អន្តរជាតិ
រូបភាព៖ History.com
×![]()
ដោយ: គី ចំណា
ក្នុងពេលសម័យបច្ចេកវិទ្យាកាន់តែទំនើប ការឆ្លើយឆ្លង ចែកចាយ និងការផ្ទុកទិន្នន័យត្រូវបានគេធ្វើឡើងយ៉ាងឆាប់រហ័យតាមរយៈខ្សែអ៊ីនធឺណិតក្រោមសមុទ្រ ឬប្រព័ន្ធផ្កាយរណបជាដើម។ ប៉ុន្តែកាលពីជិត ២០០ឆ្នាំមុន គេក៏អាចទំនាក់ទំនងគ្នាឆ្លងទ្វីបបានដូចគ្នាដែរ តាមរយៈប្រព័ន្ធតេឡេក្រាហ្វ។
គេហទំព័រ history.com បានពន្យល់ថា លោក Samuel Morse (១៧៩១-១៨៧២) និងអ្នកវិទ្យាសាស្ត្រស្រាវជ្រាវជាច្រើននាក់ទៀតបានបង្កើតប្រព័ន្ធតេឡេក្រាហ្វ (Telegraph) ដើម្បីបម្រើការទាក់ទងគ្នាក្នុងរយៈចម្ងាយឆ្ងាយ និងប្រើពេលវេលាខ្លី។
លោកបានប្រើប្រាស់ប្រព័ន្ធខ្សែកាប ដែលរត់ដោយចរន្តអគ្គីសនី។ ភាសា «Morse Code» ក៏ត្រូវបានគេបង្កើតឡើងសម្រាប់ការទាក់ទងតាមខ្សែកាបនេះដែរ។ Morse Code ជាភាសាបច្ចេកទេសមួយដែលប្រើប្រាស់សញ្ញាចំនួនពីរគឺ សញ្ញាចុច (.) និងសញ្ញាត្រេ (-)។ ដោយផ្គុំឲ្យនៅទីតាំងខុសៗគ្នា គេអាចប្រើសញ្ញាទាំងពីរនេះក្នុងការតំណាងឲ្យតួរអក្សរនីមួយៗបាន។
គេប្រើសញ្ញាទាំងនេះដោយបកប្រែមកជាភាសាធម្មតាវិញ។ ក្នុង១៨៤៤ លោក Samuel Morse បានផ្ញើអក្សរតាមតេលេក្រាហ្វដំបូងគេពីទីក្រុង វ៉ាស៊ីនតោន ទៅកាន់ទីក្រុងបាល់ទីម័រនៃរដ្ឋម៉ារីលេន។ ដោយឃើញពីភាពអស្ចារ្យរបស់វា អ្នកវិនិយោគជាច្រើនបានចាប់អារម្មណ៍ ហើយក៏វិនិយោគលើបច្ចេកវិទ្យាថ្មីមួយនេះ។
នៅឆ្នាំ១៨៦៦ ខ្សែកាបតេឡេក្រាហ្វដំបូងគេដែលឆ្លងកាត់មហាសមុទ្រអាត្លង់ទិចត្រូវបានគេដាក់ឲ្យដំណើរការរវាងឆ្នេរខាងកើតរបស់ទ្វីបអាមេរិកខាងជើង និងប្រទេសក្នុងទ្វីបអឺរ៉ុបខាងលិច។ ដូចនេះ ការផ្ញើទិន្នន័យប្រើប្រាស់ពេលវេលាយ៉ាងខ្លី ជាងពេលមុនដែលគេត្រូវផ្ញើសំបុត្រតាម
កប៉ាល់អស់រយៈពេលជាច្រើនសប្តាហ៍។
ចាប់ពីឆ្នាំ១៨៦៦ មកដល់ឆ្នាំ១៩៤០ មានខ្សែកាបតេឡេក្រាហ្វប្រមាណសរុប៤០ខ្សែដែលគេបានបំពាក់នៅក្រោមមហាសមុទ្រអាត្លង់ទិក។
លោក Samuel Morse ដែលជាអ្នកមានកិត្តិនាមក្នុងការផលិតប្រព័ន្ធទំនាក់ទំនងដំបូងមួយនេះបានស្លាប់ក្នុងឆ្នាំ១៨៧២ ក្នុងអាយុ៨០ឆ្នាំ ឯទីក្រុងញ៉ូយក។
ចំណែក ប្រព័ន្ធតេឡេក្រាហ្វកាន់តែចុះថយប្រជាប្រិយភាពបន្តិចម្តងៗ ដោយសារបច្ចេកវិទ្យាថ្មីៗជាច្រើនទៀតបានបង្ហាញខ្លួនឡើងនៅក្នុងទីផ្សារពិភពលោក ចាប់ពីសង្គ្រាមលោកលើកទីពីរបិទបញ្ចប់ទៅឆ្នាំ ១៩៤៥៕
Tag:
ប្រព័ន្ធទំនាក់ទំនង
តេឡេក្រាហ្វ
© រក្សាសិទ្ធិដោយ thmeythmey.com
