ជ្រូកងាប់ជិត២០០ទៀត នៅខេត្តកណ្តាល ដោយសារជំងឺប៉េស្តជ្រូកអាហ្វ្រិក

ជាតិ

សង្គមជាតិ

ជ្រូកងាប់ជិត២០០ទៀត នៅខេត្តកណ្តាល ដោយសារជំងឺប៉េស្តជ្រូកអាហ្វ្រិក

12, Jul 2019 , 9:59 pm

រូបភាព

រូបភាពពី អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ

ដោយ:

ភ្នំពេញ៖ មានជ្រូកជិត២០០ក្បាលទៀត នៅខេត្តកណ្តាល ដែលបានងាប់ដោយសារជំងឺប៉េស្តជ្រូកអាហ្វ្រិក។

លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម ប្រាប់សារព័ត៌មានថ្មីៗថា មកដល់ពេលនេះ មានជ្រូក៦០៥ក្បាលហើយ ដែលងាប់ជាបន្តៗបន្ទាប់ នៅស្រុកស្អាង និងស្រុកខ្សាច់កណ្តាល ខេត្តកណ្តាល។ កាលពីថ្ងៃទី១១ ខែកក្កដា មានជ្រូកជិត៤០០ក្បាល បានងាប់ដោយសារជំងឺនេះ។

លោក តាន់ ផាន់ណារ៉ា អះអាងថា គិតត្រឹមពាក់កណ្តាលឆ្នាំ២០១៩នេះ ខេត្តដែលផ្ទុះជំងឺប៉េស្តជ្រូកអាហ្រិក រួមមាន រតនគិរី ត្បូងឃ្មុំ ស្វាយរៀង តាកែវ និង កណ្តាល ដែលបណ្តាលឲ្យងាប់ជ្រូកសរុបប្រមាណ២៥០០ក្បាល។ លោក បន្តថា ជំងឺប៉េស្តជ្រូកអាហ្វ្រិក បង្កឡើងដោយវីរុស ដោយមិនទាន់មានវ៉ាក់សាំងការពារនៅឡើយទេ ប៉ុន្តែជំងឺនេះ មិនបង្កឲ្យប៉ះពាល់ដល់មនុស្សឡើយ។ លោក បន្ថែមថា ក្រុមការងាររបស់លោក កំពុងតែបន្តទប់ស្កាត់ជំងឺប៉េស្តជ្រូកអាហ្រិកនេះ។

បើតាមការពន្យល់របស់លោក ជ្រូកដែលមានជំងឺប៉េស្តជ្រូកអាហ្វ្រិក មានរោគសញ្ញាក្តៀន ដង្ហក់ ឡើងកម្តៅ ឡើងក្រហមអុចៗលើស្បែក ហើយជ្រូកនោះ មិនស៊ីចំណី ក្អួត រលូតកូន នឹងឆាប់ងាប់ក្នុងរយៈពេល៣ ទៅ៧ថ្ងៃខាងមុខ។

នៅក្នុងកិច្ចប្រជុំគណៈរដ្ឋមន្ត្រីនាថ្ងៃទី១២ ខែកក្កដានេះ សម្តេចនាយករដ្ឋមន្ត្រី ហ៊ុន សែន បានណែនាំឲ្យថ្នាក់ដឹកនាំខេត្តនានា ចុះទៅត្រួតពិនិត្យនៅកន្លែងដែលមានផ្ទុះជំងឺប៉េស្តជ្រូកអាហ្វ្រិក ដើម្បីចាត់វិធានការទប់ស្កាត់ឲ្យទាន់ពេលវេលា។

គួរបញ្ជាក់ថា ជំងឺប៉េស្តជ្រូកអាហ្វ្រិក បានផ្ទុះឡើងលើកដំបូងនៅឆ្នាំ១៩០៧ នៅប្រទេសកេនញ៉ា ហើយវាបានផ្ទុះឡើងជាបន្តបន្ទាប់ទៅតាមបណ្តាប្រទេសក្នុងទ្វីបអាហ្វ្រិក និងចុងក្រោយ ជំងឺនេះបានផ្ទុះឡើងនៅបណ្តាប្រទេសក្នុងទ្វីបអឺរ៉ុបក្នុងឆ្នាំ២០១៨ រួចបន្តរាលឆ្លងចូលក្នុងប្រទេសចិន។ បច្ចុប្បន្នជំងឺប៉េស្តជ្រូកអាហ្វ្រិកនេះ កំពុងបន្តរាលដាលតាមបណ្តាខេត្តមួយចំនួននៅប៉ែកខាងជើង និងកណ្តាលនៃប្រទេសវៀតណាម។ មកដល់ពេលនេះ អាជ្ញាធរវៀតណាម បានសម្លាប់ជ្រូកជាង២លានក្បាលហើយ៕

អត្ថបទទាក់ទង

លោក ផៃ ស៊ីផាន ៖រដ្ឋាភិបាលគ្មានគោលនយោបាយចំណាយថវិកាដោះស្រាយជំងឺប៉េស្តជ្រូកអាហ្វ្រិកទេ

ជ្រូកជិត៤០០ក្បាលនៅខេត្តកណ្តាល ងាប់ដោយសារជំងឺប៉េស្តជ្រូកអាហ្វ្រិក