អន្តរជាតិ
នយោបាយអន្តរជាតិ
ចិនទាត់ចោលសម្តីអាមេរិកដែលថា ខ្លួនបាញ់សាកល្បងមីស៊ីលនៅសមុទ្រចិនខាងត្បូង
× រដ្ឋាភិបាលក្រុងប៉េកាំង បានច្រានចោលរបាយការណ៍របស់មន្ទីរបញ្ចកោណរបស់ក្រុងវ៉ាស៊ីនតោន ដែល ថា កងទ័ពចិន បាញ់សាកល្បងមីស៊ីលនៅក្នុងតំបន់ជម្លោះសមុទ្រចិនខាងត្បូង។ ក្រុងប៉េកាំង អះអាងថា សកម្មភាពយោធារបស់ខ្លួន ធ្វើឡើងតាមទម្លាប់ ដែលកំណត់ទុកជាមុននោះទេ។
អ្នកនាំពាក្យក្រសួងការពារជាតិចិន នៅថ្ងៃ៥ កក្កដា បានផ្ទុះប្រតិកម្មទៅនឹងរបាយការណ៍របស់រដ្ឋាភិបាលអាមេរិក ដែលចោទប្រកាន់ថា ចិន បានបាញ់សាកល្បងមីស៊ីលនៅក្នុងសមុទ្រចិនខាងត្បូង និងចោទចិន ថាបានបំពាននឹងការសន្យារបស់ខ្លួនក្នុងការមិនធ្វើយោធូបនីយកម្មនៅក្នុងតំបន់កំពុងតែមានវិវាទនេះ។ នេះបើយោងតាមការការចុះផ្សាយរបស់សារព័ត៌មាន Japan Times។
តាមប្រភពព័ត៌មានដដែលនោះ មន្ត្រីរបស់រដ្ឋាភិបាលអាមេរិក បានអះអាងថា តាមរបាយការណ៍បឋមរបស់ខ្លួន ចិន បានធ្វើការសាកល្បងបាញ់មីស៊ីលប្រឆាំងនាវាជាច្រើនគ្រាប់កាលពីសប្តាហ៍មុន នៅក្នុងសមុទ្រចិនខាងត្បូង។ មន្ត្រីដដែលនោះ បន្ថែមថា ការវិភាគលម្អិត នៃព្រឹត្តិការណ៍នោះ កំពុងតែស្ថិតនៅក្នុងដំណើរការ។
ក៏ប៉ុន្តែតាមការអះអាងរបស់អ្នកនាំពាក្យក្រសួងការពារជាតិវិញ ការអះអាងនេះ មិនឆ្លុះបញ្ចាំងពីការពិតនោះទេ។ អ្នកនាំពាក្យ បន្ថែមថា ថ្មីៗនេះ កងទ័ពរំដោះរប្រជាជនចិន បានរៀបចំការធ្វើសមយុទ្ធបាញ់គ្រាប់ពិតនៅក្បែរកោះហៃណាន ដែលជាកម្មវិធីលំហាត់ប្រចាំឆ្នាំ ដែលអ្នកនាំពាក្យហ៊ានអះអាងថា មិនមានគោលដៅលើប្រទេស ឬទិសដៅណាមួយនោះទេ។
ពាក់ព័ន្ធបញ្ហានេះ អ្នកនាំពាក្យក្រសួងការបរទេសចិន ក៏បានមានយោបល់ខ្លះដែរ។ ក្នុងសន្និសីទសារព័ត៌មានរបស់ក្រសួងខ្លួន អ្នកនាំពាក្យ គូសបញ្ជាក់ថា គឺអាមេរិកនោះទេ ដែលបញ្ជូននាវាដឹកយន្តហោះរបស់ខ្លួនទៅកាន់សមុទ្រចិនខាងត្បូង ហើយសហគមន៍អន្តរជាតិ បានឃើញច្បាស់ដូចគ្នាថាអ្នកណា ដែលកំពុងតែធ្វើយោធូបនីយកម្មនៅក្នុងសមុទ្រចិនខាងត្បូងពិតប្រាកដ។
គួររម្លឹកផងដែរថា សមុទ្រចិនខាងត្បូង គឺជាសមុទ្រជម្លោះដែលមានរដ្ឋពាក់ព័ន្ធដោយផ្ទាល់រួមមានរដ្ឋ ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិននោះទេ។ ពេលនេះ រដ្ឋពាក់ព័ន្ធកំពុងតែចរចាគ្នាក្នុងក្របខណ្ឌអាស៊ាន-ចិន ដើម្បីបង្កើតក្រមប្រតិបត្តិមួយសម្រាប់គ្រប់គ្រងសកម្មភាពនៅក្នុងតំបន់ជម្លោះ៕
Tag:
ចិន
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com