នាយករដ្ឋមន្ត្រី​៖ បើ​ដក EBA សមិទ្ធផល​ដែល​អឺរ៉ុប​ជួយ​ខ្មែរ «​គឺ​ដូច​អំបិល​ត្រូវ​ទឹក​»
ជាតិ
​​​ន​យោ​បាយ​ជាតិ​
នាយករដ្ឋមន្ត្រី​៖ បើ​ដក EBA សមិទ្ធផល​ដែល​អឺរ៉ុប​ជួយ​ខ្មែរ «​គឺ​ដូច​អំបិល​ត្រូវ​ទឹក​»
06, Jul 2019 , 10:29 am        
រូបភាព
ដោយ: ថ្មីៗ
​សម្តេចនាយក​រដ្ឋមន្ត្រី ហ៊ុន សែន បាន​យក​ពិធី​ជួប​សំណេះសំណាល​ជាមួយ​ប្រជាពលរដ្ឋ​កម្ពុជា នៅ​ប្រទេស​ស្វី​ស នា​ថ្ងៃទី​៤ ខែកក្កដា ឆ្នាំ​២០១៩ បកស្រាយ​ជាថ្មី ពី​រឿង​ប្រព័ន្ធ​អនុគ្រោះ​ពន្ធ EBA របស់​សហភាព​អឺរ៉ុប​។ សម្តេចនាយក​រដ្ឋមន្ត្រី នៅតែ​និយាយ​ដូច​មុន​ថា កម្ពុជា មិន​លន់តួ​សហភាព​អឺរ៉ុប ឲ្យ​រក្សាទុក EBA នោះទេ បើ​សហភាព​អឺរ៉ុប ចង់​ដក​។


 
​ប្រមុខ​រដ្ឋាភិបាល​កម្ពុ​ជា លើកឡើងថា ទោះជា​គ្មាន EBA  ក៏​កម្ពុជា នៅតែមាន​សមត្ថភាព​បង់ពន្ធ ហើយ​នៅតែ​បន្ត​រកស៊ី និង​នាំ​ទំនិញ​ទៅកាន់​ទីផ្សារ​អឺរ៉ុប​ដដែល​។ ប៉ុន្តែ ប្រមុខ​រដ្ឋាភិបាល អះអាងថា បើ​បាត់បង់ EBA មែន ហាក់ដូចជា​បាត់បង់​អ្វីៗ ដែល​សហភាព​អឺរ៉ុប​ធ្លាប់ជួយ​កម្ពុជា​។ ប្រមុខ​រដ្ឋាភិបាល សង្កត់ធ្ងន់​ដូច្នេះ​ថា​៖«​គេ​ត្រូវតែ​យល់ សមិទ្ធផល​ដែល​អ្នក​ទាំងឡាយ​បាន​ជួយ​ខ្ញុំ​រយៈពេល​កន្លងទៅ ដូចជា​អំបិល​ត្រូវ​ទឹក​»​។​
 
​លើសពីនេះ មេដឹកនាំ​កម្ពុជា ចាត់ទុក​ការដក EBA ថា​ដូចជា​ការរួមចំណែក​ស​ម្លា​ប់​ក្រុម​អ្នកប្រឆាំង​។ មេដឹកនាំ​រូបនេះ ប្រាប់​ទៅ​សហភាព​អឺរ៉ុប​ថា​៖«​ខ្ញុំ​គ្រាន់តែ​ផ្តាំ​ប៉ុណ្ណឹង​ទេ ព្រោះ​អ្នកឯង គ្មាន​សិទ្ធិ​អ្វី​មក​និយាយ​ជាមួយ​ខ្ញុំ​ទៀត​ទេ​»​។ 
 
​យ៉ាងណា សម្តេច ហ៊ុន សែន ប្រកាសថា ខ្លួន​នៅតែ​បើក​ការសន្ទនា​ជាមួយ​សហភាព​អឺរ៉ុប ពី​បញ្ហា EBA ប៉ុន្តែ​មិនត្រូវ​ដាក់​លក្ខខណ្ឌ​ណាមួយ ដែល​ប៉ះពាល់ ឬ​រំលោភ​អធិបតេយ្យ​របស់​កម្ពុជា​ឡើយ​។ សម្តេច ថ្លែងថា​៖«​បើ​គេ​នៅ​ឲ្យ​ក៏​ល្អ តែបើ​គេ​យកទៅ​វិញ អាហ្នឹង​ក៏​យើង​មិនដឹង​ធ្វើ​ម៉េច​ដែរ​»​។ 
 
​ទន្ទឹមនឹងនេះ សម្តេចនាយក​រដ្ឋមន្ត្រី បាន​ក្រើនរម្លឹក​ឲ្យ​មន្ត្រីរាជការ ពង្រឹងសមត្ថភាព និង​ខិតខំ​ធ្វើការ ដើម្បី​ធានាថា សេដ្ឋកិច្ចកម្ពុជា​មិន​ដួលរលំ ពេល​បាត់បង់​ប្រព័ន្ធ​អនុគ្រោះ​ពន្ធ​។ សម្តេច សង្កត់​ធ្ងន់​ដូច្នេះ​ថា​៖«​មាន EBA មិនអាច​ក្លាយជា​អ្នកមាន បាត់ EBA ក៏​មិន​ងាប់​ដែរ​។ តែ​យើង​ត្រូវ​ប្រឹង​ខ្លួនឯង​មួយ​ជា​ពីរ​។ អ្វីដែល​ខ្ញុំ​បារម្ភ មិនមែន​បញ្ហា​បាត់ ឬ​មិន​បាត់ EBA ទេ បារម្ភ​ខ្លាច​ភាពស្ពឹក​ស្រពន់​របស់​មន្ត្រីរាជកា​រ​យើង​»៕ 

Tag:
 ហ៊ុន សែន​
  EU
  EBA
© រក្សាសិទ្ធិដោយ thmeythmey.com