ជាតិ
សង្គមជាតិ
លោក គួច ចំរើន ស្នើស្ថានទូតចិន ឲ្យជួយដោះស្រាយបញ្ហានៅខេត្តព្រះសីហនុ
× លោក គួច ចំរើន អភិបាលខេត្តព្រះសីហនុថ្មី បានស្នើសុំឲ្យឯកអគ្គរដ្ឋទូតចិនប្រចាំកម្ពុជា ជួយដោះស្រាយបញ្ហានានាដែលកំពុងកើតមានក្នុងខេត្តមាត់សមុទ្រមួយនេះ។ ជាការឆ្លើយតបទៅនឹងលោក គួច ចំរើន លោកទូតចិនបានបង្ហាញជំហរថា នឹងជួយដោះស្រាយបញ្ហាប្រឈមនៅខេត្តមួយនេះ តាមរយៈ គម្រោង «កម្មវិធីខេត្តព្រះសីហនុ មានសុវត្ថិភាព»។
លោក គួច ចំរើន បានលើកឡើង បញ្ហាប្រឈមដែលខេត្តព្រះសីហនុកំពុងជួបប្រទះ មានដូចជា បញ្ហាការគ្រប់គ្រងសំណង់អគារ ផ្លូវខូច, លូ, ប្រព័ន្ធទឹកស្អាត និងបញ្ហាផ្សេងៗទៀត ខណៈខេត្តមាត់សមុទ្រមួយនេះ មានសន្ទុះអភិវឌ្ឍយ៉ាងខ្លាំង ក្នុងរយៈពេល២ឆ្នាំចុងក្រោយ។ ការលើកឡើងនេះ ធ្វើឡើងនៅចំពោះមុខ លោក Wang Wentian ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំប្រទេសកម្ពុជា កាលពីថ្ងៃទី១០ ខែកក្កដា ឆ្នាំ២០១៩។
ដើម្បីសម្រេចកិច្ចការនេះ លោកបានស្នើដល់ លោក Wang Wentian ឲ្យជួយគាំទ្រ និងដោះស្រាយលើបញ្ហាទាំងនោះ។ លើសពីនេះលោកក៏ស្នើឲ្យឯកអគ្គរដ្ឋទូតចិន ជួយគាំទ្រការបើកទីតាំង សមាគមសារព័ត៌មានចិន និងបើកស្ថានកុងស៊ុល នៅខេត្តព្រះសីហនុ ដើម្បីផ្សព្វផ្សាយ ដល់ប្រជាជនចិន ដែលមានគម្រោងមកវិនិយោគ និងកំពុងវិនិយោគនៅខេត្តព្រះសីហនុ។
ជាការឆ្លើយតប ឯកអគ្គរដ្ឋទូតចិនរូបនេះ បានសន្យាថា នឹងជួយគាំទ្រ និងដោះស្រាយបញ្ហាប្រឈមកើតមាននៅខេត្តព្រះសីហនុ តាមរយៈគម្រោង «កម្មវិធីខេត្តព្រះសីហនុ មានសុវត្ថិភាព» ដែលមានបញ្ចូលទាំងការ បណ្តុះបណ្តាល ការប្រើប្រាស់សម្ភារ បច្ចេកទេស និងសណ្តាប់ធ្នាប់ជាដើម៕
© រក្សាសិទ្ធិដោយ thmeythmey.com