អន្តរជាតិ
អាហ្វ្រិក ដាក់ដំណើរការតំបន់ពាណិជ្ជកម្មសេរីដែលធំជាងគេលើពិភពលោក អាហ្វ្រិក ដាក់ដំណើរការតំបន់ពាណិជ្ជកម្មសេរីដែលធំជាងគេលើពិភពលោក។ រូបភាព AFP
× ប្រទេសនៅតំបន់អាហ្វ្រិក នៅថ្ងៃទី៧ ខែកក្កដា បានចាប់ដំណើរការកិច្ចព្រមព្រៀងពាណិជ្ជកម្មសេរីនៅទ្វីបអាហ្វ្រិក ដែលនឹងបង្កើតជាតំបន់ពាណិជ្ជកម្មសេរីធំជាងគេលើពិភពលោក។ ក្រោយការចរចាអស់ជាច្រើនឆ្នាំ កិច្ចព្រមព្រៀងពាណិជ្ជកម្មដ៏ធំនេះ ជាជំហានប្រវត្តិសាស្ត្រសម្រាប់អាហ្វ្រិកដែលសម្បូរធនធាន តែក្រីក្រក្នុងគោលដៅបង្កើតសន្តិភាព និងវិបុលភាពនៅទ្វីបមួយនេះ។ ប៉ុន្តែភាពអន់ថយនៃហេដ្ឋារចនាសម្ព័ន្ធ និងអំពើហិង្សា ជាឧបសគ្គដ៏ធំសម្រាប់ប្រទេសអាហ្វ្រិក។
១៧ឆ្នាំក្រោយការចរចាយ៉ាងតឹងតែងលើផ្លូវរដាក់រដុបមក កិច្ចព្រមព្រៀងពាណិជ្ជកម្មសេរីនៅអាហ្វ្រិក បានដាក់ឲ្យដំណើរការហើយ។ មេដឹកនាំអាហ្វ្រិករំពឹងថា កិច្ចព្រមព្រៀងនេះនឹងបង្កើតតំបន់ពាណិជ្ជកម្មសេរីធំជាងគេរបស់ពិភពលោក ព្រោះប្រទេសនៅអាហ្វ្រិកចំនួន៥៤ បានចុះហត្ថលេខាលើកិច្ចព្រមព្រៀងនេះ។ នីហ្សេរីយ៉ា និងបេណាំង ជាប្រទេសពីរដែលចូលជាសមាជិក្រោយគេ ខណៈអេរីត្រេមិនចូលរួមនឹងគេឡើយ។
នាកិច្ចប្រជុំកំពូលអាហ្វ្រិកនៅថ្ងៃទី៧ ខែកក្ដា នៅនីហ្សេ ប្រធានគណៈកម្មការអាហ្វ្រិក Moussa Faki បានប្រកាសចាប់ផ្ដើមដំណាក់កាលប្រតិបត្តិការនៃតំបន់ពាណិជ្ជកម្មសេរីទ្វីបអាហ្វ្រិក (AfCFTA) ។ បើតាមទីភ្នាក់ងារព័ត៌មាន AFP លោក Faki ចាត់ទុកព្រឹត្តិការណ៍នេះ ជារឿងប្រវត្តិសាស្ត្រសម្រាប់អាហ្វិក ព្រោះសុបិនចាស់ បានក្លាយជាការពិត ហើយទ្វីបអាហ្វ្រិកនឹងមានតំបន់ពាណិជ្ជកម្មសេរីធំជាងគេលើពិភពលោកទៀតផង។
តំបន់ពាណិជ្ជកម្មសេរីទ្វីបអាហ្វ្រិកដែលលេចជារូបតាំងពីខែមីនាមកនោះ នឹងច្របាច់បញ្ចូលប្រជាជន១,៣ពាន់លាននាក់ បង្កើតទៅជាប្លុកសេដ្ឋកិច្ចដែលមានទំហំ៣,៤ពាន់លានដុល្លារ ហើយកាន់តែសំខាន់នោះ គឺជំរុញការអភិវឌ្ឍសេដ្ឋកិច្ចនៅទ្វីបមួយនេះផងដែរតាមរយៈការដោះដូររវាងប្រទេស៥៤ និងការបង្កើតសង្វាក់ផលិតកម្មប្រទាក់ក្រឡាផងទៀតផង។ ប៉ុន្តែបញ្ហាប្រឈមជាច្រើន អាចធ្វើឲ្យមហិច្ឆតារបស់អាហ្វ្រិករាំងស្ទះ។
ហេដ្ឋារចនាសម្ព័ន្ធតភ្ជាប់ ជារឿងធំដែលត្រូវដោះស្រាយ។ កម្សោយនៃផ្លូវថ្នល់ និងផ្លូវរថភ្លើង ពិតជាធ្វើឲ្យការដឹកជញ្ជូនក្នុងទ្វីបដ៏ធំមួយនេះជួបបញ្ហាលំបាក។ លើសពីនោះ អំពើហិង្សាដែលអុកឡុកប្រទេសជាច្រើន ការត្រួតពិនិត្យការឆ្លងដែនដ៏តឹងរ៉ឹង និងអំពើពុករលួយដែលស្ទើរក្លាយជាប្រពៃណីរបស់អាហ្វ្រិកទៅហើយនោះ សុទ្ធតែជាឧបសគ្គដល់ការអនុវត្តឲ្យមានប្រសិទ្ធភាពនូវកិច្ចព្រមព្រៀងពាណិជ្ជកម្មសេរីមួយនេះ។
សន្តិសុខ ដែលជាបញ្ហាសំខាន់ត្រូវដោះស្រាយ ក៏ជាប្រធានបទនៃជំនួបមេដឹកនាំអាហ្វ្រិកនៅរដ្ឋធានីនីញ៉ាម៉េផងដែរ។ មេដឹកនាំអាហ្វ្រិកបានផ្ដោតសំខាន់លើជម្លោះប្រដាប់អាវុធនៅតំបន់ Sahel ដែលរងការអុកឡុកដោយក្រុមជ្រុលនិយមជាច្រើន។ ប្រទេសចំនួនប្រាំមកពីតំបន់ Sahel មាន ឆាដ ម៉ាលី បួគីណាហ្វាសូ ម៉ូរីតានី និងនីហ្សេ បានស្នើឲ្យប្រទេសក្នុងតំបន់ជួយជំរុញយន្តការអង្គការសហប្រជាជាតិដើម្បីដោះស្រាយការគំរាមកំហែងភេរវកម្ម៕
© រក្សាសិទ្ធិដោយ thmeythmey.com