សភាអាមេរិក អនុម័តច្បាប់ដាក់ទណ្ឌកម្មលើរដ្ឋាភិបាលខ្មែរ, អ្នកនាំពាក្យ ស្នើឲ្យគិតឡើងវិញ

ជាតិ

នយោបាយជាតិ

សភាអាមេរិក អនុម័តច្បាប់ដាក់ទណ្ឌកម្មលើរដ្ឋាភិបាលខ្មែរ, អ្នកនាំពាក្យ ស្នើឲ្យគិតឡើងវិញ

16, Jul 2019 , 3:47 pm

រូបភាព

លោក ថេត យូហូ សមាជិករដ្ឋសភាអាមេរិក ដែលដឹកនាំធ្វើសេចក្តីស្នើច្បាប់ដើម្បីដាក់ទណ្ឌកម្មលើរដ្ឋាភិបាលកម្ពុជា និង លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា

ដោយ: ថ្មីៗ

សភាជាន់ទាបរបស់អាមេរិក (រដ្ឋសភា) បានអនុម័តសេចក្តីស្នើច្បាប់ស្តីពីប្រជាធិបតេយ្យនៅកម្ពុជា កាលពីថ្ងៃទី១៥ ខែកក្កដា ឆ្នាំ២០១៩។ សេចក្តីស្នើច្បាប់នេះ មានគោលដៅដាក់ទណ្ឌកម្មលើរដ្ឋាភិបាលកម្ពុជា។

លោក ថេត យូហូ (Ted Yoho) សមាជិករដ្ឋសភាអាមេរិកម្នាក់ ដែលជាមេផ្តើមគំនិតតាក់តែងច្បាប់នេះតាំងពីអំឡុងខែមេសាមក បានចេញសេចក្តីថ្លែងការណ៍ស្តីពីការអនុម័តរបស់រដ្ឋសភា។ លោក លើកឡើងក្នុងសេចក្តីថ្លែងការណ៍ថា សេចក្តីស្នើច្បាប់របស់លោក នឹងបង្កកទ្រព្យសម្បត្តិរបស់មន្ត្រីរដ្ឋាភិបាល មន្ត្រីយោធា និងមន្ត្រីសន្តិសុខ ដែលចូលរួមធ្វើឲ្យប៉ះពាល់ដល់លទ្ធិប្រជាធិបតេយ្យ និងសិទ្ធិមនុស្សនៅកម្ពុជា។

សមាជិករដ្ឋសភារូបនេះ បន្តថា សម្តេចនាយករដ្ឋមន្ត្រី ហ៊ុន សែន បានកាន់អំណាចរាប់ទសវត្សរ៍មកហើយ ហើយគ្មានចេតនាបោះបង់អំណាចឡើយ។ លោក រិះគន់ៗដូច្នេះថា៖«របបលោក ហ៊ុន សែន បានប្រើអំពើហិង្សា ការគំរាមកំហែង និងការកាត់ទោស ដើម្បីកម្ចាត់ក្រុមប្រឆាំង»។

លោក សង្កត់ធ្ងន់ថា សេចក្តីស្នើច្បាប់របស់លោក នឹងប្រឆាំងជាមួយរដ្ឋាភិបាលកម្ពុជា ដែលធ្វើឲ្យប៉ះពាល់ដល់លទ្ធិប្រជាធិបតេយ្យនិងការរំលោភសិទិ្ធមនុស្ស ដោយដាក់ទណ្ឌកម្មផ្នែកហិរញ្ញវត្ថុ និងការរឹតបន្តឹងការផ្តល់ទិដ្ឋាការ ដល់មន្ត្រីកម្ពុជាទាំងឡាយណាដែលពាក់ព័ន្ធនឹងរឿងនេះ។

លោក ថេត យូហូ ថ្លែងថា លោក កំពុងរង់ចាំសេចក្តីស្នើច្បាប់នេះ ត្រូវបានបញ្ជូនទៅសភាជាន់ខ្ពស់ (ព្រឹទ្ធសភា) ដើម្បីអនុម័ត ហើយនៅទីបំផុតនឹងក្លាយជាច្បាប់។ លោក បញ្ជាក់ថា៖«វាដល់ពេលហើយ ដើម្បីឲ្យរបបលោក ហ៊ុន សែន ទទួលខុសត្រូវចំពោះសកម្មភាពរបស់ខ្លួន»។

លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា សោកស្តាយ ពេលឮថារដ្ឋសភាអាមេរិក បញ្ចប់នីតិវិធីលើសេចក្តីស្នើច្បាប់នេះ។ តាមរយៈសារលើគណនីហ្វេសប៊ុកផ្ទាល់ខ្លួន លោក ចាត់ទុក សេចក្តីស្នើច្បាប់នេះ ថាមានចរិតនយោបាយ និងគោលបំណងប្រឆាំងនឹងសុច្ឆន្ទៈនយោបាយរបស់ប្រជាជនកម្ពុជា ដែលបានជ្រើសរើសមេដឹកនាំតាមផ្លូវច្បាប់ និងតាមរយៈការបោះឆ្នោតប្រកបដោយសន្តិភាព និងប្រជាធិបតេយ្យ។

