ពិព័រណ៍រូបថត«ទឹកជាជីវិត»បង្ហាញពីកង្វះទឹកស្អាតប្រើប្រាស់របស់ពលរដ្ឋនៅតំបន់ដាច់ស្រយាល

ជាតិ

សង្គមជាតិ

ពិព័រណ៍រូបថត«ទឹកជាជីវិត»បង្ហាញពីកង្វះទឹកស្អាតប្រើប្រាស់របស់ពលរដ្ឋនៅតំបន់ដាច់ស្រយាល

06, Jul 2019 , 11:29 am

រូបភាព

ដោយ:

ភ្នំពេញ៖ រូបថតប្រមាណ ១១៥សន្លឹក ត្រូវបានយុវជនចំនួន១១នាក់ ដែលស្ថិតនៅក្នុងសហគមន៍ ខុសៗគ្នានៅកម្ពុជា យកមកតាំងបង្ហាញនៅពិព័រណ៍ក្រោមប្រធានបទ «ទឹកជាជីវិត៖គ្មាននរណាម្នាក់ត្រូវបានទុកចោល»។ ពិព័រណ៍នេះ រៀបចំដោយក្រសួងអភិវឌ្ឍន៍ជនបទ និងអង្គការវ័តធឺអេតកម្ពុជា នៅមជ្ឈមណ្ឌលបុប្ឆាណា ចាប់ពីថ្ងៃទី១ ដល់ថ្ងៃទី២៧ ខែកក្កដា។ តាំងពិព័រណ៍រូបថតទាំងនេះ បង្ហាញពីស្ថានភាពជាក់ស្តែង និងបញ្ហាប្រឈម ទាក់ទងនឹងទឹក និងជីវិត ដែលកើតមាននៅសហគមន៍ដាច់ស្រយោលបំផុតក្នុងប្រទេសកម្ពុជា។

លោក ទ្រី មេង រដ្ឋលេខាធិការនៃក្រសួងអភិវឌ្ឍន៍ជនបទ បានបញ្ជាក់ថា ការតាំងពិព័រណ៍រូបថតដែលទាក់ទងនឹង ទឹកជាជីវិត គឺជាការឆ្លុះបញ្ចាំងឲ្យឃើញបញ្ហាប្រឈមរបស់ពលរដ្ឋរស់នៅតំបន់ដាច់ស្រយាល ដែលជួបប្រទះពីបញ្ហាកង្វះទឹកស្អាតប្រើប្រាស់ និងស្រោចស្រពដំណាំភោគផល។ ការរៀបចំឲ្យមានការតាំងពិព័រណ៍នេះ គឺក្នុងបំណងឲ្យយុវជន ដែលរស់នៅតាមតំបន់ណាមួយ រៀបរាប់នូវបញ្ហាព្រឹត្តិការណ៍ជាក់ស្តែងណាមួយ តាមរយៈរូបថតដែលពួកគេបានថត។

រដ្ឋលេខាធិការនៃក្រសួងអភិវឌ្ឍន៍ជនបទរូបនេះ អះអាងថា កន្លងមករាជរដ្ឋាភិបាល មានយុទ្ធសាស្ត្រផ្គត់ផ្គង់ទឹកស្អាតជនបទឲ្យបានយ៉ាងហោចណាស់៥០ភាគរយនៅក្នុងឆ្នាំ២០១៥ ជាលទ្ធផលនៅចន្លោះឆ្នាំ២០១៤ ដល់ឆ្នាំ២០១៦ សម្រេចបាន៦០ភាគរយ។ ក្រសួងនឹងមានយុទ្ធសាស្ត្រសម្រេចឲ្យបាន៩០ភាគរយសម្រាប់ផ្គត់ផ្គង់ទឹកស្អាតនៅឆ្នាំ២០២៥។ ដើម្បីសម្រេចបានយុទ្ធសាស្ត្រនេះ ក្រសួងបានដាក់ចេញផែនការមួយចំនួនដូចជា គោលការណ៍គិតគូរពីប្រជាពលរដ្ឋក្រីក្រ ប្រជាជនដែលងាយរងគ្រោះ ជនដែលមានពិការភាព ប្រជាជនដែលរស់នៅតំបន់ប្រឈម និងបញ្ហាការប្រែប្រួលអាកាសធាតុ។

លោក ម៉ក់ រ៉េមីស្សា អ្នកថតរូបអាជីព និងជាអ្នកបណ្តុះបណ្តាលផ្នែកថតរូប ដល់យុវជនទាំង១១នាក់ បាននិយាយថា រូបថតពិតជាមានសក្តានុពល ដើម្បីបង្ហាញពីរឿងរ៉ាវអ្វីមួយដែលកើតឡើងសម្រាប់រកដំណោះស្រាយ និងអត្ថន័យរបស់វា។ សម្រាប់លោក ម៉ក់ រ៉េមីស្សា លោកចង់ឲ្យយុវជនជំនាន់ក្រោយ ស្រឡាញ់អាជីពជាអ្នកថតរូប ដើម្បីសិក្សាពីជំនាញថតរូប និងបង្ហាញពីអត្ថន័យនៃរូបថត។ លោក ក៏ចង់ឲ្យក្រសួងនានារៀបចំ ការតាំងពិព័រណ៍បែបនេះ ឲ្យកាន់តែច្រើនបន្ថែមទៀត ដើម្បីលើកទឹកចិត្តឲ្យអ្នកដែលស្រឡាញ់វិស័យថតរូប ចូលរួមអភិវឌ្ឍវិស័យថតរូបនៅកម្ពុជា ឲ្យកាន់តែប្រសើរឡើង។

