អន្តរជាតិ
ប្រមុខរដ្ឋាភិបាលហុងកុង៖ សំណើច្បាប់ធ្វើបត្យាប័នជាមួយចិន ស្លាប់បាត់ហើយ
ប្រធានប្រតិបត្តិការតំបន់រដ្ឋបាលពិសេសងហុងកុង Carrie Lam ក្នុងសន្និសីទសារព័ត៌មាន។ រូបភាព AFP
×![]()
ដោយ: តន ចាន់រិទ្ធារ៉ា
ប្រមុខដឹកនាំហុងកុង Carrie Lam នៅថ្ងៃទី៩ ខែកក្កដានេះ បានប្រកាសថា សំណើច្បាប់ធ្វើបត្យាប័នជាមួយបរទេសដែលរាប់បញ្ចូលចិនផងនោះ បានស្លាប់ហើយ។ ទោះជាយ៉ាងណា មេដឹកនាំហុងកុងរូបនេះមិនបញ្ជាក់ទេថា សេចក្ដីព្រាងច្បាប់ចម្រូងចម្រាសនេះ ត្រូវគ្រវែងចោលឬយ៉ាងណាឡើយ។ អំឡុងពេលធ្វើសន្និសីទសារព័ត៌មានក្នុងបញ្ចេញមុខដ៏កម្រនេះ លោកស្រី Lam ទទួលស្គាល់ថា ហុងកុងកំពុងប្រឈមមុខការផ្លាស់ប្ដូរមិនធ្លាប់មាន ដែលត្រូវដោះស្រាយឲ្យបាន។ 
«នៅតែមានការសង្ស័យពីភាពស្មោះត្រង់របស់រដ្ឋាភិបាល ឬការបារម្ភថា រដ្ឋាភិបាលអាចចាប់ផ្ដើមនីតិវិធីរបស់សំណើធ្វើបត្យាប័នជាថ្មី។ ដូច្នេះខ្ញុំបញ្ជាក់ថា គ្មានគម្រោងបែបនេះឡើយ ហើយសំណើច្បាប់នោះ ក៏ស្លាប់បាត់ដែរ។» នេះជាការប្រកាសរបស់ប្រធានប្រតិបត្តិតំបន់រដ្ឋបាលពិសេសហុងកុងលោកស្រី Carrie Lam នៅថ្ងៃទី៩ ខែកក្កដា ជុំវិញសំណើច្បាប់ដ៏ចម្រូងចម្រាសដែលនាំទៅដល់ការធ្វើបាតុកម្មជាបន្តបន្ទាប់នោះ។
បាតុកម្មចុងក្រោយកើតឡើងនៅថ្ងៃទី៧ ខែកក្កដា ដោយក្រុមបាតុករបន្តទាមទារឲ្យរដ្ឋាភិបាលគ្រវែងសំណើច្បាប់ធ្វើបត្យាប័នចោល ទោះជាលោកស្រី Lam ធ្លាប់បានបញ្ជាក់ហើយថា សេចក្ដីព្រាងច្បាប់នេះ ត្រូវព្យួរដោយគ្មានការកំណត់ក្ដី។ ក្នុងសន្និសីទសារព័ត៌មានថ្ងៃទី៩ ខែកក្កដា លោកស្រី Lam សារភាពថា ការប្រឹងប្រែងរបស់រដ្ឋាភិបាលលោកស្រីក្នុងការជំរុញសេចក្ដីព្រាងច្បាប់មួយនេះ បានបរាជ័យទៅហើយ។
ប្រមុខដឹកនាំរដ្ឋបាលពិសេសរូបនេះ លើកឡើងថា ហុងកុងបានជួបបញ្ហាដែលធ្លាប់មានពីមុនដែលអាចជាបញ្ហាសេដ្ឋកិច្ច ជីវភាពរបស់ប្រជាជន និងការបែកបាក់ក្នុងសង្គមជាដើម។ ដូចនេះ រឿងទីមួយដែលត្រូវធ្វើ គឺកំណត់បញ្ហា ដើម្បីរកដំណោះស្រាយបន្តទៅមុខទៀត។ យ៉ាងណាមិញ លោកស្រី Lam មិនបាននិយាយឲ្យច្បាស់ថា សេចក្ដីព្រាងច្បាប់ធ្វើបត្យាប័នដែលលោកស្រីថា បានស្លាប់ហើយនេះ នឹងត្រូវបោះចោលតាមការទាមទារឬយ៉ាងណាទេ។
រលកនៃការធ្វើបាតុកម្ម បានកើតឡើងជាបន្តបន្ទាប់តាំងពីខែមិថុនាមក។ ពេលខ្លះបាតុករអហិង្សា ក៏ប្រែទៅជាហិង្សារហូតមានការប៉ះទង្គិចរវាងបាតុករវ័យក្មេង និងប៉ូលិសហុងកុងទៀតផង។ ក្រុមបាតុករបានស្នើឲ្យមានការបង្កើតគណៈកម្មការស៊ើបអង្កេតថ្នាក់ខ្ពស់មួយដើម្បីស្វែងរកការពិត ប៉ុន្តែសំណើនេះ ត្រូវបានលោកស្រី Lam មិនពិចារណាឡើយ។ មេដឹកនាំហុងកុងរូបនេះ បានទុកឲ្យក្រុមស៊ើបអង្កេតប៉ូលិសចាត់ចែងការងាររបស់ខ្លួន។
ក្នុងការធ្វើបាតុកម្មចុងក្រោយ ប៉ូលិសបានចាប់ខ្លួនមនុស្ស៦នាក់ ខណៈបាតុកម្មបានតម្រង់ទិសដាក់ប្រជាជនចិនវិញម្ដង។ ក្រុមបាតុករ ទំនងចង់ផ្ញើសារទុក្ខលំបាករបស់ពួកគេឲ្យប្រជាជនដីគោកដឹងឮ និងស្វែងយល់ពីការរស់នៅរបស់ពួកគេផងដែរ។ ដូចដឹងស្រាប់ ហុងកុងជាទឹកដីចិនតែមួយគត់ដែលបាតុកម្មអាចធ្វើឡើងដោយសារសេរី ប៉ុន្តែសិទ្ធិមូលដ្ឋាននេះ ហាក់ថមថយនាពេលចុងក្រោយ ខណៈប៉េកាំងហាក់លូកដៃចូលខ្លាំងក្នុងកិច្ចការទីក្រុងស្វយ័តនេះទៀត៕
Tag:
ចិន
ហុងកុង
Carrie Lam
© រក្សាសិទ្ធិដោយ thmeythmey.com
