ជាតិ
នយោបាយជាតិ
សម្តេច ហេង សំរិន ប្រាប់ឲ្យតំណាងរាស្ត្រសភា យកពេលវិស្សមកាល៣ខែ ចុះដោះស្រាយបញ្ហាពលរដ្ឋ
រូបពីរដ្ឋសភាជាតិកម្ពុជា
×![]()
ដោយ: ភួង វ៉ាន់ថា
ភ្នំពេញ៖ សម្តេច ហេង សំរិន ប្រធានរដ្ឋសភា បានប្រាប់ឲ្យតំណាងរាស្ត្រយកចិត្តទុកដាក់ និងជួយដោះស្រាយទុក្ខលំបាករបស់ប្រជាពលរដ្ឋ នៅក្នុងថ្ងៃវិស្សមកាលរយៈពេល៣ខែ ក្រោយសម័យប្រជុំរដ្ឋសភាពីថ្ងៃទី៤ ខែកក្កដា ឆ្នាំ២០១៩។ 
ប្រធានរដ្ឋសភា បានប្រាប់តំណាងរាស្ត្រថា ទុក្ខលំបាករបស់ប្រជាពលរដ្ឋ ជាទុក្ខលំបាករបស់តំណាងរាស្ត្រ។ សម្តេច ហេង សំរិន បានលើកឡើងថា៖« ខ្ញុំសូមលើកទឹកចិត្ត ដល់សមាជិករដ្ឋសភាទាំងអស់ បន្តតួនាទី ភារកិច្ចទៅតាមមណ្ឌលនីមួយៗរបស់ខ្លួន ចុះជាប់ជាមួយម្ចាស់ឆ្នោត ដើម្បីចុះសិក្សាឈ្វេងយល់ពីការលំបាក និងតម្រូវការរបស់ប្រជាពលរដ្ឋឲ្យបានជាប់ជាប្រចាំ ហើយរួមគ្នាដោះស្រាយ និងឆ្លើយតបកង្វល់របស់ម្ចាស់ឆ្នោតឲ្យបានទាន់ពេលវេលា និងមានប្រសិទ្ធភាព។ លើសពីនេះត្រូវផ្តល់អំណោយសង្គ្រោះបន្ទាន់ផ្សេងៗ ពេលពលរដ្ឋជួបគ្រោះធម្មជាតិ»។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា ប្រាប់សារព័ត៌មានថ្មីៗតាមទូរសព្ទថា ការលើកឡើងរបស់សម្តេចនេះ ជាការក្រើនរម្លឹកដល់តំណាងរាស្ត្រឲ្យខិតខំបំពេញតួនាទីរបស់ខ្លួនបន្ថែមទៀត។ បើតាមលោក ប៉េងឡុង ពាក្យវិស្សមកាលនេះ មិនមែនជាពេលឈប់សម្រាកនោះទេ ប៉ុន្តែជាពេលដែលតម្រូវឲ្យតំណាងរាស្ត្រទាំងអស់ចុះមូលដ្ឋាន ជួយដោះស្រាយការងារដល់ប្រជាពលរដ្ឋទូទាំងប្រទេស មុននឹងសភាចូលកងបំពេញការងារជាធម្មតាវិញ។
« វិស្សមកាលនឹងមិនមែនជា វិស្សមកាលដើរលេងនោះទេ តំណាងរាស្ត្រទាំងអស់ត្រូវចុះមូលដ្ឋាន ខ្លះចុះតាមគណៈកម្មាធិការ ខ្លះចុះជាលក្ខណៈឯកជន ហើយពេលចូលកងវិញត្រូវមានរបាយការណ៍»។ នេះជាការបញ្ជាក់របស់អ្នកនាំពាក្យរដ្ឋសភា ដែលបានបន្ថែមថា នៅពេលសភាចូលកងវិញ តំណាងរាស្ត្រទាំងអស់ ត្រូវមានរបាយការណ៍សកម្មភាពការងារខ្លួន ដើម្បីរាយការណ៍ជូនប្រធានរដ្ឋសភា៕
© រក្សាសិទ្ធិដោយ thmeythmey.com
