អាហារូបករណ៍ថ្នាក់បរិញ្ញាបត្រ១៥កន្លែងនៅឡាវ សម្រាប់អ្នកពូកែគណិតវិទ្យា និងវប្បធម៌ទូទៅ

ជាតិ

អាហារូបករណ៍ថ្នាក់បរិញ្ញាបត្រ១៥កន្លែងនៅឡាវ សម្រាប់អ្នកពូកែគណិតវិទ្យា និងវប្បធម៌ទូទៅ

13, Jul 2019 , 4:33 pm

រូបភាព

រូបថត AFP

ដោយ៖ ហួ ឆេងស៊ីម

ភ្នំពេញ៖ ក្រោមគម្រោងនៃកិច្ចព្រមព្រៀងវិស័យអប់រំរវាងរដ្ឋាភិបាលកម្ពុជា និងសមភាគីឡាវ ក្រសួងអប់រំ យុវជន និងកីឡា នឹងរៀបចំការប្រឡងជ្រើសរើសនិស្សិតអាហារូបករណ៍ថ្នាក់បរិញ្ញាបត្រចំនួន១៥កន្លែង ដើម្បីបន្តការសិក្សានៅប្រទេសឡាវសម្រាប់ឆ្នាំសិក្សា២០១៩-២០២០។

បើតាមសេចក្តីជូនដំណឹងដែលចុះហត្ថលេខាដោយលោករដ្ឋលេខាធិការ យក់ ង៉ុយ មុខជំនាញដែលត្រូវសិក្សាមាន៧ជំនាញ ដែលក្នុងនោះ រួមមាន បរិស្ថាន, ព័ត៌មានវិទ្យា, គ្រប់គ្រងព្រៃឈើ, សណ្ឋាគារ និងទេសចរណ៍, សេដ្ឋកិច្ច-ពាណិជ្ជកម្ម, ស្ថាបត្យកម្ម និងគ្រប់គ្រងធនធានទឹក និងឧតុនិយម។

ដោយមិនមានអាយុលើសពី៣៥ឆ្នាំ ដោយគិតដល់ខែតុលា ឆ្នាំ២០១៩ បេក្ខជនដែលមានសញ្ជាតិខ្មែរទាំងអស់ ត្រូវមានសញ្ញាបត្រមធ្យមសិក្សាទុតិយភូមិ (បាក់ឌុប) ឬសញ្ញាបត្រដែលមានតម្លៃស្មើ។ រីឯវិញ្ញាសាប្រឡងគឺ វប្បធម៌ទូទៅ និងគណិតវិទ្យា។

ដែលចាប់អារម្មណ៍លើអាហារូបករណ៍នេះ អាចដាក់ពាក្យ ចាប់ពីថ្ងៃផ្សាយដំណឹង ដល់ថ្ងៃទី៣១ ខែកក្កដា ឆ្នាំ២០១៩ នៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍ ដែលស្ថិតនៅអាគារលេខ២៣ ផ្លូវ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។

ការប្រឡងជ្រើសរើសនេះ នឹងប្រព្រឹត្តទៅនៅថ្ងៃទី ១១ សីហា ដោយក្រសួងនឹងជូនដំណឹងទាក់ទងនឹងមណ្ឌលប្រឡងតាមក្រោយ៕