ជាតិ
ស្ទឹងត្រែងថយចុះករណីជំងឺគ្រុនឈាម ដោយសារយុទ្ធនាការអប់រំ និងការបាញ់ថ្នាំសម្លាប់មូស រូបភាពពីមន្ទីរសុខាភិបាលខេត្តស្ទឹងត្រែង
× ករណីជំងឺគ្រុនឈាមនៅខេត្តស្ទឹងត្រែងបានថយចុះជាបន្តបន្ទាប់ ដោយគិតត្រឹមសប្តាហ៍ដំបូងនៃខែកក្កដា បន្ទាប់ពីមន្ទីរសុខាភិបាលខេត្ត និងអង្គភាពពាក់ព័ន្ធ បានធ្វើយុទ្ធនាការអប់រំ និងបាញ់សម្លាប់ថ្នាំសម្លាប់មូស ដែលជាប្រភពនៃជំងឺ។ នេះបើតាមការអះអាងរបស់លោក អ៊ុង សូវៀត ប្រធានមន្ទីរសុខាភិបាលខេត្តស្ទឹងត្រែង។
«ត្រឹមរយៈពេលមួយសប្ដាហ៍នៃដើមខែកក្កដា ជំងឺគ្រុនឈាមថយចុះជាង១០០ករណី ខណៈកាលពីអំឡុងខែមិថុនាកន្លងមក ជំងឺគ្រុនឈាមបានផ្ទុះឡើងជាង២០០នាក់»។ លោក អ៊ុង សូវៀត បានបញ្ជាក់យ៉ាងដូច្នេះ ប្រាប់សារព័ត៌មាន ThmeyThmey ដោយអះអាងពីប្រសិទ្ធភាពនៃយុទ្ធនាការអប់រំពលរដ្ឋនៅមូលដ្ឋាន។
លោកបានបញ្ជាក់ថា មន្ទីរសុខាភិបាល និងអាជ្ញាធរមូលដ្ឋានបានចុះផ្សព្វផ្សាយនិងទប់ស្កាត់ការផ្ទុះជំងឺគ្រុនឈាមនេះ តាមរយៈការចែកមុងជ្រលក់ថ្នាំ និងថ្នាំសម្លាប់ដង្កូវទឹក ជាពិសេស យុទ្ធនាការ បាញ់ថ្នាំសម្លាប់មូសជាដើម។ ការចុះបាញ់ថ្នាំសម្លាប់មូលនេះ ធ្វើនៅតាមមូលដ្ឋានសាលារៀន និងលំនៅដ្ឋានពលរដ្ឋ។
ប្រធានមន្ទីរសុខាភិបាលបានលើកឡើងថា៖ «មកដល់ដើមខែកក្កដា ស្ទឹងត្រែងអ្នកកើតជំងឺគ្រុនឈាមជិត៥០០នាក់ ប៉ុន្តែស្ថានភាពករណីជំងឺគ្រុនឈាមបានថយចុះជាង១០០ករណីហើយ។
មន្ត្រីជំនាញ បានបន្តអំពាវនាវឲ្យពលរដ្ឋការពារកុមារតូចៗ ការលុបបំបាត់ជម្រកមូសតាមមូលដ្ឋាន ហើយត្រូវបញ្ចូនទៅពេទ្យជាបន្ទាន់ប្រសិនមានករណីសង្ស័យកើតជំងឺគ្រុនឈាម៕
Tag:
សុខាភិបាល ស្ទឹងត្រែង
គ្រុនឈាម
© រក្សាសិទ្ធិដោយ thmeythmey.com