អន្តរជាតិ
ទីម័រខាងកើត បានភ្លើងបៃតងពីរដ្ឋអាស៊ាន៨ ដើម្បីក្លាយជាសមាជិកទី១១ រូបភាព Infofoto
× រដ្ឋាភិបាលក្រុងឌីលី បានអះអាងថា ខ្លួនទទួលបានការផ្តល់ទំនុកចិត្ត និងការធានាអះអាងពីរដ្ឋាភិបាលបានដាស៊េរីបេហ្គាវ៉ាន់ ក្នុងការក្លាយជាសមាជិកផ្លូវការរបស់អាស៊ាន។ ក្រុងឌីលី ហ៊ានលើកឡើងជាមួយនឹងការជឿជាក់ខ្ពស់ថា មិនយូរទៀតនោះទេ សមាគមប្រជាជាតិអាស៊ីអាគ្នេយ៍ នឹងព្រមទទួលយកខ្លួនជាសមាជិកពេញសិទ្ធិហើយ។
រដ្ឋមន្ត្រីការបរទេសទីម័រខាងកើត លោក Dionisio Babo Soares នៅថ្ងៃ៤ កក្កដាកន្លងទៅ បានបញ្ជាក់ក្នុងកិច្ចសម្ភាសន៍ជាមួយនឹងសារព័ត៌មាន The Scoop ថា លោក បានទទួលការអះអាងដោយផ្ទាល់តែម្តងពីប្រមុខរដ្ឋព្រុយណេ គឺព្រះមហាក្សត្រ Sultan ក្នុងការគាំទ្រទីម័រខាងកើតចូលជាសមាជិករបស់អាស៊ាន។
តាមរយៈការគាំទ្រមួយនេះ លោករដ្ឋមន្ត្រី ក៏បានផ្ញើសារដោយប្រយោលទៅកាន់បណ្តារដ្ឋសមាជិកអាស៊ាន ដែលសេសសល់ ពោលគឺរដ្ឋដែលនៅមានការស្ទាក់ស្ទើរក្នុងការទទួលយកទីម័រខាងកើតជាក្រុមគ្រួសារតែមួយ ឲ្យពិចារណាឡើងវិញ។
តាមការអះអាងរបស់លោករដ្ឋមន្ត្រី បច្ចុប្បន្ន លោកកំពុងតែបំពេញបេសកកម្មមួយគឺស្វែងរកការពិគ្រោះយោបល់ និងបកស្រាយ ក៏ដូចជាស្វែងយល់ចិត្តពីបណ្តារដ្ឋសមាជិកអាស៊ានទាំងដប់ ថាតើពួកគេ មានឆន្ទៈក្នុងការទទួលយកទីម័រខាងកើត ជាផ្នែកមួយនៃក្រុមគ្រួសារ ឬយ៉ាងណា។
សម្រាប់លោករដ្ឋមន្ត្រី ក្នុងដំណើរទស្សនកិច្ច និងបេសកកម្មទៅកាន់បណ្តាប្រទេសចំនួន៨ របស់អាស៊ានកន្លងមកនេះ លោក ទទួលបានសញ្ញាវិជ្ជមានច្រើន ដែលលោក អាចហ៊ានអះអាងថា គឺមិនយូរនោះទេ ទីម័រខាងកើត នឹងក្លាយជាសមាជិកអាស៊ានជាផ្លូវការហើយ។ ប្រទេស២ទៀត ដែលទីម័រខាងកើត ត្រូវបំពេញបេសកកម្មការទូតនោះគឺ ហ្វីលីពីន និងសិង្ហបុរី។
គួរជម្រាបបន្តិចថា ទីម័រខាងកើត ដែលជារដ្ឋក្មេងខ្ចីជាងគេនៅក្នុងតំបន់អាស៊ីអាគ្នេយ៍ បានដាក់សំណើផ្លូវការសុំជាសមាជិកអាស៊ានតាំងពីឆ្នាំ២០១១មក។ រយៈពេលប្រាំបីឆ្នាំមកនេះ ទីម័រខាងកើត ស្ថិតក្រោមការតាមដាន និងវាយតម្លៃពីក្រុមបច្ចេកទេសរបស់អាស៊ាន ដើម្បីពិនិត្យមើលលទ្ធភាពដោយឈរលើសសរស្តម្ភបី សន្តិសុខ-នយោបាយ, សេដ្ឋកិច្ច និងសង្គមវប្បធម៌។
ដើម្បីក្លាយជាសមាជិកអាស៊ាន ទីម័រខាងកើត ត្រូវតែទទួលបានការគាំទ្រជាឯកច្ឆន្ទពីរដ្ឋអាស៊ានតាមរយៈកិច្ចប្រជុំកំពូលជាមុនសិន។ កន្លងមកសិង្ហបុរី ដែលជារដ្ឋលេចធ្លោជាងគេក្នុងតំបន់ បានបដិសេធទទួលយកទីម័រខាងកើត ដោយលើកឡើងថា ទីម័រខាងកើត មិនទាន់មានសេដ្ឋកិច្ចរឹងមាំ ខណៈសន្តិសុខ-នយោបាយ នៅមិនទាន់ធានាបាននោះ៕
Tag:
ទីម័រខាងកើត
ព្រុយណេ
អាស៊ាន
© រក្សាសិទ្ធិដោយ thmeythmey.com