អ្នកនាំពាក្យរូបនេះ បន្តថា ថ្នាក់ដឹកនាំរដ្ឋាភិបាល និងប្រជាជនកម្ពុជា មិនអាចទទួលយកបានទេ ដោយសារសេចក្តីស្នើច្បាប់របស់សមាជិករដ្ឋសភាអាមេរិក ធ្វើឡើងផ្អែកទៅលើការចោទប្រកាន់ ដោយគ្មានមូលដ្ឋានច្បាស់លាស់ ហើយបង្ហាញតែមហិច្ឆតានយោបាយប្រឆាំងនឹងរដ្ឋាភិបាលកម្ពុជាបុណ្ណោះ។ លោក រិះគន់ត្រឡប់ទៅវិញថា៖«សេចក្តីស្នើច្បាប់នេះ ជាទង្វើប្រឆាំងសន្តិភាព ស្ថិរភាព និង វិបុលភាពរបស់កម្ពុជា»។

មន្ត្រីជាន់ខ្ពស់របស់រដ្ឋាភិបាលកម្ពុជា អំពាវនាវទៅស្ថាប័ននីតិបញ្ញត្តិ និងរដ្ឋាភិបាលសហរដ្ឋអាមេរិក «ឲ្យពិចារណាឡើងវិញ» នូវជំហររបស់ខ្លួនសម្រាប់ប្រទេសកម្ពុជា ដើម្បីជាផលប្រយោជន៍នៃការថែរក្សាទំនាក់ទំនងល្អជាមួយគ្នា ក៏ដូចជាផលប្រយោជន៍ សម្រាប់ប្រជាជន និងរដ្ឋាភិបាលនៃប្រទេសទាំងពីរ។

លោក រំពឹងដូច្នេះថា៖«ព្រឹទ្ធសភាអាមេរិក ក៏ដូចជា ប្រធានាធិបតីសហរដ្ឋអាមេរិក [លោក ដូណាល់ ត្រាំ] ច្បាស់ជាយកចិត្តទុកដាក់ចំពោះទំនាក់ទំនងល្អ និងកិច្ចសហប្រតិបត្តិការអន្តរជាតិ ដែលប្រជាជាតិទាំងពីររបស់យើង កំពុងតែប្រឹងប្រែង ដើម្បីបន្តរក្សាផលប្រយោជន៍រួមគ្នា»។

ជានីតិវិធី សេចក្តីស្នើច្បាប់នេះ ត្រូវឆ្លងកាត់ការអនុម័តពីព្រឹទ្ធសភា ហើយបន្ទាប់មក ត្រូវបញ្ជូនបន្តទៅប្រធានាធិបតី ដើម្បីអនុម័តចុងក្រោយ ឲ្យក្លាយទៅជាច្បាប់។ យ៉ាងណាក៏ដោយ កន្លងមក ទាំងសមាជិកព្រឹទ្ធសភា និង សមាជិករដ្ឋសភា ធ្លាប់បានធ្វើសេចក្តីស្នើច្បាប់មួយចំនួនរួចមកហើយ ដើម្បីដាក់ទណ្ឌកម្មលើរដ្ឋាភិបាលកម្ពុជា មិនមែនទើបតែលេចឡើងនូវសេចក្តីស្នើច្បាប់នេះមួយទេ។ ប៉ុន្តែ រហូតមកដល់ពេលនេះ គេ មិនទាន់ឃើញសេចក្តីស្នើងច្បាប់ណាមួយ ឆ្លងផុតពីស្ថាប័ននីតិបញ្ញត្តិទាំងពីរ ហើយបញ្ជូនទៅឲ្យប្រធានាធិបតី ចុះហត្ថលេខានោះទេ។

ក្នុងចំណោមសេចក្តីស្នើច្បាប់ទាំងនោះ មានសេចក្តីស្នើច្បាប់មួយ ត្រូវបានសមាជិកព្រឹទ្ធសភាអាមេរិក តាក់តែងឡើង ដើម្បីជំរុញឲ្យលោក ត្រាំ ផ្អាកប្រព័ន្ធអនុគ្រោះពន្ធ GSP នៅកម្ពុជា។ ចំណាត់ការរបស់សមាជិកព្រឹទ្ធសភាអាមេរិក គឺស្របនឹងចំណាត់ការរបស់សហភាពអឺរ៉ុប ដែលបានចាប់ផ្តើមនីតិវិធីនៃការព្យួរប្រព័ន្ធអនុគ្រោះពន្ធ EBA នៅកម្ពុជា។

ទាំងសហរដ្ឋអាមេរិក និងសហភាពអឺរ៉ុប ទាមទារដូចគ្នា គឺឲ្យរដ្ឋាភិបាលកម្ពុជា ស្តារលទ្ធិប្រជាធិបតេយ្យ និងគោរពសិទ្ធិមនុស្ស ដោយត្រូវទម្លាក់បទចោទចេញពីលោក កឹម សុខា ប្រធាននៃអតីតគណបក្សប្រឆាំង រួមទាំងអ្នកនយោបាយ និងសកម្មជនខាងប្រឆាំងដទៃទៀត ហើយអនុញ្ញាតឲ្យអ្នកប្រឆាំងនៅក្រៅប្រទេស វិលមកកម្ពុជាវិញ៕