ជាតិ
សង្គមជាតិ
មហាផ្ទៃ ប្រកាសរើសសិស្ស-និស្សិត៣៧នាក់ ធ្វើជាស្មៀនឃុំ-សង្កាត់
× ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ បានចេញប្រកាស ស្តីពីការប្រឡងជ្រើសរើសស្មៀនឃុំ-សង្កាត់៣៧នាក់។ បេក្ខជន អាចទៅដាក់ពាក្យប្រឡងនៅសាលារាជធានីភ្នំពេញ និងសាលាខេត្តមួយចំនួនទៀត ដែលមានជ្រើសរើសស្មៀនឃុំ-សង្កាត់។ បេក្ខជន ត្រូវមកដាក់ពាក្យឲ្យបានមុនថ្ងៃទី៣០ ខែសីហា ឆ្នាំ២០១៩ ហើយកាលបរិច្ឆេទប្រឡង នឹងប្រព្រឹត្តទៅនៅថ្ងៃទី២២ ខែកញ្ញា។
ប្រកាស បានបញ្ជាក់ថា ក្រសួងមហាផ្ទៃ ផ្តល់ឱកាសឲ្យនិស្សិត៣៧រូប ដាក់ពាក្យធ្វើជាស្មៀនឃុំ-សង្កាត់ទៅតាមក្របខណ្ឌមន្ត្រីរាជការស៊ីវិល រដ្ឋបាលថា្នក់ក្រោមជាតិទាំង២០រាជធានី-ខេត្ត ដូចជា រាជធានីភ្នំពេញ ខេត្តព្រះសីហនុ កណ្តាល សៀមរាប ព្រៃវែង បាត់ដំបង ពោធិ៍សាត់ កំពង់ធំ បន្ទាយមានជ័យ កំពង់ចាម ឧត្តរមានជ័យ ស្ទឹងត្រែង កំពង់ស្ពឺ ត្បូងឃ្មុំ តាកែវ ស្វាយរៀង កំពត ក្រចេះ កំពង់ឆ្នាំង កែប។ សម្រាប់អ្នកដែលចង់បម្រើការងារជាស្មៀនឃុំ-សង្កាត់នៅខេត្តកែប អាចដាក់ពាក្យនៅសាលាខេត្តកំពត។
សម្រាប់លក្ខខណ្ឌក្នុងការប្រឡង បេក្ខជនត្រូវមានសញ្ញាតិខ្មែរ មានកាយសម្បទាគ្រប់គ្រាន់។ បើករណីមានជនពិការ ក្រសួងលើកទឹកចិត្តឲ្យចូលប្រឡងបាន។ បេក្ខជនត្រូវតែមានអាយុយ៉ាងតិច១៩ឆ្នាំ ហើយមិនលើសពី២៥ឆ្នាំ ហើយត្រូវមានសញ្ញាបត្រយ៉ាងទាបបំផុត មធ្យមសិក្សាទុតិយភូមិ ឬសញ្ញាបត្រសមមូល (សញ្ញាបត្រដែលមានតម្លៃស្មើ)។
ចំពោះវិញ្ញាសាប្រឡង បេក្ខជននឹងត្រូវប្រឡងលើចំណេះដឹងទូទៅ និងចំណេះដឹងកិច្ចការរដ្ឋបាលឃុំ-សង្កាត់ រយៈពេល១ម៉ោងកន្លះ និង១ម៉ោងកន្លះទៀត សម្រាប់ប្រឡងលើការតែងសេចក្តី ឬសរសេរលិខិតរដ្ឋបាល៕
Tag:
ស្មៀន
ឃុំ-សង្កាត់
ក្រសួងមហាផ្ទៃ
© រក្សាសិទ្ធិដោយ thmeythmey.com