អន្តរជាតិ
លោកស្រី អឺស៊ុឡា ស្ត្រីដំបូងបំផុតដែលក្លាយជាប្រធានគណៈកម្មការអឺរ៉ុបដ៏មានឥទ្ធិពល លោកស្រី អឺស៊ុឡា វ៉ុន ដឹ លៃអេន ក្លាយជាប្រធានគណៈកម្មការអឺរ៉ុបស្រ្តីដំបូងគេ។ រូបភាព Xinhua
× ទីបំផុត គណៈកម្មការអឺរ៉ុប មានប្រធានជាស្ត្រីលើកដំបូងក្នុងប្រវត្តិសាស្ត្ររបស់ខ្លួន។ នៅថ្ងៃទី១៦ ខែកក្កដា សភាអឺរ៉ុបបានបោះឆ្នោតគាំទ្រលោកស្រី អឺស៊ុឡា វ៉ុន ដឺ លៃអេន (Ursula von der Leyen) ជាប្រធានគណៈកម្មការអឺរ៉ុបថ្មីជំនួសលោក ហ្សង់-ក្លូដចាំងគើ (Jean-Claude Juncker) ដែលចប់អាណត្តិ។ ការជាប់ឆ្នោតរបស់មន្ត្រីអាល្លឺម៉ង់រូបនេះ ជាផ្នែកមួយនៃការផ្លាស់ប្ដូរក្បាលម៉ាស៊ីនដឹកនាំរបស់សហភាពអឺរ៉ុប។
លោកស្រី អឺស៊ុឡា វ៉ុន ដឺ លៃអេន ទទួលបានសំឡេងគាំទ្រចំនួន៣៨៣ ពីសមាជិកសភាសហភាពអឺរ៉ុបទាំងអស់ចំនួន៧៥១ ។ ជាអតីតរដ្ឋមន្ត្រីការពារជាតិអាល្លឺម៉ង់ លោកស្រី អឺស៊ុឡា ជាស្ត្រីទីមួយដែលកាន់កាប់តំណែងដ៏ខ្ពស់ក្នុងរចនាសម្ព័ន្ធដឹកនាំរបស់សហភាពអឺរ៉ុបក្នុងរយៈពេលជាង៥០ឆ្នាំមកនេះ។ អាណត្តិ៥ឆ្នាំរបស់លោកស្រី នឹងចាប់ផ្ដើមនៅថ្ងៃទី១ ខែវិច្ឆិកា ដោយជំនួសលោក ហ្សង់-ក្លូដ ចាំងគើ ដែលចប់អាណត្តិ។
បេក្ខភាពរបស់លោកស្រី អឺស៊ុឡា ត្រូវបានកំណត់ដោយជំនួបមេដឹកនាំប្រទេសសមាជិកទាំង២៨ ទើបដាក់ឲ្យសភាអឺរ៉ុបបោះឆ្នោតនៅពេលនេះ។ ប៉ុន្តែបើគិតតាមសំឡេងដែលទទួលបាន អ្នកនយោបាយរូបនេះ ហាក់ទទួលសំឡេងប្រឆាំងច្រើន ដែលខុសពីលោក ចាំងគើ ដែលទទួលការគាំទ្រដល់ទៅជាងបួនរយសំឡេងឯណោះពេលឈរឈ្មោះ។ នេះអាចជាបញ្ហាមួយសម្រាប់លោកស្រី អឺស៊ុឡា ក្នុងការអនុវត្តការងារដ៏ខ្ពង់ខ្ពស់មួយនេះ។
លោកស្រី អឺស៊ុឡា ដែលជាម្ដាយមានកូនចំនួន៧នាក់ ក៏ជាស្ត្រីមួយកាន់តំណែងរដ្ឋមន្ត្រីការពារជាតិនៅអាល្លឺម៉ង់ផងដែរ។ លោកស្រីជារដ្ឋមន្ត្រីកាន់តំណែងបានយូរមួយក្នុងរដ្ឋាភិបាលលោកស្រី អែនជែឡា មឺហ្គែល ។ សម្រាប់អាណត្តិ៥ឆ្នាំខាងមុខនេះ លោកស្រី បានសន្យាដឹកនាំអឺរ៉ុបឲ្យមានសមភាពយេនឌ័រ ហើយក្នុងចំណោមស្នងការទទួលកិច្ចការសំខាន់ៗរបស់សហភាពអឺរ៉ុប នឹងត្រូវបែងចែកឲ្យស្មើរវាងបុរស និងស្ត្រី។
ក្រៅពីតំណែងប្រធានគណៈកម្មការដែលត្រូវដឹកនាំស្ថាប័ននីតិប្រតិបត្តិរបស់សហភាពអឺរ៉ុប តំណែងកំពូលផ្សេងទៀតក៏មានសមាសភាពថ្មីដែរ។ នាយករដ្ឋមន្ត្រីបែលហ្ស៊ិក ឆាល មីឈែល នឹងជាបេក្ខជនសម្រាប់តំណែងប្រធានក្រុមប្រឹក្សាអឺរ៉ុបជំនួសលោក ដូណាល់ ទូស ។ លោកស្រី គ្រីស្ទីន ឡាហ្កាដ ដែលទើបលាលែងពីតំណែងនាយិកគ្រប់គ្រងមូលនិធិរូបិយវត្ថុអន្តរជាតិ (IMF) ជាបេក្ខភាពប្រធានធនាគារកណ្ដាលអឺរ៉ុប។
តំណែងសំខាន់មួយទៀតក្នុងជួរក្បាលម៉ាស៊ីនដឹកនាំគណៈកម្មការអឺរ៉ុប គឺស្នងការជាន់ខ្ពស់ទទួលបន្ទុកកិច្ចការការបរទេស និងសន្តិសុខ ដែលទទួលស្គាល់ជាទូទៅថា រដ្ឋមន្ត្រីការបរទេសសហភាពអឺរ៉ុបនោះ។ លោកស្រី ហ្វេដេរីកា ម៉ូហ្គេរីនី ជនជាតិអ៊ីតាលី បានកាន់តំណែងនេះតាំងពីឆ្នាំ២០១៤ មកនោះ ត្រូវចាកចេញ។ រដ្ឋមន្ត្រីការបរទេសអេស្ប៉ាញ ចូសេប បរេល (Joseph Borrell) ជាបេក្ខភាពសម្រាប់តំណែងមួយនេះ៕
Tag:
អឺរ៉ុប
អាល្លឺម៉ង់
Ursula von der Leyen
© រក្សាសិទ្ធិដោយ thmeythmey.com