ក្រុមយុវជនបាល់ទាត់អាយុក្រោម២០ឆ្នាំព្រែកប្រា ដែលសមាជិកភាគច្រើនជាយុវជនលេងបាល់ទាត់ប្រចាំភូមិបានក្លាយជាម្ចាស់ជើងឯកពានរង្វាន់ស្មាតលីគអាយុក្រោម២០ឆ្នាំរបស់ក្លិបបាល់ទាត់ភ្នំពេញក្រោន។ ទម្រាំទទួលបានលទ្ធផលល្អបែបនេះព្រែកប្រាកីឡាបានចំណាយពេល២ខែក្នុងការប្រមូលផ្តុំហ្វឹកហាត់ និង៣ឆ្នាំក្នុងការចូលរួមពានរង្វាន់នេះ។ ជ័យជម្នះនេះ វាជាជំហានមួយ ដើម្បីឈានទៅប្រជែងក្នុងពានរង្វាន់ពាក់កណ្តាលអាជីព KMH នាពេលខាងមុខ។
លោក សារី អាស្នាវី ជំនួយការគ្រូបង្វឹកក្រុមព្រែកប្រាកីឡាបាននិយាយថា ការលេងសហការជាក្រុម និងការប្រើឆន្ទៈលេងដោយតម្កល់ផលប្រយោជន៍ក្រុមជាធំ បានជួយឲ្យក្រុមព្រែកប្រា ក្លាយជាម្ចាស់ជើងឯកពានរង្វាន់ស្មាតលីគអាយុក្រោម២០ឆ្នាំ របស់ក្លិបបាល់ទាត់ភ្នំពេញក្រោន។ ជំនួយការគ្រូបង្វឹករូបនេះបានអះអាងថា កីឡាករព្រែកប្រាភាគច្រើន គឺជាយុវជន ដែលជ្រើសរើសនៅក្នុងភូមិ ហើយពួកគេគ្រាន់តែជាអ្នកចូលចិត្តលេងបាល់ធម្មតា មិនមែនជាកីឡាករលេងឲ្យក្លិបអាជីពណាមួយនោះឡើយ។
ក្រុមព្រែកប្រាកីឡាពេលលើកពានស្មាតលីគអាយុក្រោម២០ឆ្នាំ កាលពីពេលកន្លងទៅ
«ក្រុមខ្ញុំមិនមែនជាក្រុមអាជីពនោះទេ គ្រាន់តែថា កីឡាករភាគច្រើនប្រើឆន្ទៈលេងដើម្បីទាំងអស់គ្នាមិនមែនដើម្បីតែឯង។ ពួកគេលេងទាំងអស់គ្នា គឺប្រើទឹកចិត្តលេង សហការគ្នាជាក្រុម ទើបជួយឲ្យយើងអាចយកឈ្នះគូប្រកួត និងទទួលបានជោគជ័យនៅពេលនេះ»។ នេះជាការបញ្ជាក់របស់លោក សារី អាស្នាវី ក្នុងពិធីទទួលពានរង្វាន់កាលពីថ្ងៃទី៧ កក្កដា កន្លងទៅ។
ជាមួយការបង្ហាញអារម្មណ៍រំភើបសប្បាយរីករាយចំពោះជ័យជម្នះ លោក អាស្នាវី បានបន្ថែមថា ដើម្បីត្រៀមប្រកួតក្នុងពានរង្វាន់នេះក្រុមព្រែកប្រាបានប្រមូលផ្តុំហ្វឹកហាត់មុនពីរខែ ដោយមួយសប្តាហ៍ហ្វឹកហាត់៥ថ្ងៃ ១ថ្ងៃពីរម៉ោង។ ក្រុមនេះធ្លាប់ចូលរួមប្រកួតពានរង្វាន់នេះបានពីរលើករួចមកហើយ ដោយលើកទី១ទទួលបានចំណាត់ថ្នាក់លេខ៣ និងទី២បានលេខ២។
ថ្នាក់ដឹកនាំរូបនេះបានចាត់ទុកជ័យជម្នះខាងលើ ជាជំហានមួយដ៏ល្អសម្រាប់ព្រែកប្រាកីឡាក្នុងការឈានទៅប្រជែងដណ្តើមជើងឯកក្នុងពានរង្វាន់ពាក់កណ្តាលអាជីព KMH Championship League។ ក្រុមព្រែកប្រាកីឡានឹងចាប់ផ្តើមប្រមូលហ្វឹកហាត់សាជាថ្មីនៅខែក្រោយ ដើម្បីត្រៀមប្រជែងក្នុងពាន់រង្វាន់នេះ។
ក្រុមជើងឯកព្រែកប្រាកីឡាទទួលបានថវិកាលើកទឹកចិត្តចំនួន២លានរៀល រីឯក្រុមលេខ២យុវជន U18 ភ្នំពេញក្រោនទទួលបាន១លានរៀល និងក្រុម៣ PSE បាន៥០ម៉ឺនរៀល។ ក្រៅពីពានរង្វាន់កម្រិតអាយុក្រោម២០ឆ្នាំ ក៏មានពានរង្វាន់៣ផ្សេងទៀតផងដែរ។ ក្នុងនោះម្ចាស់ជើងឯកពានរង្វាន់ U17 បានទៅយុវជនអគ្គិសនី រីឯលេខ២បានទៅយុវជន U16 ភ្នំពេញក្រោន និងលេខ៣បានទៅក្រុម Transformer។
ក្រុម Two Lion FC គ្រងជើងឯកស្មាតលីគអាយុក្រោម១៤ឆ្នាំ, លេខ២ U14 Academy និងលេខ៣ U13 Community ភ្នំពេញក្រោន។ ចំណែកក្រុមគររាជគ្រងជើងឯកស្មាតលីគអាយុក្រោម១២ឆ្នាំ រីឯក្រុម Prak Football Academy បានលេខ២ និងលេខ៣ បានទៅក្រុម U12 Community ភ្នំពេញក្រោន។
លោក កែវ សុខង៉ន អ្នកចាត់ការក្រុមភ្នំពេញក្រោនបានចាត់ទុកពានរង្វាន់នេះ ជាការផ្តល់ឱកាសឲ្យកីឡាករវ័យក្មេងតាមសាលា និងសហគមន៍បានចូលរួមប្រកួតប្រជែង និងបង្ហាញសមត្ថភាព។ លោកសង្ឃឹមថា កីឡាករទាំងអស់នឹងបន្តប្រឹងប្រែងហ្វឹកហាត់អភិវឌ្ឍន៍សមត្ថភាព ដើម្បីឈានទៅក្លាយជាកីឡាករអាជីពនាពេលអនាគត៕
លោក សារី អាស្នាវី (កណ្តាល)ជំនួយការគ្រូបង្វឹកក្រុមព្រែកប្រាកីឡាពេលផ្តល់បទសម្ភាសដល់អ្នកសារព័ត៌មាន