយ៉ូរូបនេះ បកអាក្រាតប្រាប់ចៅក្រមដូច្នេះក្នុងតុលា។

Cabral បន្ថែមថា៖«លោក Nuzman បានមករកខ្ញុំហើយនិយាយថា Cabral ខ្ញុំចង់ប្រាប់អ្នកអំពីប្រធាន IAAF លោក Lamine Diack គាត់ជាមនុស្សដែលចូលចិត្តទទួលយកលុយសំណូក»។

រដ្ឋអាជ្ញាប្រេស៊ីលបានចោទប្រកាន់លោក Nuzman កាលពីខែតុលា ឆ្នាំ២០១៧ ជុំវិញការផ្តល់សំណូក២លានដុល្លារដើម្បីឲ្យក្រុង Rio ក្លាយជាម្ចាស់ផ្ទះព្រឹត្តិការណ៍កីឡាអូឡាំពិកឆ្នាំ ២០១៦កន្លងទៅនោះ។ សវនាការក៏បន្តដំណើរការរហូតបច្ចុប្បន្ន ខណៈប្រធាន BOC រូបនេះអះអាងថាលោកគ្មានទោសទេ។

ចំណែលោក Diack ក៏បដិសេធមិនទទួលកំហុស ក្នុងការចោទប្រកាន់ពីសំណាក់រដ្ឋអាជ្ញាប្រេស៊ីលដូចគ្នា៕