អន្តរជាតិ
រដ្ឋអាជ្ញាតុលាការព្រហ្មទណ្ឌអន្តរជាតិ សុំឲ្យតុលាការផ្តល់អំណាចស៊ើបអង្កេតពេញលេញលើសំណុំរឿងមីយ៉ាន់ម៉ា
× អគ្គរដ្ឋអាជ្ញាតុលាការព្រហ្មទណ្ឌអន្តរជាតិនៅថ្ងៃ០៤ កក្កដា បានធ្វើសំណើផ្លូវការទៅកាន់ចៅក្រមរបស់តុលាការដើម្បីចេញសម្រេចគតិយុត្តមួយបើកផ្លូវដល់ការស៊ើបអង្កេតពេញលេញទៅលើស្ថានភាពរបស់មីយ៉ាន់ម៉ា ដែលបង្កឲ្យមានការចាកចេញរបស់ជនជាតិភាគតិចរ៉ូហ៊ីងយ៉ារាប់សិបម៉ឺននាក់ពីមីយ៉ាន់ម៉ាទៅកាន់បង់ក្លាដែសតាំងពីឆ្នាំ២០១៦មក។
តាមគេទំព័រផ្លូវការរបស់តុលាការព្រហ្មទណ្ឌអន្តរជាតិ ក្នុងសំណើផ្លូវការរបស់លោកស្រីរដ្ឋអាជ្ញា Fatou Bensouda លោកស្រីរដ្ឋអាជ្ញា បានស្នើឲ្យអង្គជំនុំជម្រះរបស់តុលាការផ្តល់សិទ្ធិអំណាចដើម្បីឲ្យលោកស្រី អាចបើកការស៊ើបអង្កេតមួយលើបទឧក្រិដ្ឋតាមយុត្តាធិការរបស់តុលាការលើករណីហិង្សាក្នុងរដ្ឋរ៉ាខាន (Rakhine) របស់មីយ៉ាន់ម៉ា។
តាមរយៈសំណើនោះ លោកស្រីរដ្ឋអាជ្ញា ចង់បើកការស៊ើបអង្កេតករណីហិង្សារបស់មីយ៉ាន់ម៉ានៅក្នុងអធិបតេយ្យរបស់បង់ក្លាដែស ដែលជាភាគីរបស់តុលាការ។ លោកស្រី ស្នើបែបនេះ ក៏ព្រោះតែមីយ៉ាន់ម៉ា មិនមែនជាភាគីរបស់តុលាការ ក៏ប៉ុន្តែព្រឹត្តិការណ៍ដែលកើតឡើងនៅក្នុងប្រទេសមីយ៉ាន់ម៉ា មានទំនាក់ទំនងជាមួយនឹងបង់ក្លាដែស ដែលចំណុចនេះហើយ ធ្វើឲ្យលោកស្រី មានលទ្ធភាពដើម្បីស្វែងរកយុត្តិធម៌សម្រាប់ជនរងគ្រោះ។
អ្វីដែលគួរឲ្យកត់សម្គាល់នោះ ការស្នើរបស់តំណាងសាធារណៈនៃតុលាការព្រហ្មទណ្ឌអន្តរជាតិរូបនេះ ធ្វើឡើងបន្ទាប់ពី លោកស្រី បានបញ្ចប់ការធ្វើការពិនិត្យជាបឋមលើស្ថានភាពរបស់មីយ៉ាន់ម៉ា ដោយលោកស្រី បានរកឃើញថា ជនជាតិភាគតិចរ៉ូហ៊ីងយ៉ាជាង៧០ម៉ឺននាក់ បានចាកចេញពីមីយ៉ាន់ម៉ាទៅបង់ក្លាដែស ដោយសារតែអំពើគំរាមកំហែងគ្រប់រូបភាព ដែលចាប់ផ្តើមតាំងពីឆ្នាំ២០១៦មក។
គួរជម្រាបផងដែរថា វិបត្តិជនភៀសខ្លួនរ៉ូហ៊ីងយ៉ា ដែលចាប់ផ្តើមផ្ទុះខ្លាំងនៅចុងឆ្នាំ២០១៧ ត្រូវបានរបាយការណ៍របស់អង្គការសិទ្ធិមនុស្ស រួមទាំងអ្នកជំនាញអង្គការសហប្រជាជាតិ អះអាងថា មានជាប់ពាក់ព័ន្ធជាមួយនឹងយោធាជាន់ខ្ពស់របស់មីយ៉ាន់ម៉ា ហើយហេតុការណ៍នេះ កើតឡើងជាលក្ខណៈប្រព័ន្ធផងដែរ៕
Tag:
មីយ៉ាន់ម៉ា
រ៉ូហ៊ីងយ៉ា
ICC
© រក្សាសិទ្ធិដោយ thmeythmey.com