ជាតិ
ចិននឹងពិចារណាបើកស្ថានកុងស៊ុលនៅខេត្តព្រះសីហនុ ដើម្បីសហការដោះស្រាយបញ្ហាជនជាតិចិន រូបពីហ្វេសប៊ុករដ្ឋបាលខេត្តព្រះសីហនុ៖លោក គួច ចំរើន អភិបាលខេត្តព្រះសីហនុ និង លោក Wang Wentian ឯកអគ្គរដ្ឋទូតចិនប្រចាំកម្ពុជា
× ភ្នំពេញ៖ ចិននឹងពិចារណាបើកស្ថានកុងស៊ុលនៅខេត្តព្រះសីហនុ ដើម្បីសហការដោះស្រាយបញ្ហាជនជាតិចិន ដែលកំពុងរស់នៅ និងរកស៊ីនៅកម្ពុជា។ ចិនទទួលយកសំណើកម្ពុជានេះ ធ្វើឡើងបន្ទាប់ពីលោក គួច ចំរើន អភិបាលខេត្តព្រះសីហនុ បានពិភាក្សាជាមួយលោក Wang Wentian ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន កាលពីពេលថ្មីៗនេះ។
អ្នកនាំពាក្យរដ្ឋបាលខេត្តព្រះសីហនុ លោក ឃៀង ភារម្យ បានថ្លែងប្រាប់សារព័ត៌មានថ្មីៗថា អាជ្ញាធរ កំពុងសិក្សាទីតាំង សម្រាប់ផ្ដល់ឲ្យចិន បើកស្ថានកុងស៊ុលនេះ ប៉ុន្តែលោកមិនទាន់ដឹងច្បាស់ថា ភាគីចិននឹងបើកស្ថានកុងស៊ុលនៅពេលណាឡើយ។ សម្រាប់លោក ភារម្យ ការបង្កើតស្ថានកុងស៊ុលចិននេះ នឹងជួយសម្រួលដល់ការគ្រប់គ្រងចំនួនប្រជាជនចិន អ្នកទេសចរ និងអ្នកវិនិយោគ ជាពិសេសផ្សព្វផ្សាយអប់រំចែករំលែក ព័ត៌មាន វប្បធម៌ ច្បាប់ជាដើម។ លោក ឃៀង ភារម្យ បញ្ជាក់ទៀតថា៖«ប្រជាជនចិន ដែលមានវត្តមាន (នៅកម្ពុជា) ងាយស្រួលសម្រាប់ដោះស្រាយគ្រប់បញ្ហា ឬរឿងរ៉ាវដែលកើតមាន ក្នុងខេត្តព្រះសីហនុ»។
សូមរំឭកថា កាលពីថ្ងៃទី១០ កក្កដា លោក គួច ចំរើន អភិបាលខេត្តព្រះសីហនុ និងលោក Wang Wentian ឯកអគ្គរដ្ឋទូតចិន បានពិភាក្សាគ្នាពីបញ្ហាប្រឈមដែលខេត្តព្រះសីហនុកំពុងជួបប្រទះ ក្រោយមានសន្ទុះខ្លាំងក្នុងការអភិវឌ្ឍ នៅក្នុងរយៈពេលជាង២ឆ្នាំមកនេះ។ នៅក្នុងកិច្ចពិភាក្សានោះ លោក គួចចំរើន បានប្រាប់ទៅលោកឯកអគ្គរដ្ឋទូតចិនថា បញ្ហាដែលខេត្តព្រះសីហនុ បានប្រឈម មានដូចជា ការគ្រប់គ្រងសំណង់អគារ លូ ប្រព័ន្ធទឹក និងបញ្ហាផ្សេងៗ។ ជាការឆ្លើយតបរបស់ឯកអគ្គរដ្ឋទូតចិនរូបនេះ បានសន្យាថា នឹងជួយគាំទ្រ និងដោះស្រាយបញ្ហាប្រឈមទាំងនេះ តាមរយៈគម្រោង«កម្មវិធីខេត្តព្រះសីហនុ មានសុវត្ថិភាព»ដែលមានបញ្ចូលទាំងការបណ្តុះបណ្តាល ការប្រើប្រាស់សម្ភារ បច្ចេកទេស និងសណ្តាប់ធ្នាប់ជាដើម៕
© រក្សាសិទ្ធិដោយ thmeythmey.com