រូបថត១០សន្លឹក ដែលបង្ហាញពីការប្រើប្រាស់ទឹកស្អាតនៅតាមសាលារៀន គឺជាស្នាដៃរបស់យុវជន យូសុះ អាប់ឌុលរ៉ាស់ហ៊ឹម មកពីខេត្តត្បូងឃ្មុំ ដែលថតបាននៅក្នុងតំបន់ដែលខ្លួនរស់នៅ។ យុវជនរូបនេះបាននិយាយថា ខ្លួនជ្រើសរើសរូបថតដែលទាក់ទងនឹងការប្រើប្រាស់ទឹកស្អាតនៅតាមសាលារៀន ព្រោះទឹកជាជីវិត សម្រាប់ផ្គត់ផ្គង់ដល់សិស្សានុសិស្ស។ រូបថតដែលលោកតាំងបង្ហាញនេះ លោកចង់ឲ្យអង្គការនានា ជួយផ្គត់ផ្គង់ទឹកស្អាតដល់សហគមន៍ ក៏ដូចជាតាមសាលារៀន ដើម្បីឲ្យសិស្សានុសិស្សមានទឹកស្អាតប្រើប្រាស់គ្រប់គ្រាន់។

ទើបតែប្រឡូកចូលក្នុងវិស័យថតរូបរយៈពេល១ឆ្នាំ លោក យូសុះ អាប់ឌុលរ៉ាស់ហ៊ឹម ចង់បង្កើតរូបថតជាច្រើនទៀត ដែលទាក់ទងនឹងបញ្ហាបារី ដើម្បីផ្សព្វផ្សាយដល់សាធារណជន បានឃើញពីស្ថានភាព និងបញ្ហាប្រឈមនៃការប្រើប្រាស់បារី។ ទន្ទឹមនឹងនេះ អ្នកខេត្តត្បូងឃ្មុំរូបនេះ នឹងចូលរួមការតាំងពិព័រណ៍រូបថតនៅថ្ងៃមុខទៀត ដើម្បីបង្ហាញស្នាដៃដែលខ្លួនបានថត ទៅឲ្យមហាជន និងជនបរទេសបានស្គាល់ផងដែរ។

ម្ចាស់ស្នាដៃរូបថតម្នាក់ទៀត គឺកញ្ញា ផល ករុណា ជាអ្នករស់នៅខេត្តកណ្តាល។ ករុណា មានរូបថត៩ សន្លឹក រៀបរាប់ពីជីវភាពរស់នៅរបស់ពលរដ្ឋនៅតាមដងទន្លេមេគង្គ។ តាមម្ចាស់ដៃរូបនេះ រូបថតដែលនាងយកមកដាក់បង្ហាញ គឺដើម្បីបង្ហាញថា ពលរដ្ឋដែលរស់នៅតាមដងទន្លេ មានទឹកប្រើប្រាស់គ្រប់គ្រាន់ ប៉ុន្តែពួកគេមិនបានប្រើប្រាស់ទឹក និងថែរក្សាឲ្យបានត្រឹមត្រូវនៅឡើយ។ មូលហេតុមួយទៀត គឺករុណា ចង់ឲ្យពលរដ្ឋមានស្មារតី និងគិតគូរឡើងវិញពីការចោលសំរាមទៅក្នុងទឹកទន្លេ ដែលនាំឲ្យប៉ះពាល់ដល់ទឹក និងសុខភាព តាមរយៈរូបថតរបស់ខ្លួន។ កញ្ញាបញ្ជាក់ថា៖«ខ្ញុំចំណាយពេល៥ថ្ងៃ ដើម្បីផ្តិតយករូបភាព និងស្ថានភាពការរស់នៅ របស់ពលរដ្ឋតាមដងទន្លេមេគង្គ។ វាពិតជាបានធ្វើឲ្យខ្ញុំឃើញ និងយល់កាន់តែច្បាស់ ពីបញ្ហាដែលពលរដ្ឋកំពុងប្រឈម។

របាយការណ៍ស្តីពីការអង្កេតសេដ្ឋកិច្ចសង្គមឆ្នាំ២០១៧ បានបង្ហាញថា បច្ចុប្បន្នកម្ពុជា ជួបបញ្ហាកង្វះទឹកស្អាតប្រើប្រាស់ ដោយសារតែការប្រែប្រួលអាកាសធាតុ។ តាមការប៉ាន់ប្រមាណ ៤០ភាគរយនៃប្រជាជនសរុបមិនទាន់ទទួលបានទឹកស្អាតប្រើប្រាស់ និងប្រមាណ ២៩ភាគរយ មិនទាន់មានបង្គន់ប្រើប្រាស់នៅឡើយ៕