ចាប់ពីថ្ងៃទី៩ ខែធ្នូ ថៃលែងឲ្យនាំចូលយានយន្តមួយទឹកពីបរទេសទៀតហើយ

រថយន្ត

អន្តរជាតិ

15, Jul 2019 , 8:39 pm

រូបភាព

ដោយ:

ការនាំចូលយានយន្តមួយទឹកពីបរទេស នឹងលែងត្រូវបានអនុញ្ញាតទៀតហើយនៅក្នុងប្រទេសថៃ ចាប់ពីថ្ងៃទី ៩ ខែធ្នូ ឆ្នាំ ២០១៩នេះតទៅ។ យោងតាមក្រសួងពាណិជ្ជកម្មថៃ ការដាក់បម្រាមបែបនេះ មានគោលដៅបញ្ឍប់អំពើរត់ពន្ធយានយន្តខុសច្បាប់ និងកាត់បន្ថយការបំពុល។

ប្រាប់ក្រុមអ្នកសារព័ត៌មានថៃ នៅថ្ងៃទី ៩ ខែកក្កដា លោក Adul Chotinisakorn ប្រធាននាយកដ្ឋានពាណិជ្ជកម្មបរទេសនៃក្រសួងពាណិជ្ជកម្មថៃ លើកឡើងថា ច្បាប់ថ្មីនេះ មានគោលបំណងគ្រប់គ្រងផ្សែងពុល ដែលហុយចេញពីយានយន្ត និងសម្រាប់សុវត្ថិភាពតាមដងផ្លូវ។

តាមការចុះផ្សាយរបស់កាសែតបាងកកប៉ុស្តិ៍ លោក Adul គូសបញ្ជាក់ថា ច្បាប់គ្រប់គ្រងការនាំចូលរថយន្តនាពេលបច្ចុប្បន្ន មានចន្លោះប្រហោងមួយចំនួន ដែលងាយស្រួលដល់ការគេចពន្ធ ។ ជាឧទាហរណ៍ ក្រុមហ៊ុននាំចូល បានប្រកាសរថយន្តដែលពួកគេបាននាំចូលថា ជាផ្នែករថយន្តដើម្បីបង់ពន្ធតិច។

តាមច្បាប់ថៃ ការនាំចូលរថយន្ត ជាប់ពន្ធចំនួន ៨០ភាគរយ ខណៈផ្នែករថយន្ត ជាប់ពន្ធត្រឹម ៣០ភាគរយប៉ុណ្ណោះ។ លើសពីនេះ មានតែរថយន្តថ្មីប៉ុណ្ណោះ ត្រូវបានអនុញ្ញាតឲ្យនាំចូលក្នុងគោលដៅពាណិជ្ជកម្ម ខណៈរថយន្តមួយទឹកសម្រាប់លក់ ត្រូវបានហាមឃាត់។

សូមបញ្ជាក់ថា នាយកដ្ឋានគយថៃ ប៉ាន់ស្មានថា ការនាំចូលរថយន្តធុនតូចមួយទឹកក្នុងឆ្នាំ២០១៨ មានចំនួនសរុប១០០គ្រឿង ប៉ុន្តែការពិត វា មានដល់ជិត ១០០០ករណីនៃរថយន្តរត់ពន្ធខុសច្បាប់សម្រាប់អំឡុងពេលនេះ ហើយប្រមាណ៩៥ភាគរយ គឺជារថយន្តស៊េរីទំនើប៕