អន្តរជាតិ
ប្រធានាធិបតីតៃវ៉ាន់ ពង្រឹងសម្ព័ន្ធភាពជាមួយហៃទី ខណៈភូមិសាស្ត្រការ៉ាអ៊ីបកំពុងប្រឈមមុខការអូសទាញពីចិន ប្រធានាធិបតីតៃវ៉ាន់ Tsai Ing-wen ចាប់ដៃសមភាគីហៃទី Jovenel Moise ។ រូបភាព AFP
× លោកស្រីប្រធានាធិបតីតៃវ៉ាន់ Tsai Ing-Wen បានបំពេញទស្សនកិច្ចផ្លូវការទៅកាន់ប្រទេសហៃទី ដែលជាផ្នែកមួយ នៃទស្សនកិច្ចពង្រឹងចំណងមិត្តភាពជាមួយនឹងប្រទេសដៃគូ និងជាសម្ព័ន្ធមិត្តដែលមិនប្រែប្រួលនៅតំបន់ការ៉ាអ៊ីប។ ទស្សនកិច្ចនេះ ធ្វើឡើងស្របពេលដែលតៃវ៉ាន់ កំពុងប្រឈមនឹងការបាត់បង់ដៃគូស្ទើរតែគ្រប់តំបន់ ដោយសារតែឥទ្ធិពលការទូតអូសទាញរបស់ចិន។
នាជំនួបជាមួយនឹងសមភាគីហៃទីនៅថ្ងៃ១៣ ខែកក្កដា លោកស្រីប្រធានាធិបតី Tsai Ing-Wen បានលើកឡើងនៅចំពោះមុខលោកប្រធានាធិបតី Jovenel Moise ពីសារសំខាន់នៃការពង្រឹងចំណងមិត្តភាពរវាងប្រទេសទាំងពីរ ដែលមានអាយុកាល៦៣ឆ្នាំហើយនោះ។ លោកស្រីប្រធានាធិបតី បានសន្យាធ្វើជាដៃគូដ៏ស្មោះស្ម័គ្ររបស់ហៃទីក្នុងដំណើរការអភិវឌ្ឍប្រទេស។
តាមភ្នាក់ងារព័ត៌មានបារាំង France 24 ក្នុងជំនួបនេះដែរ លោកស្រីប្រធានាធិបតី បានជជែកពីលទ្ធភាពក្នុងការធ្វើកិច្ចសហប្រតិបត្តិការជាមួយនឹងប្រមុខហៃទីលើវិស័យអប់រំ និងហេដ្ឋារចនាសម្ព័ន្ធ។ តៃវ៉ាន់ ក៏បានត្រៀមផ្តល់ជំនួយប្រមាណ ១៥០លានដុល្លារ ដល់ហៃទីសម្រាប់ការអភិវឌ្ឍប្រទេស ក៏ប៉ុន្តែជំនួយនេះ ត្រូវរង់ចាំការពិភាក្សា និងអនុម័តពីសភារបស់ហៃទី។
គួរជម្រាបថា លោកប្រធានាធិបតី Tsai Ing-Wen កំពុងតែបន្តដំណើរទស្សនកិច្ចរយៈពេល១២ថ្ងៃក្នុងតំបន់ខារ៉ាប៊ីន ដែលជាតំបន់ភូមិសាស្ត្រនយោបាយមួយកំពុងតែរងការគំរាមកំហែងការទូតសម្រាប់តៃវ៉ាន់ ។ ទិសដៅបន្ទាប់របស់លោកស្រីក្នុងដំណើរទស្សនកិច្ចនេះ គឺរដ្ឋ St Vincent និង the Grenadines, St Lucia, St Kitts និង Nevis ។
អ្វីដែលគួរឲ្យកត់សម្គាល់នោះ បច្ចុប្បន្ន តៃវ៉ាន់ នៅសល់តែ១៧ប្រទេសទៀតប៉ុណ្ណោះ ដែលនៅមានសម្ព័ន្ធភាពការទូត និងទទួលស្គាល់ថា តៃវ៉ាន់ ជារដ្ឋស្របច្បាប់របស់ពិភពលោក។ ប៉ុន្មានឆ្នាំចុងក្រោយនេះ តៃវ៉ាន់ បានបាត់បង់សម្ព័ន្ធមិត្តជាបន្តបន្ទាប់ រួមមានដូចជា ប៉ាណាម៉ា, អែលសាល់វាល់ឌ័រ និងសាធារណរដ្ឋដូមីនិក ដែលជារដ្ឋជិតខាងរបស់ហៃទីតែម្តង។
ការបាត់បង់សម្ព័ន្ធមិត្តជាបន្តបន្ទាប់នេះ ត្រូវបានតៃវ៉ាន់ចោទថា ដោយសារតែនយោបាយការទូតទឹកលុយរបស់ចិន។ ពោលគឺ ដោយសារតែចិន ព្យាយាមចែចូវជាមួយនឹងរដ្ឋដៃគូរបស់តៃវ៉ាន់ ដោយត្រូវអនុវត្តគោលនយោបាយចិនតែមួយ (តៃវ៉ាន់ គ្រាន់តែជាផ្នែកមួយរបស់ចិនប៉ុណ្ណោះ) ជាមួយនឹងថ្នូរជំនួយ និងកម្ចីអភិវឌ្ឍរបស់រដ្ឋាភិបាលចិន៕
© រក្សាសិទ្ធិដោយ thmeythmey.com