កីឡាអន្តរជាតិ
អន្តរជាតិ
Djokovic ផ្តួល Federer ដើម្បីលើកពាន Wimbledon ជាមួយប្រាក់រង្វាន់៤៨លានដុល្លារ
× Novak Djokovic បានរក្សាតំណែងជើងឯកការប្រកួតកីឡាវាយកូនបាល់ពានរង្វាន់ Wimbledon ពីរឆ្នាំជាប់គ្នា បន្ទាប់ពីយកឈ្នះម្ចាស់ជើងឯកច្រើនជាងគេ Roger Federer ក្នុងវគ្គផ្តាច់ព្រ័ត្រនៅទីលានក្នុងប្រទេសអង់គ្លេស។
នាជំនួបផ្តាច់ព្រ័ត្រក្នុងទីលាន Centre Court ស្ថិតនៅក្រុងឡុងដ៏ នៅថ្ងៃទី១៤ ខែកក្កដា កំពូលអ្នកវាយកូនបាល់លំដាប់ទី១ពិភពលោក Djokovic បានយកឈ្នះកីឡាករលំដាប់ទី៣ Federer ទាំងប្រផុតប្រផើយក្នុងលទ្ធផល ៧-៦ (៧-៥), ១-៦, ៧-៦ (៧-៤), ៤-៦ និង ១៣-១២ (៧-៣) ដោយប្រើរយៈពេល ៤ ម៉ោង និង ៥៧នាទី។
ជ័យជម្នះនេះ បាននាំឲ្យ Djokovic ក្លាយជាម្ចាស់ពាន Wimbledon លើកទី៥ និងជា Grand Slams ទី១៦របស់គេ ជាមួយការបង្ហាញខ្លួនក្នុងវគ្គផ្តាច់ព្រ័ត្រចុងក្រោយ៥លើក ដោយក្នុងនោះឈ្នះចំនួន៤លើក។ ជើងឯក Wimbledon ឆ្នាំ២០១៩នេះ ទទួលបានប្រាក់រង្វាន់រហូតដល់ ៤៨លានដុល្លារ ដែលកើនលើសឆ្នាំមុនចំនួន ៥សែនដុល្លារអាមេរិក។
«វាពិតជាមិនគួរឲ្យជឿសោះដែលខ្ញុំអាចឈ្នះ Wimbledon ជាលើកទី៥»។ អ្នកវាយកូនបាល់សញ្ជាតិស៊ែប៊ីវ័យ៣២ឆ្នាំលើកឡើងដូច្នេះ។ សូម្បីតែ Federer វ័យ៣៧ឆ្នាំដែលធ្លាប់លើកពាន Wimbledon ច្រើនជាងគេរហូត៨លើកក៏សរសើរ Djokovic មិនដាច់ពីមាត់ដែរ។ «វាជាការប្រកួតដ៏អស្ចារ្យ ហើយប្រើរយៈពេលយូរណស់។ Novak គេមានអ្វីគ្រប់យ៉ាង សូមអបអរសាទរចំពោះជ័យជម្នះនេះ»។
បើទោះទទួលបានត្រឹមរងជើងឯកមែន ប៉ុន្តែបុរសសញ្ជាតិស្វ៊ីស Federer នៅតែជាកីឡាវាយកូនបាល់ដែលឈ្នះ Grand Slams ច្រើនជើងគេចំនួន២០លើកក្នុងអាជីព តាមពីក្រោយដោយ Rafael Nadal ចំនួន១៨លើក និង Djokovic ១៦លើក៕
Tag:
វាយកូនបាល់
Novak Djokovic
Roger Federer
Wimbledon
© រក្សាសិទ្ធិដោយ thmeythmey.com