អន្តរជាតិ
អង់គ្លេសចោទអ៊ីរ៉ង់ថា បង្អាក់ដំណើរកប៉ាល់ខ្លួននៅច្រក Hormuz តែអ៊ីរ៉ង់បដិសេធ
នាវា HMS Montrose របស់អង់គ្លេសដែលបណ្ដេញកប៉ាល់អ៊ីរ៉ង់ឲ្យចេញពីឆ្ងាយពីកប៉ាល់ដឹកប្រេងអង់គ្លេសនៅច្រក Hormuz ។ រូបភាព Getty Images
×![]()
ដោយ: តន ចាន់រិទ្ធារ៉ា
ចក្រភពអង់គ្លេស នៅថ្ងៃទី១១ ខែកក្កដា បានចោទអ៊ីរ៉ង់ថា បានបង្អាក់ដំណើររបស់កប៉ាល់ដឹកប្រេងរបស់ខ្លួននៅឯច្រកសមុទ្រ Hormuz ។ ប៉ុន្តែអ៊ីរ៉ង់បានចេញមុខបដិសេធការចោទប្រកាន់នេះ។ ហេតុការណ៍នេះ បានដុតកម្ដៅស្ថានការណ៍នៅតំបន់ឈូងសមុទ្រឲ្យកាន់តែតានតឹង បន្ថែមពីការប្រឈមមុខរវាងអាមេរិក និងអ៊ីរ៉ង់នោះ។ ពីវ៉ាស៊ីនតោនឯណោះ លោកប្រធានាធិបតី ដូណាល់ ត្រាំ បានគំរាមដាក់ទណ្ឌកម្មកាន់តែធ្ងន់លើអ៊ីរ៉ង់។ 
ស្របពេលការប្រឈមមុខរវាងអាមេរិក និងអ៊ីរ៉ង់កំពុងក្ដៅនៅឡើយ ការប្រឈមមុខមួយទៀតក៏ចាប់ផ្ដើមឡើងនៅច្រកសមុទ្រ Hormuz ដ៏សំខាន់។ នៅថ្ងៃទី១១ ខែកក្កដានេះ ក្រសួងការពារជាតិអង់គ្លេស និយាយថា នាវាយោធាអ៊ីរ៉ង់ បានបង្ករាំងស្ទះដល់ការធ្វើដំណើររបស់កប៉ាល់ដឹកប្រេងរបស់ខ្លួន មុននឹងត្រូវបង្ខំឲ្យទៅឆ្ងាយដោយនាវាចម្បាំងអង់គ្លេសមួយគ្រឿងទៀត។ រឿងនេះ បង្កជាការតានតឹងថ្មីមួយជាមួយក្រុងតេហេរ៉ង់។
ពីដំបូង ហេតុការណ៍នេះត្រូវបានទូរទស្សន៍អាមេរិក CNN ផ្សាយថា យោធាអ៊ីរ៉ង់ចង់រឹបអូសកប៉ាល់ដឹកប្រេងអង់គ្លេស។ ប៉ុន្តែក្នុងសេចក្ដីប្រកាសរបស់ខ្លួន ក្រសួងការពារជាតិអង់គ្លេសបញ្ជាក់ថា យោធាអ៊ីរ៉ង់បានត្រឹមព្យាយាមរារាំងដំណើរកប៉ាល់ឈ្មោះ British Heritage ដែលជាកម្មសិទ្ធិរបស់ក្រុមហ៊ុនប្រេង BP ។ ក្រសួងការពារជាតិអង់គ្លេសបន្តថា កប៉ាល់អ៊ីរ៉ង់បីគ្រឿង បានប៉ុនប៉ងធ្វើសកម្មភាពផ្ទុយច្បាប់អន្តរជាតិ មុននឹងត្រូវបាននាវាយោធា HMS Montrose ចូលអន្តរាគមន៍។
អ៊ីរ៉ង់បានបដិសេធការចោទនេះ។ ក្រុមឆ្មាំបដិវត្តន៍អ៊ីរ៉ង់ដ៏មានឥទ្ធិពល និងជាមុខសញ្ញារបស់អាមេរិកនោះ អះអាងថា មិនមានការប្រឈមមុខជាមួយកប៉ាល់បរទេសអ្វីឡើយក្នុងរយៈពេល២៤ម៉ោងនេះ រាប់ទាំងជាមួយកប៉ាល់អង់គ្លេសផង។ នេះបើតាមទីភ្នាក់ងារព័ត៌មាន AFP ។
ហេតុការណ៍ខាងលើនេះ ជាការប្រទាំងប្រទើសថ្មីមួយរវាងអង់គ្លេស និងអ៊ីរ៉ង់ បន្ទាប់ពីការឃាត់ទុកកប៉ាល់ដឹកប្រេងអ៊ីរ៉ង់នៅ Gibraltar ។ អាជ្ញាធរ Gibraltar ដែលជាទឹកដីអង់គ្លេសនៅជាប់អេស្ប៉ាញ បញ្ជាក់ថា កប៉ាល់ដឹកប្រេងអ៊ីរ៉ង់នោះ មានគោលដៅស៊ីរី ដែលជាកំពុងជាប់ទណ្ឌកម្មរបស់អឺរ៉ុប។ ក្រុងតេហេរ៉ង់បានប្រតិកម្មខ្លាំងនឹងចំណាត់ការរបស់អង់គ្លេស ដោយប្រធានាធិបតី ហាសាន់ រូហានី ព្រមានក្រុងឡុងដ៍ពីផលវិបាលធ្ងន់ធ្ងរផងដែរ។
លើបញ្ហាអ៊ីរ៉ង់នេះដែរ ប្រធានាធិបតីអាមេរិក ដូណាល់ ត្រាំ បានគំរាមដាក់ទណ្ឌកម្មជាថ្មីលើអ៊ីរ៉ង់។ តាម Twitter របស់ខ្លួន លោក ត្រាំ ចោទក្រុងតេហេរ៉ង់ជាថ្មីៗថា បានលួចលាក់ចម្រាញ់សារធាតុអ៊ុយរ៉ានីញ៉ូមដែលប្រើក្នុងការផលិតនុយក្លេអ៊ែរ ដែលនោះជាការបំពានកិច្ចព្រមព្រៀងនុយក្លេអ៊ែរឆ្នាំ២០១៥ ។ លោក ត្រាំ បន្តថា កិច្ចព្រមព្រៀងនេះ នឹងអស់សុពលភាពនៅពេលខាងមុខ ហើយទណ្ឌកម្មធ្ងន់ៗនឹងធ្លាក់លើអ៊ីរ៉ង់មិនខាន៕
Tag:
អង់គ្លេស
អ៊ីរ៉ង់
អាមេរិក
© រក្សាសិទ្ធិដោយ thmeythmey.com
