អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
មហាយក្សចិន នៅថ្ងៃទី១២ ខែកក្កដា បានប្រកាសថា ខ្លួននឹងដាក់ទណ្ឌកម្មលើក្រុមហ៊ុនអាមេរិកដែលលក់អាវុធឲ្យតៃវ៉ាន់។ ការប្រកាសនេះ ធ្វើឡើងក្រោយអាមេរិកត្រៀមលក់អាវុធឲ្យកោះមួយនេះក្នុងតម្លៃ២,២ពាន់លានដុល្លារឯណោះ ដែលនេះជារឿងដែលឲ្យប៉េកាំងក្ដៅស្លឹកត្រចៀកខ្លាំង។ ដ្បិតមិនមែនជាលើកទីមួយដែលចិនគំរាមបែបនេះ ប៉ុន្តែវាបានកើតឡើងក្នុងបរិបទដែលអាមេរិក និងចិនកំពុងមិនត្រូវគ្នាដោយសាររឿងពាណិជ្ជកម្មស្រាប់ផង។
ជាថ្មីម្ដងទៀត ក្រុងប៉េកាំង បានរិះគន់ក្រុងវ៉ាស៊ីនតោនរឿងគម្រោងលក់អាវុធតម្លៃ២,២ពាន់លានដុល្លារទៅឲ្យតៃវ៉ាន់ ដោយគ្មានខ្លាចក្រែងខ្លួនបន្តិចសោះ។ ការលក់អាវុធដែលមានរថក្រោះ និងមីស៊ីលនេះ ជាការលក់អាវុធដ៏ធំមួយរបស់អាមេរិកទៅឲ្យតៃវ៉ាន់ក្នុងរយៈពេលមួយទសវត្សរ៍មកនេះ ស្របពេលដែលតៃវ៉ាន់ ដេកមិនលក់បក់ក៏មិនល្ហើយដោយសារការកំញើញសាច់ដុំរបស់យោធារំដោះប្រជាជនចិនក្បែរទឹកដីរបស់ខ្លួននោះ។
ក្នុងសេចក្ដីថ្លែងការណ៍ថ្ងៃទី១២ ខែកក្កដា លោក Geng Shuang អ្នកនាំពាក្យក្រសួងការបរទេសចិន បានបិរហារការលក់អាវុធឲ្យតៃវ៉ាន់ពីសំណាក់អាមេរិកនេះ ជាការបំពានធ្ងន់ធ្ងរមូលដ្ឋានច្បាប់អន្តរជាតិ និងទំនាក់ទំនងអន្តរជាតិ។ មន្ត្រីដដែលនេះបន្តថា៖ «ក្នុងគោលដៅការពារផលប្រយោជន៍ជាតិ ចិននឹងដាក់ទណ្ឌកម្មលើក្រុមហ៊ុនអាមេរិកដែលពាក់ព័ន្ធក្នុងការលក់នេះ។»
ក្រោមរដ្ឋបាលលោកប្រធានាធិបតី ដូណាល់ ត្រាំ ចំណងការទូតមិនផ្លូវការរវាងអាមេរិក និងតៃវ៉ាន់ល្អូកល្អឺនជាងប្រធានាធិបតីមុនៗ ដែលផ្ទុយពីទំនាក់ទំនងអាមេរិក និងចិនដែលយ៉ាប់យ៉ឺនដោយសារជម្លោះពាណិជ្ជកម្ម។ ម្ដងហើយម្ដងទៀត ចិនបានប្រាប់អាមេរិកកុំលេងសើចជាមួយរឿងតៃវ៉ាន់នេះឲ្យសោះ។ នៅថ្ងៃទី១២ ខែកក្កដានេះដែរ ពីទឹកដីហុងគ្រី រដ្ឋមន្ត្រីការបរទេសចិន វ៉ាង យី ព្រមានថា អាមេរិកកំពុងលេងជាមួយភ្លើងហើយ។
តាមពិតទៅ ចិនក៏ធ្លាប់គំរាមដាក់ទណ្ឌកម្មលើក្រុមហ៊ុនអាមេរិកហូរហែមកដែរជុំវិញការលក់អាវុធឲ្យតៃវ៉ាន់នេះ។ កាលពីឆ្នាំ២០១០ អាមេរិក បានអនុម័តគម្រោងលក់ប្រព័ន្ធការពារអាកាស Patriot ឧទ្ធម្ភាគចក្រប្រយុទ្ធ Black Hawk និងយុទ្ធោបករណ៍មួយចំនួនទៀតឲ្យតៃវ៉ាន់។ ចិនក៏ក្ដៅឆេវ ហើយក៏ផ្ដាច់ការទាក់ទងផ្នែកយោធាជាមួយអាមេរិក និងព្រមានចាត់ការលើក្រុមហ៊ុនអាមេរិកដែលចូលដៃក្នុងរឿងទិញលក់នេះទៀតផង។
មួយរយៈពេលចុងក្រោយនេះ តៃវ៉ាន់បានបញ្ជាទិញអាវុធទំនើបៗជាច្រើពីអាមេរិក ដែលជាផ្នែកមួយនៃការធ្វើទំនើបកម្មយោធារបស់ខ្លួន។ សព្វថ្ងៃ សព្វាវុធរបស់តៃវ៉ាន់ ហាក់ហួសសម័យ ឬក៏មិនមានសមត្ថភាពទប់ទល់ការងើបយ៉ាងឆាប់រហ័សនៃកងទ័ពចិនឡើយ។ អាចនិយាយថា បើធ្វើសង្គ្រាម តៃវ៉ាន់ មិនអាចតស៊ូបានជាមួយអានុភាពខ្លាំងក្លារបស់យុទ្ធោបករណ៍ទំនើបៗរបស់ចិនបានឡើយ។ ដូចនេះ តៃវ៉ាន់ត្រូវការអាវុធថ្មីដើម្បីទប់ទល់៕
Tag:
អាមេរិក
ចិន
តៃវ៉ាន់
© រក្សាសិទ្ធិដោយ thmeythmey.com
