ជាតិ
ស្លាកយីហោជាង១០ដែលមិនត្រឹមត្រូវ និងយកអក្សរបរទេសជាអាទិភាព ត្រូវបានរុះរើចោល
×![]()
ដោយ: ឡាយ សុភាវតី
ក្រសួងពាណិជ្ជកម្ម និងអាជ្ញាធររាជធានីភ្នំពេញ បានចុះរុះរើស្លាកយីហោអាជីវកម្ម១១ទីតាំងនៅទល់មុខអាកាសយានដ្ឋានអន្តរជាតិភ្នំពេញ។ ការចុះទម្លាក់ស្លាកយីហោនេះ ដោយសារតែស្លាកទាំងនោះ មានសរសេរភាសាបរទេសពីលើភាសាខ្មែរ សរសេរអក្សរបរទេសសុទ្ធ និងសរសេរភាសាខ្មែរមិនត្រឹមត្រូវតាមខ្លឹមសារ។ 
«យើងបានប្រាប់ពួកគាត់ឲ្យបំពេញលក្ខខណ្ឌបីចំណុច ទី១ ត្រូវប្រើប្រាស់ពាក្យពេចន៍ឲ្យបានត្រឹមត្រូវ ចំពោះស្លាកយីហោជាភាសាខ្មែរ ទី២ ការលើកស្លាកយីហោ ត្រូវសុំការអនុញ្ញាតជាមុនពីក្រសួង ឬមន្ទីរពាណិជ្ជកម្ម និងស្ថាប័នពាក់ព័ន្ធ និងទី៣ ការដាក់ពាក្យសុំលើកស្លាកយីហោអាជីវកម្ម ត្រូវធ្វើតាមរយៈច្រកចេញចូលតែមួយរបស់សាលារាជធានី ឬខេត្ត»។ នេះបើតាមការអះអាងរបស់លោក វ៉េង សុធី រដ្ឋលេខាធិការក្រសួងពាណិជ្ជកម្ម។
ការចុះរុះរើរបស់អាជ្ញាធរនេះ ធ្វើឡើងនៅថ្ងៃទី១០កក្កដា ឆ្នាំ២០១៩ មុខអាកាសយានដ្ឋានអន្តរជាតិភ្នំពេញ តាមបណ្ដោយផ្លូវសហព័ន្ធរុស្សី សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។ អាជ្ញាធរបានធ្វើការណែនាំម្ចាស់អាជីវកម្មទាំង១១ទីតាំង ស្ដីពីច្បាប់ពាណិជ្ជកម្ម និងការស្នើសុំនាមករណ៍ផ្លូវការសម្រាប់អាជីវកកម្មឬក្រុមហ៊ុននៅកម្ពុជា។
ទន្ទឹមនឹងនេះ ស្ថាប័នជំនាញ បានរំលឹកម្ចាស់អាជីវកម្មទាំងអស់ឲ្យប្រើប្រាស់ពាក្យពេចន៍ត្រឹមត្រូវ ត្រូវសុំការអនុញ្ញាតពីក្រសួងឬមន្ទីរ និងស្ថាប័នពាក់ព័ន្ធមុនលើកស្លាកយីហោ និងការដាក់ពាក្យស្នើសុំត្រូវធ្វើស្លាកអាជីវកម្មត្រូវធ្វើតាមច្រកចេញចូលតែមួយនៅរាជធានីខេត្ត៕
Tag:
ក្រសួងពាណិជ្ជកម្ម
ទម្លាក់ស្លាកយីហោ
© រក្សាសិទ្ធិដោយ thmeythmey.com
