បុរសម្នាក់ ត្រូវឃាត់ខ្លួន ដោយសារលក់ស៊ីមទូរស័ព្ទមិនបញ្ជាក់អត្តសញ្ញាណប័ណ្ណ

ជាតិ

បុរសម្នាក់ ត្រូវឃាត់ខ្លួន ដោយសារលក់ស៊ីមទូរស័ព្ទមិនបញ្ជាក់អត្តសញ្ញាណប័ណ្ណ

17, Jul 2019 , 8:39 pm

រូបភាព

រូបភាពពីនាយកដ្ឋានប្រឆាំងបទល្មើសបច្ចេកវិទ្យា

ដោយ: ឡាយ សុភាវតី

កម្លាំងនគរបាលខណ្ឌ៧មករា និងកម្លាំងប្រឆាំងបទល្មើសបច្ចេកវិទ្យា បានចុះឃាត់ខ្លួនបុរសម្នាក់ ដែលជាម្ចាស់ហាងលក់ទូរស័ព្ទ ដោយសារលក់ស៊ីមកាតទូរស័ព្ទឲ្យអថិតិជនមិនត្រូវការបញ្ជាក់អត្តសញ្ញាណប័ណ្ណ។

បុរសម្ចាស់ហាងនោះ បានអះអាងថា ខ្លួនលក់ស៊ីមកាតទូរស័ព្ទ ដោយទាមទារការបញ្ជាក់អត្តសញ្ញាណប័ណ្ណពីអតិថិជនដែរ តែអត្តសញ្ញាណប័ណ្ណនោះ គឺអតិថិជន ប្រើរបស់អ្នកផ្សេងមកជំនួស។ បច្ចុប្បន្ន សមត្ថកិច្ច កំពុងកសាងសំណុំរឿង ដើម្បីបញ្ជូនម្ចាស់ហាងនោះ ទៅតុលាការ។

នាយកដ្ឋានប្រឆាំងបទល្មើសបច្ចេកវិទ្យា បានសរសេរលើលើទំព័រហ្វេសប៊ុក នៅថ្ងៃទី១៦ ខែកក្កដា ឆ្នាំ២០១៩ ថា ការលក់ស៊ីមកាតទូរស័ព្ទដោយមិនបញ្ជាក់អត្តសញ្ញាណប័ណ្ណ គឺខុសនឹងលិខិតរបស់និយ័តករទូរគមនាគមន៍កម្ពុជា។

សមត្ថកិច្ច បានលើកឡើងថា កន្លងមកមានបទល្មើសជាច្រើន ដែលប្រើប្រាស់លេខទូរស័ព្ទសម្រាប់ឆបោកដល់ពលរដ្ឋ និងបង្កឲ្យមានអសន្តិសុខ ហើយលំបាកក្នុងការស្រាវជ្រាវ ដោយការទិញស៊ីមកាតទូរស័ព្ទមិនប្រើប្រាស់អត្តសញ្ញាណប័ណ្ណ។

លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា បានអំពាវនាវឲ្យពលរដ្ឋនិងម្ចាស់ហាង បញ្ឈប់ការទិញនិងលក់ស៊ីមកាតទូរស័ព្ទ ដោយគ្មានការបញ្ជាក់អត្តសញ្ញាណប័ណ្ណ។ លោក ព្រមានថា ការទិញលក់ស៊ីមកាតទូរស័ព្ទ ដោយគ្មានបញ្ជាក់អត្តសញ្ញាណប័ណ្ណ គឺត្រូវប្រឈមនឹងច្បាប់ ហើយអាចឈានដល់ការបិទអាជីវកម្ម៕