លោក សៅ សុខា ប្រាប់ លោក ស សុខា ថា មន្ទីរអប់រំខ្លះដណ្តើមទីលានបាល់ទាត់ពីសាលាទៅគ្រប់គ្រង

កីឡាជាតិ

ជាតិ

លោក សៅ សុខា ប្រាប់ លោក ស សុខា ថា មន្ទីរអប់រំខ្លះដណ្តើមទីលានបាល់ទាត់ពីសាលាទៅគ្រប់គ្រង

16, Jul 2019 , 8:19 pm

រូបភាព

លោក សៅ សុខា (ឆ្វេង)ចាប់ដៃជាមួយលោក ស សុខា ក្រោយកិច្ចប្រជុំបូកសរុបការងារ CAMSOC, រូបភាពពី SEA Games 2023

ដោយ:

លោក សៅ សុខា ប្រធានសហព័ន្ធកីឡាបាល់ទាត់កម្ពុជា បានបង្ហាញការហួសចិត្តចំពោះមន្ទីរអប់រំ យុវជន និងកីឡា និងសាលាមួយចំនួននៅតាមខេត្ត ដែលដណ្តើមគ្នាគ្រប់គ្រងទីលានបាល់ទាត់នៃគម្រោងសាលាតម្រង់ទិស។ បច្ចុប្បន្នមានទីលានចំនួន២២ហើយបានសាងសង់រួច កំពុងសាងសង់ និងបានចុះកិច្ចសន្យាដើម្បីសាងសង់។ ដូច្នេះគម្រោងអភិវឌ្ឍន៍បាល់ទាត់២៥រាជធានី-ខេត្តក្រោមកិច្ចសហការរវាងសហព័ន្ធ និងក្រសួងអប់រំយុវជននិងកីឡា នៅសល់តែ៣ទៀតប៉ុណ្ណោះ។

នាកិច្ចប្រជុំបូកសរុបការងារប្រចាំត្រីមាសរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ(CAMSOC)កាលពីថ្ងៃទី១៥ កក្កដា ប្រធានសហព័ន្ធកីឡាបាល់ទាត់កម្ពុជា បានបង្ហាញការហួសចិត្តចំពោះព័ត៌មាន ដែលថា មន្ទីរអប់រំ យុវជន និងកីឡានិងនាយកសាលាតាមខេត្តមួយចំនួន ដណ្តើមគ្នាគ្រប់គ្រងទីលានបាល់ទាត់ក្រោមគម្រោងសាលាតម្រង់ទិសកីឡាបាល់ទាត់។

នៅមុខលោក ស សុខា រដ្ឋលេខាធិការក្រសួងអប់រំយុវជននិងកីឡាទទួលបន្ទុកផ្នែកកីឡា លោក សៅ សុខា បង្ហាញការហួសចិត្តយ៉ាងដូច្នេះថា៖«យើងធ្វើទីលានបាល់ទាត់បានហើយ ហើយប្រគល់ឲ្យគាត់គ្រប់គ្រង តែគាត់ដណ្តើមគ្នាគ្រប់គ្រងទៀត ខ្ញុំសុំរាយការណ៍ជូនឯកឧត្តមរដ្ឋលេខាធិការក្រសួងអប់រំ (លោក ស សុខា)ដែលមានវត្តមាននៅនីនេះ។ មន្ទីរអប់រំខេត្តថា ការប្រគល់ឲ្យគ្រប់គ្រងទីលាននេះ គឺជាតួនាទីរបស់គាត់។ តែគោលដៅពិតប្រាកដមិនមែនប្រគល់ឲ្យមន្ទីរនោះទេ សូមជម្រាប! អ្វីដែលខ្ញុំធ្វើ គឺប្រគល់ឲ្យសាលាជាអ្នកគ្រប់គ្រង ព្រោះគាត់ជាអ្នកមើលថែរក្សាផ្ទាល់រាល់ថ្ងៃ»។

គម្រោងអភិវឌ្ឍន៍សាលាតម្រង់ទិសកីឡាបាល់ទាត់ទូទាំង២៥រាជធានី-ខេត្ត ដែលជាកិច្ចសហការរវាងសហព័ន្ធកីឡាបាល់ទាត់កម្ពុជាជាមួយក្រសួងអប់រំយុវជននិងកីឡា ជិតរួចរាល់ទូទាំងប្រទេសហើយ។ បច្ចុប្បន្នទីលានចំនួន២២ បានសាងសង់ហើយ និងកំពុងស្ថិតក្នុងដំណាក់សាងសង់ និងបានចុះកិច្ចសន្យាដើម្បីសាងសង់។ នេះបើតាមការបញ្ជាក់របស់លោក សៅ សុខា។

អគ្គមេបញ្ជារងកងយោធពលខេមរភូមិន្ទរូបនេះបានបន្ថែមថា៖«ខ្ញុំនៅសល់តែ៣ទីលានទៀតទេ គឺគ្រប់ទូទាំងប្រទេស។ នៅខ្វះ គឺដោយសារខេត្តទាំងនោះគ្មានដីឲ្យខ្ញុំ ដើម្បីសាងសង់ទីលាន។ មានគ្រូខ្លះថា ការលេងកីឡាបាល់ទាត់អាចរំខាន និងប៉ះពាល់ដល់ការសិក្សារបស់សិស្ស នៅស្រុកយើងមានគ្រូបែបនេះដែរ ទំនងប្រហែលជាគាត់អត់ដឹងថា យើងត្រូវធ្វើអ្វីនៅឆ្នាំ២០២៣»។

អនុប្រធានទី១នៃគណៈកម្មាធិការជាតិអូឡាំពិកកម្ពុជារូបនេះ មានជំនឿថា ក្រុមយុវជនបាល់ទាត់ជម្រើសជាតិអាយុក្រោម២២ឆ្នាំកម្ពុជា អាចនឹងលើកពានប្រចាំការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ បើគម្រោងអភិវឌ្ឍន៍សាលាតម្រង់ទិសកីឡាបាល់ទាត់២៥រាជធានី-ខេត្តបញ្ចប់ត្រឹមឆ្នាំ២០១៩នេះ។ ប៉ុន្តែបើគម្រោងនេះមិនបញ្ចប់ត្រឹមឆ្នាំនេះទេ លទ្ធផលនឹងមានការប្រែប្រួលនៅឆ្នាំ២០២៣៕